Read Mizo Lushai LEHKHABU PAKHATNA LALTE 6 Bible Online

LEHKHABU PAKHATNA LALTE 6 - Mizo Lushai bible

LEHKHABU PAKHATNA LALTE 6

¹Israel faten Aigupta an chhuahsan aṭanga kum zali leh sawmriat, Israel-te chunga Solomona a lal kum lina thla hnihna Ziv thlaah Solomona chuan LALPA Tempul a sa ṭan a.

²Solomonan LALPA tâna Tempul a sak chu a dung tawng sawmruk, a vâng tawng sawmhnih a ni a, a sân lam chu tawng sawmthum a ni.

³Tempul Hmun Thianghlim ber hma lamah chuan pindan hmasa, a in vâng tawng sawmhniha zau leh a thûk lam tawng sâwm a awm a.

⁴Tempul bangah chuan tukverh tê tak tê tê a siam a.

⁵Tempul bang rinchhanin pindan chhâwng thuma sâng a siam a.

⁶A hnuaihnung ber chu tawng ngaa zau a ni a, a laita chu tawng ruk, a chhâwng chung ber chu tawng sariha zau a ni. Tempul pindan chungnung bangte chu a hnuai bang aiin a pan zâwk avângin kalkhangte chu a chhawrdawhah a innghat mai a ni.

⁷Tempul sakna lungte chu lunglâkna hmuna chher sa vek a nih avângin Tempul sak lai chuan tuboh ri te, thîrkhen ri te hriat tûr a awm lo.

⁸In chhâwng hnuai ber luhna chu Tempul chhim lamah a siam a, chhâwng hnihna leh chhâwng thumna kal nân kailâwn a dawh bawk a.

⁹Chutiang chuan Tempul chu an sa zo ta a, a chhûng lam chu sidar thingphelin a thuah vek a.

¹⁰Tempul bang nghênga pindan sak chu chhâwng tin tawng ngaa sâng a ni; chhâwng tinah sidar kalkhang a hmang vek a.

¹¹ LALPA thu chu Solomona hnênah a lo thleng a.

¹²“Tûnah Tempul chu i sa zo ta a, ka dân leh ka thuhriattîr i pawisaka, ka thupêkte i zawm chuan i pa Davida hnêna ka thutiam kha i lakah ka hlen ang.

¹³Israel-te zîngah ka awm ang a, ka mi Israel-te chu ka thlahthlam lo vang,” a ti a.

¹⁴Solomona chuan Tempul chu a sa zo ta a.

¹⁵Tempul chhûng bang thuah nân sidar thingphel a hmang a, a chhuat aṭanga a chung thlengin thingphel a bel vek a, a chhuat atân fâr thingphel a phah a.

¹⁶Pindan chhûngril Hmun Thianghlim Ber an tih chu Tempul kawmchâr lamah tawng sawmhnih bialin a siam a, a chhuat aṭanga a chung thlengin a chhûng lamah sidar thingphelin a thuah vek a.

¹⁷Hmun Thianghlim Ber luh dâwn chiaha pindan chu tawng sawmli-a sei a ni.

¹⁸Tempul chhûng thuahna sidar thingphelah chuan pangpâr kuhmûm lem leh a pâr parh lem an ker a, a chhûng chu sidar thinga chei vek a nih avângin a bang lung chu a lang lo.

¹⁹Tempul chhûng hmun ril ber chu LALPA Thuthlung Bâwm dahna atân a siam a.

²⁰Chu pindan chu tawng sawmhnih bial, a sân lam tawng sawmhnih bawk a ni. A chhûng chu rangkachak hlîr hlakin a luan a. Sidar thinga siam maichâm pawh chu rangkachakin a luan bawk a.

²¹Solomona chuan Tempul chhûng chu rangkachakin a luan vek a, pindan chhûngril ber luhna kawngkaah chuan rangkachak khaidiat a thlung a, kawngka pawh chu rangkachaka luan a ni.

²²Tempul chhûng lam zawng zawng leh Hmun Thianghlim Bera maichâm awm chu rangkachaka luan vek a ni.

²³Hmun Thianghlim Berah chuan Oliv thinga siam cherub thla pahnih nei, tawng sâwma sâng ve ve a awm a.

²⁴Cherub pakhat thla chu tawng ngaa sei a ni a, a thla lehlam pawh tawng ngaa sei a ni. A thla hmâwr lehlam aṭanga a hmâwr lehlam chu tawng sâwm a nih chu.

²⁵Cherub-te chu an pianhmang leh an lenzâwng a inang a,

²⁶tawng sâwma sâng ve ve an ni.

²⁷Tempul chhûng Hmun Thianghlim Berah chuan Cherub-te chu a dah tlar a, an thla an zâr duai a. Cherub thla pahnih chu a laiah a insi a, Cherub pakhat zâwk thla lehlam hmâwr chuan bang a dek a, Cherub dang thla lehlam hmâwr chuan bang lehlam a dek bawk.

²⁸Chûng Cherub-te chu rangkachaka luan vek a ni.

²⁹Tempul chhûng lam bangah te, Hmun Thianghlim Ber chhûng lam bangah te chuan Cherub lem te, tûm thing lem te, pangpâr lem te an ker thluah a.

³⁰Hmun Thianghlim Ber chhuat leh pindan dang chhuatte pawh chu rangkachaka luan a ni.

³¹Hmun Thianghlim Ber luhna kawngkhârte chu oliv thinga siam a ni. Kawngka lu chung chu a zum a.

³²Oliv thingin kawngkhâr pahnih a siam a, Cherub lem te, tûm thing lem te, pangpâr lem te kerin a cheimawi a. Cherub lem te, tûm thing lem te, pang pâr lem te chu rangkachakin a luan a.

³³Tempul chhûng luhnaah chuan kawngkhâr kil li nei, kil tin inchen vek, oliv thingin a siam a.

³⁴Kawngkhâr kaihthleh theih pahnih fâr thingin a siam bawk a.

³⁵Chûngah chuan cherub thla nei lem te, tûm thing lem te, pangpâr lem te a ker a, rangkachakin a luan leh vek a.

³⁶Tempul hma lamah chuan kawt zâwl chhûngril zâwk a siam a, lungchher chhâwng thum leh sidar thingphêk thuah khatin a hung a.

³⁷Solomona lal kum lina, Ziv thlaah Tempul lung chu an phûm a.

³⁸Solomona lal kum sâwm leh pakhatna, thla riatna, Bul thlaah ruahman lâwk ang ngeiin Tempul chu an sa zo a ni. Kum sarih chhûng an sa a ni.