Read Mizo Lushai LEHKHABU PAKHATNA LALTE 7 Bible Online

LEHKHABU PAKHATNA LALTE 7 - Mizo Lushai bible

LEHKHABU PAKHATNA LALTE 7

¹Solomona chuan a in chu kum sâwm leh pathum chhûngin a sa zo va.

²In lian tak, ‘Lebanon Ngawpui In’ a tih chu a dung tawng za, a vâng tawng sawmnga, a sân lam tawng sawmthumin a sa bawk a. Sidar ban tlar thum a phun a, a chungah sidar liang a chhuang a, a siling chu sidar thing a ni.

³Tlar khatah ban sâwm leh panga zêl a awm a, ban sawmli leh panga a nei a.

⁴Sâng takah tukverh tlar thum a siam a, a bang chhak lama mi leh thlang lama mi chu a inzâwn vek a.

⁵Tukverh leh kawngkate pawh kil li nei, intiat vekin a siam a, hma lama tukverh tlar thumte leh hnung lama tukverh tlar thumte chu a inzâwn thliah bawk.

⁶Ban neiin hulhliap a siam a, a dung tawng sawmnga, a vâng tawng sawmthum a ni, bathlâr ban neiin a siam bawk a, a luhna kailâwn nên.

⁷Rorêlna pindan a siam leh a, chutah chuan lalṭhutthlêng a hûng a, chu chu rorêlna hmun a ni. A chhuat aṭanga a chung thlengin sidar thingphelin a thuah vek a.

⁸Rorêlna in hnungah chuan ama chênna tûr, in dang a sak ang bawkin a sa leh a. Tin, a nupui, Farawa fanu pualin in dang a sa bawk a.

⁹Chûng in zawng zawng chu, a kawtzâwl chenin, a lungphûm aṭanga liang thlengin lung ṭha chi a ni a, lungkhura chher, a chhûng lam leh pâwn lam mâm taka nawh sa vek a ni.

¹⁰A lungphûm atân lung ṭha chi, lian pui puia chher tawng sâwm te, tawng riatte a hmang a.

¹¹A chungah chuan lung ṭha chi, a tâwk chiah tûra chher sa a rem chho va, liang atân sidar thing a hmang a.

¹²Kawtlai zau tak chu a vêlin lungchher chhâwng thum leh sidar thing thuah khatin a hung a, LALPA Tempul kawtzâwl anga chei a ni.

¹³Lal Solomona chuan Tura khuaa mi pakhat, Hurama chu a chah a. A nu chu Naftali hnam, hmeithai a ni.

¹⁴A pa chu Tura khaw mi, dâr chhûn thiam tak a ni. Hurama pawh chu mi themthiam, dâr chi hrang hrang rei tak lo chher tawh a ni. Lal Solomona hnênah a lo kal a, thawh tûr an ruatsak zawng zawng chu a thawhsak ta a.

¹⁵Hurama chuan dâr ban pahnih, tawng sâwm leh pariata sâng ve ve, teh kuala tawng sâwm leh pahniha lian, Tempul luhna bulah a phun a.

¹⁶Ban chhîpah chuan dârin lu bâwk a siam leh a, ban lu bâwk chu tawng nga laia sâng a ni ve ve a.

¹⁷Ban lu bâwk chu khaidiat lem, vawi sariha vêtin a cheimawi a.

¹⁸Theibuhfai lem tlar, ban lu bâwkah chuan a siam chhuak ve ve a.

¹⁹Hulhliap ban lu bâwkte chu lili pâr ang maiin a mawi a, tawng lî-a sâng a ni.

²⁰Ban lu bâwk pahnih, mûm pul, khaidiat lema veh chhuah chung chiahah chuan theibuhfai lem zahnih a kual chhuakin a siam a.

²¹Tempul hma lama dâr ban pahnih a hûnte chu a chhim lama mi chu Jakin ban an ti a, hmâr lama mi chu Boaza ban an ti.

²²Ban lu bâwk chu lili pâr anga mawi a ni. Chutiang chuan bante chu a siam zo ta a.

²³Hurama chuan dâr tuizêm lian pui a siam bawk a, a laia hawlh tlangin tawng sâwm a ni a, a thûk zâwng chu tawng nga a ni. A tlânga teh kualin tawng sawmthum a ni.

²⁴A tlâng hnuai chu kuhmûm lem hian a vêl chhuak a, kuhmûm lem chu tlar hnihin a awm a; chûng chu a tuizêm nên a ruala chhûn nghâl vek a ni.

²⁵Tuizêm chu bâwngpa lem sâwm leh pahnih chungah a innghat a, pathumin hmâr lam a hawi a, pathumin chhim lam a hawi a, pathumin chhak lam a hawi a, pathumin thlang lam a hawi a. An chungah chuan tuizêm chu a hûng a, bâwngpa lem mawng lam chu a inchhawn vek a.

²⁶Tuizêm chhah zâwng chu kutphah bawk a ni, a kotlâng chu no tlâng ang a ni, lili kuhmûm angin a mûm a, tui litar sîngli lai dawng a ni.

²⁷Hurama chuan dârin bâwm nawrlirh sâwm a siam a, kil li nei, tawng li bial a ni a. A sân lam chu tawng thum a ni.

²⁸A bang chuan kâwm a nei ṭheuh va, a bangah chuan sakeibaknei lem te, bâwngchal lem te, cherub lem te a chuang a.

²⁹A kâwm chung lam leh hnuai lam sakeibaknei leh bâwng lem inkâr chu an chhûng vial chiat a.

³⁰Bâwm tinah chuan a ke pali, dâra siam, dâr tlâwn vuah a awm ṭheuh va. Bâwm chhûng kil tinah tuizêm inhûnna tûr dâr, inherh chiata chhûn a awm ṭheuh va.

³¹Bâwm chhînah chuan tuizêm chelhtu tûr dâr belvâl a awm a; tuizêm chu a chung lamah tawng khat a lawr a, bâwm chhûngah chuan tawng khat leh a chanve a pil a.

³²A ke palite chu dâr a ni a, tawng khat leh a chanve hawlh tlang a ni, a bâwm bang hnuaia awm a ni.

³³A ke vir chu sakawrtawlailîr ke ang a ni; a vuahna bâwr te, a kual dotu te leh a ke kual te chu dâr veka siam a ni.

³⁴A bâwm kil tinah chuan, bâwm nêna inzawm, dotu pali a awm ṭheuh va.

³⁵A tlâng vêttu tawng chanvea hlai a awm bawk. A dotu bante chu a bâwm bangte nên chhûn zawm vek a ni.

³⁶A donaah te leh a bâwm bangah te chuan hmun âwl lai apiangah cherub lem te, sakeibaknei lem te, tûm thing lem te an chuantîr zêl a, a lem huam loh chin a tlâng te chu inherh chiatin an siam zêl a.

³⁷Huraman chutiang chuan nawrlirh bâwm sâwm a siam a, an inang vek a, an intiat vek bawk.

³⁸Hurama chuan tuizêm sâwm, nawrlirh bâwm tina dah tûr a siam bawk a. Tuizêm chu a bial a, tawng li hawlh tlang a ni a, tui litar zariat vêl a dawng ṭheuh.

³⁹Nawrlirh panga chu Tempul chhim lamah a dah a, panga dang chu hmâr lamah. Dâr tuizêm kha Tempul chhimchhak kilah an hûng a.

⁴⁰Hurama chuan insilna bêl te, vutlawh te, maihûn te a siam a. Tichuan, LALPA Tempul atâna lal Solomona a siamsak zawng zawng chu a peih ta a.

⁴¹Dâr ban pahnih, ban lu bâwk, no bial anga kum te, ban lu bâwka khaidiat lem tlar hnih awm kual te,

⁴²ban lu bâwka theibuhfai lem zali, tlar hnih, za zêla kual chhuak te chu a siam a.

⁴³Bâwm nawrlirh sâwm leh tuizêm sâwm te,

⁴⁴bâwngpa sâwm leh pahnih chunga dâr tuizêm te,

⁴⁵bêl te, vutlawh te, thîrkutte nên; LALPA Tempul bungrua Huraman lal Solomona a siamsak zawng zawng chu dâr tle mia siam vek a ni.

⁴⁶Lal chuan Jordan phaizâwl Sukoth leh Zereda inkâr bellei hmunah chûng chu a chhûntîr a.

⁴⁷Hêng bungbêlte hi a tam êm avângin Solomona chuan bûk lovin a dah mai a, a zât hriat a ni lo.

⁴⁸Solomonan LALPA Tempul bungbêl a siamte chu rangkachak maichâm te, Pathian hnêna hlan tûr chhang serh dahna tûr rangkachak dawhkân te,

⁴⁹rangkachak hlîr hlaka siam khâwnvâr dahna zâr sarih nei sâwm, Hmun Thianghlim Ber hma lamah a hûng a, chhim lamah panga, hmâr lamah panga, pangpâr te, khâwnvâr te, chaicheh te nên.

⁵⁰Rangkachak no te, khâwnvâr huh hlumna te, rimtui hâlna berhbu te, meilawh te nên rangkachak vekin a siam a. Tempul Hmun Thianghlim Ber leh pâwn lam pindan indaidanna kawngkhâr leh a kalhnate chu rangkachaka siam vek a ni.

⁵¹Lal Solomonan LALPA Tempul a sak zawh hnu chuan a pa Davidan LALPA tâna a lo serh hran tawh tangkarua te, rangkachak te, bungbêl te chu Tempul sum dahnaah chuan a dah ta a.