Read Mizo Lushai LEHKHABU PAKHATNA LALTE 8 Bible Online

LEHKHABU PAKHATNA LALTE 8 - Mizo Lushai bible

LEHKHABU PAKHATNA LALTE 8

¹Lal Solomona chuan Israel upate, hnam hruaitute chu Davida khawpui Zion aṭanga Jerusalem, a chênna hmuna Thuthlung Bâwm chu laa Tempul-a dah sawn tûrin a ko khâwm a.

²Israel mi zawng zawng chu thla sarihna, Ethanim thlaah kût hmang tûrin lal Solomona hnênah chuan an lo kal khâwm a.

³Israel upate an lo thlen chuan puithiamte chuan Bâwm chu an zâwn a.

⁴LALPA Bâwm te, Inbiakna puan in te, bungbêl thianghlim zawng zawng te chu tempulah chuan an dah ta a. Puithiam leh Levia chite chuan an zâwn chho va.

⁵Israel mi, a hnêna awm zawng zawng chu lal Solomona hovin Thuthlung Bâwm hmaah chuan an lo kal khâwm a; berâm leh bâwng chhiar sên rual lohvin an inthawi a.

⁶Puithiamho chuan LALPA Bâwm chu Tempul chhûngah an zâwn lût a, a awmna tûra ruat Hmun Thianghlim Berah, cherub thlazâr hnuaiah chuan an dah a.

⁷Cherub thlazâr chuan Bâwm leh a zâwnfung chu a khuh a.

⁸A zâwnfung hmâwr chu Hmun Thianghlim Ber kawngka hmazâwn taka din chuan a lang thei, pâwn lam aṭang erawh chuan a lang thei lo. A zâwnfungte chu tûn thlengin a la awm reng a ni.

⁹Bâwm chhûngah chuan eng mah dang a awm lo, Israel fate Aigupta ram aṭanga an lo chhuah laia Horeb tlânga LALPA Thuthlung ziakna lungphêk pahnih Mosia dah chauh kha a awm a ni.

¹⁰Puithiamhovin Hmun Thianghlim Ber an chhuahsan veleh LALPA Tempul chu chhûmin a khuh ta a.

¹¹Chhûm avâng chuan puithiamte chuan rawng an bâwl thei ta lo va, LALPA ropuina chuan Tempul chu a tikhat vek si a.

¹²Solomona chu a ṭawngṭai a, “LALPA chuan, ‘Thim chhah mupah ka awm ang,’ i lo ti a.

¹³Tempul ropui tak i tân ka sa ta e, kumkhuaa i chên nân a ni e,” a ti a.

¹⁴Israel mi zawng zawng chu chutah chuan an ding a, Solomona chuan an lam a hawi a, Pathian malsâwmna a dîlsak a.

¹⁵Hetiangin a sawi a: “Israel-te Pathian, LALPA chu fak rawh u, ani chuan ka pa Davida hnêna a thutiam a rawn tihpuitlin tâk hi.

¹⁶LALPA chuan, “Ka mite Aigupta ram ata ka hruai chhuah ni aṭang khân tûn thlengin Israel khawpui khawiah mah min biakna tûr Tempul sakna hmun ka la thlang lo. David, nang erawh hi chu ka mite rorêltu atân ka thlang che a ni, a tih kha,” a ti a.

¹⁷Solomona chuan a sawi zêl a, “Ka pa Davida khân LALPA, Israel-te Pathian biak nân Tempul sak a lo tum ṭhîn a.

¹⁸Mahse, LALPA chuan ka pa Davida hnênah, ‘Tempul min saksak i tum ṭhîn a, i ti ṭha e.

¹⁹Mahse, nang chuan ka Tempul i sa lo vang; i fapa, i rîla rah ngei chuan ka Tempul chu a sa zâwk ang,’ a ti a nih kha.

²⁰“LALPA chuan thu a lo tiam tawh chu a vawng reng a, ka pa Davida ai ka awh a, tûnah Israel-te lal ka lo ni ta a, LALPA lo tiam tawh angin Israel-te Pathian, LALPA chibai bûk nân Tempul chu ka sa ta a ni.

²¹Thuthlung Bâwm, min thlahtute Aigupta ram ata an lo chhuaha LALPA nên thu an thlun ziakna lungphêk pawh tempulah dah a ni ta e,” a ti a.

²²Solomona chu mipui hma lam, LALPA maichâm bulah a ding a, bân phar chungin

²³a ṭawngṭai a, “Aw LALPA, Israel-te Pathian, chung lam vânah te, hnuai lam leiah te, nang ang Pathian dang rêng an awm lo. I mite nêna i thuthlung chu i vawng reng a; tih tak zeta i thu an zawm phawt chuan i hmangaihzia i lantîr ṭhîn.

²⁴Ka pa Davida hnênah i thutiam i hlen a, vawiin hian i tipuitling ta a ni.

²⁵“Aw LALPA Israel-te Pathian, ka pa Davida khân i dânte a pawisak ṭhin anga a thlahten an pawisak ve phawt chuan a thlah pakhat tal chu Israel lalṭhutthlêngah an ṭhu reng ang tih i tiam pawh kha hlen bawk ang che.

²⁶Ka pa Davida, i chhiahhlawh hnêna i tiam zawng zawng kha, Aw LALPA, Israel-te Pathian, vawiina i tihhlawhtlin ang hian tihlawhtling zêl ang che.

²⁷“Mahse, nang Pathian meuh chu lei mite zîngah i chêng duh ngût ang emaw chu? Vânah meuh pawh i leng lo a ni a, ka Tempul sakah hian i leng dâwn em ni le?

²⁸Aw LALPA, ka Pathian, i chhiahhlawh ka ni a, vawiina i hnêna ka dîl hi ngaithla la, ka ngen hi min phalsak ang che.

²⁹He Tempul, nangmah biak nâna i thlan hi, a chhûn a zânin vêng la, he Tempul lam hawia ka ṭawngṭai hi lo ngaithla ang che.

³⁰Ka ṭawngṭai ngaithla la, i mite pawh he Tempul lam hawia an ṭawngṭai chuan ngaithla ang che. I chênna vân aṭangin lo hria la, min ngaidam ang che.

³¹“Tu pawh, thil tisuala puh, i maichâm hmaa a lo kala, a tihsual lohzia chian nâna chhia a rawn chham chuan,

³²Aw LALPA, vân aṭangin lo ngaithla la, i chhiahhlawhte chungthu chu dik takin rêlsak la, thil tisualtu chu a phu angin hrem la, pawi khawih lo chu chhuah ang che.

³³I chunga an sual avânga, i mi Israel-te chu hmêlmaten an hneha, i lam an lo hawia, he Tempula inngaitlâwma ngaihdam an rawn dîl chuan

³⁴vân aṭangin lo ngaithla ang che. I mite sualna chu ngaidam la, an thlahtute hnêna i pêk ramah hian hruai kîr leh ang che.

³⁵I miten thil an tihsual avânga khua i khêntîra, an sual sima he Tempul lam hawia an ṭawngṭai chuan,

³⁶vân aṭangin lo ngaithla ang che. Lalte sualna leh Israel mite sualna ngaidam la, thil dik tih zirtîr ang che. Tichuan, Aw LALPA, i mite chên rengna tûra i pêk ramah hian ruah sûrtîr ang che.

³⁷He ramah hian ṭâm a tlâka, hri a lêna, thli lumin thlai a chhêm chhiata, khaute a puana, hmêlmaten i mite an rawn do hun leh damloh hritlân an tawh hunah,

³⁸an ṭawngṭaina chu lo ngaithla ang che. I mi Israel tu pawh, sim takzeta he Tempul lam hawia bânphara a ṭawngṭai chuan,

³⁹an ṭawngṭaina chu lo ngaithla ang che, i chênna vân aṭangin lo ngaithla la, ngaidam la, ṭanpui ang che. Nang chauhvin mihring ngaihtuahna chhûngril i hre thei a. Mi tin an phu tâwk zêlin rêlsak la;

⁴⁰tichuan, he ram, kan pute hnêna i pêkah hian an dam chhûngin i mite chuan i thu an zâwm zêl dâwn nia.

⁴¹“Hnam dang, Israel mi ni lo, ram hla taka awmte pawhin i ropuizia leh i thiltihtheihzia an hriata, nangmah be tûra an lo kala, he Tempula an ṭawngṭai chuan,

⁴²

⁴³an dîl chu ngaithla la, i chênna vân aṭang chuan lo ngaithla la, an ngen chu tihsak ang che. Tichuan, khawvêla mi zawng zawngin i mi Israel-te ang bawkin an hria ang chia, i thu an zâwm dâwn nia. He Tempul ka sak hi nangmah chibai bûkna hmun a ni tih an hria ang a.

⁴⁴An hmêlmate do tûra i mite an chhuaha, khawi aṭang pawha i thlan he khua emaw, i tâna ka Tempul sak lam hawi emawa an ṭawngṭai chuan,

⁴⁵an dîl chu lo hria la, vân aṭangin ngaithla la, an hmêlmate hnehtîr ang che.

⁴⁶“I miten i laka thil an tihsuala, (tu mah thil tisual lo an awm si lo) i thinura an hmêlmate i hnehtîra, sala an hruaiin an hruaina ram chu hla hle mah se,

⁴⁷i mite ṭawngṭai chu ngaithla ang che. Chu ramah chuan an sual an sima, an sualna leh an khawlohna thupha an chawi chuan aw LALPA, an ṭawngṭai ngaithla ang che.

⁴⁸Chu rama an awm hnua an sual an sim takzeta, inchhîra an thlahtute hnêna i pêk ram lam te, i khawpui thlan lam te, i tâna ka sak he Tempul lam hawi tea an ṭawngṭai chuan,

⁴⁹lo ngaithla la, i chênna vânsâng aṭang chuan lo hria la, an chungah zahngai ang che.

⁵⁰I mite sualna leh an bawhchhiatna zawng zawng chu ngaidam la, an hmêlmate chu an chungah ṭhat chhuahtîr ang che.

⁵¹Rawhtuina mei, Aigupta ram aṭanga i hruai chhuah, nangma mite ngei an nih hi.

⁵²Engkim LALPA, i mi Israel-te leh an lalte chungah zah ngai la, ṭanpui dîla an koh hun apiangah lo ngaithla ang che.

⁵³Anni chu khawvêl hnam zawng zawng ata i pual atân i thlang a, i chhiahhlawh Mosian kan pute Aigupta ram aṭanga a hruai chhuah lai khân an hnênah i sawi tawh si a,” tiin.

⁵⁴Solomona chu LALPA hnêna a ṭawngṭai zawh chuan bân phara a ṭawngṭaina hmun maichâm hma ata chu a lo ding chhuak a.

⁵⁵Mipui pung khâwm zawng zawng tân Pathian malsâwmna ring takin a dîlsak a.

⁵⁶“A lo tiam tawh anga a mite hnêna remna petu LALPA chu fakin awm rawh se. A chhiahhlawh Mosia hmanga a thutiam hlu tak tak chu a vawng reng a,

⁵⁷kan pute hnêna a awm ṭhîn angin LALPA kan Pathian chu kan hnênah awm rawh se.

⁵⁸A thu awih thei tûrin min pui sela; tichuan, a duh angin kan nung ang a; kan pute hnêna dân leh thupêkte chu kan zâwm thei ang.

⁵⁹LALPA, kan Pathian chuan kan ṭawngṭaina leh a hnêna kan dîlte chu hre reng rawh se. Israel-te leh an lalte khawngaih sela, an mamawh pe zêl rawh se.

⁶⁰Tichuan, khawvêla hnam tinin LALPA chauh hi Pathian a ni tih an hria ang.

⁶¹Nangni, a mite u, LALPA, kan Pathian lakah rinawm takin awm ula, a dân leh a thupêkte chu vawiina in zâwm ang hian zâwm zêl ang che u,” a ti a.

⁶²Lal Solomona leh chuta Israel mi awm zawng zawng chuan LALPA hnênah thilhlan an hlân a.

⁶³Remna thilhlan atân bâwngpa sînghnih leh sânghnih leh berâm nuaikhat leh sînghnih an hlân a. Tichuan, lal leh Israel mipui chuan Tempul chu an hawng ta a.

⁶⁴Chumi ni bawk chuan Solomonan tual hung chhûng kawtlai, Tempul kawta mi chu a hawng bawk a. Hâlral thilhlan te, buhbâl thilhlan te leh remna thilhlana ran thau te chu a hâl a. Dâr maichâm a siam kha hêng zawng zawng hlan nân hian a tê lutuk a, maichâma leng lo chu tualah chuan a hâl mai a ni.

⁶⁵Lal Solomona leh Israel mipui chuan tempulah chuan Bâwkte kût, ni sarih chhûng an hmang a. Chutah chuan Israel ram hmâr tâwp Hamath kalkhân aṭanga Israel ram chhim lam Aigupta lui inkâra mi zawng zawng an lo kal khâwm a, mi an tam kher mai.

⁶⁶A ni riat ni chuan Solomona chuan mite chu an in lamah a hawtîr a, LALPA chuan a chhiahhlawh Davida leh a mite chu mal a sâwm avângin hlim takin an ṭin a, Solomona chu an fak a.