Read Mizo Lushai LEHKHABU PAKHATNA LALTE 9 Bible Online

LEHKHABU PAKHATNA LALTE 9 - Mizo Lushai bible

LEHKHABU PAKHATNA LALTE 9

¹Lal Solomonan Tempul te, lal in te, in dang te a sak zawh hnu chuan

²Gibeona a awm lai ang khân LALPA chu a hnênah a inlâr leh a.

³LALPA chuan a hnênah, “I ṭawngṭai ka lo ngaithla a, he Tempul i sak hi kumkhuaa min biakna hmun atân ka thlang ta e. Ka vil ang a, ka vêng reng ang.

⁴I pa Davida angin rinawm tak leh dik taka ka rawng i bâwl a, ka dânte leh i hnêna ka thupêkte i zawm chuan,

⁵i pa Davida hnêna ka thutiam, a thlahte chu Israel-te lalah an ṭang reng ang, tia ka tiam kha ka hlen ang.

⁶Nang leh i thlahten min zui in bânsana, in tâna ka dân leh thupêkte hi in zawm lohva, pathian dangte in biak erawh chuan,

⁷ka mi Israel-te chu an tâna ka pêk ram ata ka paih chhuak ang. He Tempul, min biakna hmun atâna ka tihthianghlim tawh pawh hi ka rauhsan ang. Khawvêla hnam tinin Israel-te chu an hmusitin an nuihzat ang a,

⁸he Tempul hi a chhe vek ang a, a kianga kal apiangin mak ti takin, ‘Engtizia nge LALPA hian he ram leh he Tempul hi heti taka a sawisak le?’ an ti ang a,

⁹mite chuan, ‘An thlahtute Aigupta ram aṭanga hruai chhuaktu LALPA an Pathian chu an kalsan atin alâwm maw le, pathian dangte an vuan a, an rawngte an bâwlsan avângin LALPA hian a sawisa a nih hi,’ tiin an chhâng ang,” a ti a.

¹⁰Solomona chuan LALPA Tempul leh ama in chu kum sawmhnih chhûng a sa a,

¹¹Tura lal Hirama chuan sidar thing te, fâr thing te, rangkachak te, a mamawh apiang hêng in sak nân hian a pe a. In sak a zawh hnu chuan Lal Solomona chuan Hirama chu Galili ram bial chhûnga khaw sawmhnih a pe a.

¹²Hirama chuan khuate chu a va hmuh chuan a lâwm lo hle a.

¹³Tichuan, Solomona hnênah, “Unaupa, hetiang hi a ni maw min pêk le?

¹⁴Eng atân maha hman tlâk loh, Kabul ram a nih hi,” a ti a. Tûn thlengin chu hming chu a pu hlen ta a. Hirama chuan Solomona chu rangkachak kg. sângli lai a lo thawn tawh si a.

¹⁵Lal Solomona chuan Tempul te, ama in te, khawpui chhak lam khuar hnawh khat tûr te, kulh bang siam tûr tein hnathawktu rawih luih pâwl a siam a. Tin, hêng khua Hazor te, Megido te, Gezer te hi a din ṭha bawk a.

¹⁶Aigupta lal Farawa khân Gezer khua a rûn a, a hâl vek a, khawpuia chêng chu a that vek bawk a. A fanu, Solomona nupui chu a chhawmtîr a.

¹⁷Solomona chuan a din ṭha a; hna thawka a chhawr luihte chu Beth-horon chuanhnuai te;

¹⁸Baalat khua te, Judai ram thlalêra Tamar khua te a din ṭhattîr bawk a.

¹⁹Kudâm awmna khua te, sakawr leh sakawr-tawlailîr dahna khua te, Jerusalem-ah te, Lebanon-ah te leh ram chhûng hmun tinah sak ṭûl a tih zawng zawng chu a sa zo ta a.

²⁰Hêng hnam Amor te, Hit te, Periz te, Hiv te, Jebus mite hi

²¹Israel-ten Kanan ram an luh khân an that vek lo va, Solomona khân hnathawka chhawr luih atân an thlahte chu a hmang a, tûn thlengin bawih an ni ta zêl a ni.

²²Solomona chuan Israel mi tu mah bawihah a chhawr lo, sipai atân te, hotu atân te a chhawr thung a.

²³Solomona in sak hrang hranga mi chhawrte enkawltu mi zanga leh sawmnga an awm a.

²⁴Solomona nupui Aigupta lal fanu chu Davida khawpui aṭangin a puala in a sakah chuan a sawn chho va, chumi hnu chuan khawpui chhak lam ruam chu a chhûng khat a.

²⁵Solomona chuan LALPA tâna maichâm a siamah chuan hâlral thilhlan leh remna thilhlan, kum khatah vawi thum a hlân a. LALPA tân rimtui a hâl bawk a. Tichuan, Tempul sak chu a zo ta a.

²⁶Lal Solomona chuan Edom rama Eloth kiang, Agaba litengsâwl Ezion-geber khuaah lawng rual a siam a.

²⁷Lal Hirama chuan a lawng mite chu Solomona mite pui tûrin a tîr a.

²⁸Ofir ramah an kal a, rangkachak kg. sângkhat leh zali an va la a. Solomona chu an rawn pe a.