Read Mizo Lushai LEHKHABU PAHNIHNA LALTE 1 Bible Online

LEHKHABU PAHNIHNA LALTE 1 - Mizo Lushai bible

LEHKHABU PAHNIHNA LALTE 1

¹Israel lal Ahaba a thih hnuin Moab-ho chu Israel lakah an hel a.

²Lal Ahazia chu Samaria khuaa a in chung zâwl aṭangin a tla a, a na hle a, a dam dâwn leh dâwn loh thu-ah Filistia-a Ekron khaw pathian Baal-zebuba râwn tûrin mi a tîr a.

³LALPA Vântirhkoh chuan Tisbe mi Elija chu, “Tho la, Samaria lal mi tirhte tâwk tûrin kal rawh. Israel ramah Pathian a awm lo vem ni? Engtizia nge Ekron pathian Baal-zebuba râwn tûra in kal le?

⁴LALPA chuan, ‘I kaina khum aṭang khân i lo chhuk leh tawh lo vang, i thi ngei dâwn,’ a ti,” ti tûrin a tîr a. Elija chu a kal ta a.

⁵Lal mi tirhte chu a hnênah an lo haw leh vat a; an hnênah, “Engtizia nge in lo kîr leh mai?” a lo ti a.

⁶Anni chuan, “Mi pakhatin min rawn tâwk a, ‘A tîrtu che u lal hnênah chuan kîr leh ula, LALPA chuan heti hian a ti: Israel ramah Pathian a awm lo vem ni? Ekron pathian Baal-zebuba râwn tûra mi i tirh le? I kaina khum ata kha i lo chhuk leh tawh lo vang, i thi ngei ang, tiin hrilh rawh u,’ min ti,” an ti a.

⁷“Hêng thu sawia rawn tâwktu che u chu eng ang mi nge maw a nih le?” a ti a.

⁸Anni chuan, “Pa hmulphurh chhe tak a ni; savun kâwnghrên a hrêng,” an ti a. Ani chuan, “Tisbe mi Elija a nih chu,” a ti a.

⁹Lal chuan sipai hotu, a sipai sawmnga nên a tîr a. Ani chuan tlâng chhîpa Elija lo ṭhu chu a va hmu a, a hnênah, “Nang Pathian mi, lalin, ‘Lo chhuk rawh,’ a ti a che,” a ti a.

¹⁰Elija chuan, “Pathian mi ka nih tak zet chuan vân ata mei lo tla sela, nang leh i hote kha rawn kâng hlum che u rawh se,” a ti a. Vân aṭang chuan mei a lo tla a, sipaite chu an hotu nên chuan an kâng hlum ta a.

¹¹Lal chuan sipai dang sawmnga leh an hotu a tîr leh a. Ani chu a chho va, Elija hnênah, “Nang Pathian mi, lal chuan lo chhuk thuai tûrin a ti a che,” a ti a.

¹²Elija chuan, “Pathian mi ka nih tak zet chuan vân ata mei lo tla sela, nang leh i hote kha kâng hlum che u rawh se,” a ti a. Pathian mei chu a lo tla ta nghâl a, sipai hotu chu a hote nên chuan an kâng hlum ta a.

¹³Lal chuan sipai sawmnga dang, an hotu nên a tîr leh a. Tlângah chuan a han chho va, Elija hmaah chuan a ṭhingṭhi a, “Aw Pathian mi, kei leh ka hote hi min khawngaih la, kan nunna hi min zuahsak teh.

¹⁴Sipai hotu pahnih lah an hote nên vân aṭanga lo tla meiah an kâng hlum a, keini hi chu khawngaih takin min zuah teh,” a ti a.

¹⁵ LALPA vântirhkoh chuan Elija hnênah, “A rualin chhuk rawh, hlau suh,” a rawn ti a. Tichuan, a tho va, a rual chuan a chhuk a, lal hmu tûr chuan a kal ve ta a.

¹⁶Lal hnênah chuan, “Ekron pathian Baal-zebuba râwn tûrin mi i tîr vei maw? Israel ramah râwn tûr Pathian a awm lo vem ni? I kaina khum ata kha i lo chhuk leh tawh lo vang, i thi ngei ang,” a ti a.

¹⁷Elija sawi LALPA thu ang chuan Ahazia chu a thi ta a. Ahazia chuan fapa a nei lo va, Judai ram lal Jehosafata fapa Jehorama a lal kum hnih kum chuan a nau Jorama chu a aiah a lal ta a.

¹⁸Lal Ahazia thiltih dang zawng chu Israel lalte chanchin ziakna buah a chuang.