Read Mizo Lushai LEHKHABU PAHNIHNA LALTE 10 Bible Online

LEHKHABU PAHNIHNA LALTE 10 - Mizo Lushai bible

LEHKHABU PAHNIHNA LALTE 10

¹Samaria khuaah chuan Ahaba fapa sawmsarih an awm a. Samaria khaw upate, hotute leh Ahaba fa enkawltu te hnênah Jehua chuan lehkha a thawn a, hetiang hian a ziak a:

²“Lal fate chu in kutah an awm a, tawlailîr te, sakawr te, râlthuam te, kulh nei khua te in thu thu-a hman tûr in nei a.

³Ka lehkha hi in hmuh veleh lal fate zînga fel ber thlang chhuakin lalah siam ula; in lal thar tân chuan do rawh u,” tiin.

⁴Samaria khaw hotute chuan an hlau êm êm a. “Lal pahnih pawhin an ngam lo va, keini tehlulin engtin nge kan ngam ang?” an ti a.

⁵Lal in enkawltu te, khaw hotute, upate leh lal fa enkawltute chuan an chhâng a, “I chhiahhlawh kan ni a, tih tûr i tih apiang ti tûrin kan inpeih reng e. Tu dang mah lala siam kan tum lo, ṭha i tih ang angin ti mai rawh,” an ti a.

⁶Jehua chuan lehkha dang a thawn leh a, “Ka lamṭang in niha, ka thu in awih dâwn chuan naktûk hetih hunah Jezreel khuaah hian lal fate lu kha han la rawh u,” tiin. Ahaba fa sawmsarihte chu Samaria khaw hotu, anmahni enkawl seiliantute kuta awm an ni a.

⁷Jehua lehkha an hmuh chuan Samaria khaw hotu te chuan Ahaba fa sawmsarihte chu an that vek a, an lu chu bâwmah an khung a, Jezreel-ah Jehua hnênah an thawn ta a.

⁸Ahaba fate lu chu an rawn la ta tih Jehua chu an hrilh a. Ani chuan, “Khawpui kulh kawngka bulah hmun hnihah tiang khâwm ula, naktûk thlengin awm rawh se,” a ti a.

⁹A tûkah kulh kawngka bulah chuan a va kal a, chu laia lo awmte hnênah chuan, “Lal Jorama phiara thattu ka ni, chu mi mawh chu nangni phurh tûr a ni lo. Hêng mite hi tu thah nge?

¹⁰Ahaba fate chungchânga LALPA thu sawi kha a thlâwn lo va ni tih hre rawh u. LALPA chuan a zâwlnei Elija hnêna a sawi zawng zawng kha a rawn ti ta a nih hi,” a ti a.

¹¹Jezreel-ah chuan Ahaba laichîn hnai te, sipai hotu te, a ṭhian bul te leh a puithiam te chu pakhat mah zuah hlek lovin a that fai vek a.

¹²Jehua chuan Jezreel a chhuahsan a, Samaria khuaah kal a tum a. Kawngah, ‘Berâmpu bûk,’ an tihah chuan,

¹³Juda lal Ahazia chhûngte a tâwk a, “Tute nge in nih?” a ti a. “Ahazia laichîn kan ni, lalnu Jezebeli fate leh lal chhûngte chibai bûk tûrin Jezreel khuaah kan kal dâwn a ni,” an ti a.

¹⁴Jehua chuan a hote hnênah, “A nung chungin man teh u,” a ti a. An man a, chumi kiang, Beth-eked khur bulah chuan a that ta a. An vaiin mi sawmli leh pahnih an ni, pakhat mah an zuah lo.

¹⁵Jehua chu a kal zêl a, Rekaba fapa Jehonadaba chuan a rawn tâwk a. Jehua chuan chibai a lo bûk a, “I chunga rilru ka put ang hian ka chungah rilru ṭha i pu ve em?” a ti a. Jehonadaba chuan, “Pu e,” a ti a. “Chuti chu i kutin mi han ban teh,” Jehua chuan a ti a. Kut an insuih a, Jehua chuan tawlailîrah a kai lût ta a.

¹⁶“Ka rualin kal ve la, LALPA tâna ṭhahnem ka ngaihzia nangmah ngeiin hmu ang che,” a ti a. Samaria khuaah tawlailîr chuan an chuang lût ta a.

¹⁷An va thlen chuan Ahaba laichîn zawng zawng chu pakhat mah zuah lovin a that ta phiar a. Elija hnêna LALPA sawi kha a lo thleng ta a ni.

¹⁸Jehua chuan Samaria mite chu a ko khâwm a, an hnênah, “Lal Ahaba khân nêp takin Baal rawng a bâwl ṭhîn a, Jehua erawh chuan a uar hle dâwn a ni.

¹⁹Baal zâwlnei te, a betu zawng zawng te leh a puithiam zawng zawng ko khâwm teh u; tu mah hmaih tûr a ni lo. Baal hnênah thilhlan ropui tak ka hlân dâwn, a lo tel ve lo chu tihhlum vek tûr an ni,” a ti a. Baal betute tihhlum vek a tum avângin chutiang chuan fin vervêk a chhuah a ni.

²⁰“Baala biakna tûr ni ruat rawh u,” Jehua chuan a ti a. Ni an ruat ta a.

²¹Jehua chuan Israel rama mite chu a chah khâwm a; Baal betu zawng zawng chu an lo kal a, lo kal lo rêng an awm lo. Baal tempulah chuan an ṭhu khat hmur a.

²²Puithiam kawr enkawltute hnênah, “Baal betu zawng zawng bah tûr puan han la teh,” a ti a. Puan bah tûr chu a rawn la a.

²³Jehua leh Rekaba fapa Jehonadaba chu Baal tempulah chuan an lût ve a, “Baal betu ni lo, LALPA betu hetah hian an awm ve nge awm ve lo zawng ngun teh u,” a ti a.

²⁴Hâlral thilhlan leh thilhlan chi dang dang hlân tûrin Baala tempulah chuan an lût ve ta a ni. Jehua chuan mi sawmriat pâwnah a dah ru a, an hnênah, “Hêngho hi in thah vek tûra ka tih an ni; in chhuah vaih chuan a chhuahtu chu a chhuaha aiah thah ve tûr a ni,” a ti a.

²⁵Hâlral thilhlan a hlan zawhin Jehua chuan a sipaite leh an hotute hnênah, “Lût ula, tu mah zuah lovin that vek rawh u,” a ti a. Baal tempulah chuan khandaih phawisa nên an lût a, an that ta vek a; an ruang chu an rawn hnûk chhuak a; Tempul chhûngrilah an lût a;

²⁶chutah Baal lim thingtum an phunte chu an la chhuak a, an hâl a.

²⁷Baal lim lung phunte chu an titliak a, Tempul chu an ṭhiat a, tûn thlengin miin inthiarna takah an hmang ta a ni.

²⁸Chutiang chuan Israel ramah Baal biakna chu tihchhiat a ni a.

²⁹Nebata fapa Jeroboama suahsualna, Israel-te a hruai khawlohna sual chu Jehua chuan a thlah vek lo. Bethel-ah leh Dan khuaa rangkachak bâwngno limte kha an la be ta zêl a ni.

³⁰LALPA chuan Jehua hnênah, “Ka hmuha thil ṭha i tih a, ka duh angin Ahaba chhûngte i sawisak avângin i thlahte chhuan li thlengin Israel ramah an lal ang,” a ti a.

³¹Nimahsela, Jehua chuan LALPA, Israel-te Pathian dân chu tihtakzetin a zâwm duh lo va; Jeroboama sualna, Israel-te a hruai khawlohna sual kha a thlah phal lo.

³²Chûng lai chuan Israel ram chu LALPA chuan a tihzîmsak a. Suria lal Hazaela khân Israel ram a rawn rûn a.

³³Jordan lui chhak lam ram, Gilead te, Gad-ho te, Reuben-ho te leh Manase-ho te awmna ram Arnon luiruama Aroer te, an khawpui Gilead leh Basan thlengin a la ta a.

³⁴Jehua thiltih dang zawng zawng, a chakzia te, Israel lalte chanchin ziakna bu-ah a chuang vek a ni.

³⁵Jehua chu a thi a, Samaria khuaah chuan an phûm ve ta a. A fapa Jehoahaza chu a aiah a lal a.

³⁶Kum sawmhnih leh pariat chhûng Samaria khuaah chuan Jehua chu a lal a ni.