Read Mizo Lushai LEHKHABU PAHNIHNA LALTE 11 Bible Online

LEHKHABU PAHNIHNA LALTE 11 - Mizo Lushai bible

LEHKHABU PAHNIHNA LALTE 11

¹Lal Ahazia thih thu a nu Athali chuan a hriat veleh lal chhûngte chu a thahtîr vek a.

²Ahazia fapa Joasa chiah a thah hmaih a. Lal Jehorama fanu Jehosebi, Ahazia farnu chuan a thukru a ni. A awmtu nên Tempul pindan pakhatah Athali hmuh loh tûrin a thukru a, thah a ni ve ta lo a ni.

³Athali lal chhûng kum ruk chu Jehosebi chuan tempulah a dah a, a rûkin a enkawl a.

⁴A kum sarih kum chuan puithiam lalber Jehoiada chuan lal vêngtu Keret sipai za rual hotute leh lal in vêngtu sipai hotute chu a ko va, a thil tih tum chu a hrilh a, Tempul chhûngah chhia chhamin an remtihpui a, lal Ahazia fapa Joasa chu a hmu a.

⁵Hetiang hian a hrilh a: “Sabat nia hna thawk tûra in lo kal hunah hmun thuma ṭhen hmun khat chuan lal in vêng ula,

⁶hmun thuma ṭhena hmun khat chuan Sur kawngkhâr vêng ula; a dang hmun thuma ṭhena hmun khat chuan vêngtuho hnung kawngkhâr vêng ang che u.

⁷Vêngtu pâwl hnih Sabat nia châwl tûrte chu lal vêng tûrin tempulah an awm tûr a ni.

⁸Lal Joasa hi khandaih phawi sa kengin in vêng tûr a ni, a kalna apiangah zui ang che u. Rawn hnaihtu chu lo that zêl ang che u,” a ti a.

⁹Sipai hotute chuan Jehoiada thu chu an zâwm a, an sipai sabat nia châwl tûrte leh thawk tûrte chu an rawn hruai a.

¹⁰Tempul chhûnga dah ṭhat lal Davida feite leh phâwte chu sipai hotute a pe a.

¹¹Tempul hma lamah khandaih phawi sa kengin lal vêng tûrin a din tlartîr bawk a.

¹²Jehoiada chuan Joasa chu a hruai chhuak a, lallukhum chu a khumtîr a, lal awm dân tûr ziakna dân bu chu a pe a. Joasa chu hriak an thih a, lalah an puang ta a. Mipui chuan kut an beng dur dur a, “Lal chu dam reng rawh se,” an ti a.

¹³Lalnu Athali chuan vêngtuho sipaite leh mipui thâwm chu a hriatin mipui punkhâwmna Tempul lamah chuan hmanhmawh takin a kal a.

¹⁴Lal thar chu lal din ṭhinna tûra ruat Tempul luhna ban bulah chuan a lo ding a. Sipai hotute leh tawtawrâwtpute chuan an lo din hual a, mipuite chu hlim takin an au dur dur a, tawtawrâwtte an hâm a. Athali mangang chuan a puan a pawtthlêr a, “Min phiar ru a nih hi,” a ti a.

¹⁵Jehoiada chuan Tempul hung chhûnga Athali thah chu a remti lo va, sipai hotute hnênah, “Sipai intlar kârah hruai chhuak ula, rawn chhan tum apiang lo that zêl ang che u,” a ti a.

¹⁶Athali chu an man a, lal in lamah an hruai a. Sakawr kawngkhâr an tihah chuan an that ta a.

¹⁷Puithiam Jehoiada chuan lal Joasa leh mipui chu LALPA mi ni tûrin thu a tiamtîr a. Lal leh mipui inkârah pawh thuthlung a siam a.

¹⁸Mipuite chu Baal tempulah an kal a, an ṭhiat a, maichâmte chu an tichim a, milimte chu an vaw sawm vek a. Baal puithiam Matana chu a maichâm bulah chuan an that a. Puithiam Jehoiada chuan Tempul vêng tûr a dah a.

¹⁹Lal vêngtu Keret sipai za rual hotute, lal in vêngtu sipai hotute nên chuan Tempul aṭangin lal chu lal inah an hruai a, mipuiin an zui a. Vêngtu kawngkhârah Joasa chu a lût a, lalṭhutthlêngah chuan a ṭhu ta a.

²⁰Mipui chu an hlim êm êm a, Athali chu lal ina an thah tâk avângin khuaah buaina eng mah a awm lo.

²¹Joasa chu kum sarih mi a nihin Juda lalah a ṭang.