Read Mizo Lushai LEHKHABU PAHNIHNA LALTE 12 Bible Online

LEHKHABU PAHNIHNA LALTE 12 - Mizo Lushai bible

LEHKHABU PAHNIHNA LALTE 12

¹Israel rama Jehua kum sarih a lal kumin Joasa chu Judai ram lalah a ṭang a, Jerusalem khuaah kum sawmli a lal a. A nu chu Beer-seba mi Zibi a ni.

²Puithiam Jehoiada khân a kaihhruai ṭhin avângin a dam chhûngin LALPA lawmzâwng a ti ṭhîn.

³Mahse, hnam dang pathian biakna hmunsângte chu a tibo lo va, chûngah chuan miten thilhlan an la hlân zêl a ni.

⁴Jehoiada chuan puithiamte chu a ko khâwm a, Tempula thilhlan rualin miten thilpêk an rawn keng ṭhîn, a ṭhen chu thilhlan zînga pêk tel ngei tûra tihte a ni a, a ṭhen erawh chu mahni duh thu-a thilpêk a ni; chûng chu dah ṭha zêl tûrin a hrilh a.

⁵An rawng an bâwlsakten chutianga pawisa an rawn ken chu rawngbâwltu puithiam chuan a lo dawng ang a, Tempul siam ṭhat nân hman tûr a ni.

⁶Kum sawmhnih leh pathum chhûng Joasa a lal tawh hnu pawh chuan Tempul chu siam ṭhat a la ni ta lo va.

⁷Jehoiada leh puithiam dangte chu a ko va, “Engtizia nge Tempul in la siam ṭhat loh? Tûn aṭang chuan in pawisa dawn chu kawl tawh suh u, in dah khâwm ngei tûr a ni; tichuan, Tempul chu siam ṭhat a ni thei ang,” a ti a.

⁸Puithiamte chuan pawisa kawl loh chu an remti a, Tempul tlabal la siam rih loh pawh ṭha an ti a.

⁹Puithiam lalber Jehoiada chuan bâwm a siam a, a chhîn a tiâwng a; maichâm bulah, Tempul luh dâwn ding lamah a dah a. Tempul luhna bula puithiam an dah chuan Pathian hnêna petute thilpêk an rawn ken chu an lo dawng a, bâwmah chuan an thlâk zêl a.

¹⁰Bâwma tangka a awm tam deuh veleh lal lehkhaziaktu leh puithiam Jehoiada chu an lo kal a, tangka chu an rawh tui a, a bûk zât an chhinchhiah zêl a.

¹¹A zât chiah an chhinchhiah hnu chuan Tempul siam ṭhat hna enkawltute kutah an pe a, anni chuan hnathawktu mistirite hlawh an pe ṭhîn.

¹²Lungchher mite leh lungla mite chuan Tempul siam ṭhatna tûr thingte leh lungte an lei a, pawisa hman ṭûlna apiangah pawisa an pe chhuak a.

¹³Thawhlâwm pawisa chu tangkaraw no te, berhbu te, tawtawrâwt te, khâwnvâr enkawlna hmanrua te, tangkarua leh rangkachaka thil hrang hrang siam nân chuan an hmang hauh lo.

¹⁴Hnathawktute hlawhah leh hmanraw lei nân chauh hman a ni.

¹⁵Hnathawktute chu an rinawm êm êm a, an pawisa hman dân pawh enpui a ngai lo.

¹⁶Sual thawina leh bawhchhiat man thilhlan ruala an rawn pêkte erawh chu dah tel ve a ni lo, puithiamho chan a ni.

¹⁷Chutih hun lai chuan Suria lal Hazaela chuan Gath khua a bei a, a la a. Jerusalem beih zêl a rêl a.

¹⁸Juda lal Joasa chuan a hmaa lal Jehosafata te, Jehorama te leh Ahazia ten LALPA tâna an thilpêk dah khâwmte chu a la a, amah ngeiin a pêk pawh chu a belhchhah a; Tempul leh lal in sum bâwma rangkachak zawng zawng chu a vaiin lal Hazaela chu thilpêk atân a pe a, a sipaite chu Jerusalem ata a hruai kîr leh ta a.

¹⁹Lal Joasa thil tih dang zawng zawng chu Juda lalte chanchin ziakna bu-ah a chuang.

²⁰Joasa chu a hote pahnihin an phiar a, Beth-milo an tih Silo chhuknaah an that a.

²¹A thattute chu Simeata fapa Jozakara leh Somera fapa Jehozabada an ni. A thi a, Davida khawpuiah lal thlânah an phûm a. A fapa Amazia chu a lo lal ta a.