Read Mizo Lushai LEHKHABU PAHNIHNA LALTE 13 Bible Online

LEHKHABU PAHNIHNA LALTE 13 - Mizo Lushai bible

LEHKHABU PAHNIHNA LALTE 13

¹Ahazia fapa Joasa chu Judai rama kum sawmhnih leh pathum a lal kumin Jehua fapa Jehoahaza chu Israel ramah a lal ṭan a, Samaria khuaah kum sâwm leh pahnih a lal a.

²Lal Jeroboama, Nebata fapa ang bawkin LALPA laka thil sual a ti a. Israel-te a hruai sual a, a thil ṭha lo tihte chu a sim duh lo.

³Chuvângin, Israel-te chungah LALPA chu a thinur a, Suria lal Hazaela leh a fapa Ben-hadada chuan Israel chu an hneh leh ṭhin a phal a ni.

⁴Jehoahaza chu LALPA hnênah a ṭawngṭai a, Suria lalin Israel-te a tihhrehawmzia a hmuhin a ṭawngṭaina chu a rawn chhâng leh ṭhîn a.

⁵LALPA chuan Israel-te hnênah chhantu a tîr ṭhîn a. Suria-ho lakah chuan a chhan chhuak a, tûn hma angin thlamuang takin an awm leh ṭhîn.

⁶Nebata fapa Lal Jeroboama chhûngten Israel-te an hruai khawlohna sual kha an la sim chuang lo va, an ti lui zêl a, Aseri lim chu Samaria khuaah chuan a la awm ta reng tho mai.

⁷Jehoahaza chuan sipai tihtham a nei tawh lo, sakawr chungchuang mi sawmnga, tawlailîr sâwm leh kea kal sipai sîngkhat chauh a nei a ni. Suria lalin a thahsak zo va, kea vaivut chîl ang maiin a chîl darhsak a ni.

⁸Jehoahaza thil tih dang zawng zawng, a huaisenzia te chu Israel lalte chanchin ziakna bu-ah a chuang.

⁹A thi a, a fapa Joasa chu a lo lal ta a.

¹⁰Judai rama Joasa kum sawmthum leh pasarih a lal kumin Joasa chu Israel ramah a lal ṭan a. Samaria khuaah kum sâwm leh paruk a lal a.

¹¹Ani pawhin LALPA hmuha thil sual, Israel lal Nebata fapa Jeroboaman Israel-te a hruai khawlohna sual kha a bân bîk lo, a ti lui ve zêl a.

¹²Joasa thil tih dang, Juda lal Amazia nên an indova a huaisenzia thute chu Israel lalte chanchin ziakna bu-ah a chuang.

¹³Joasa chu a thi a, Samaria khuaah lal thlânah an phûm a. A fapa Jeroboama pahnihna chu a lo lal ta a.

¹⁴Zâwlnei Elisa chu a thihpui tûr natna tuarin a mu a, a thih dâwn hnaih chuan lal Joasa chuan a va tlawh a; “Ka pa, ka pa, Israel-te chhantu ropui,” tiin a ṭah ta a.

¹⁵Elisa chuan a hnênah, “Thalngul leh thal ṭhenkhat han la teh,” a ti a. Thalngul leh thal ṭhenkhat chu a rawn la a.

¹⁶Israel lal hnênah chuan, “Thalngul kha chelh teh,” a ti a, a chelh hnu chuan Elisa chuan lal kut chungah a kut a nghat a, “Khawchhak lam tukverh kha hawng teh,” a ti a, a han hawng a.

¹⁷“Thal kha kâp teh,” a ti a. A han kâp a, zâwlnei Elisa chuan, “Suria hnehna tûr LALPA thal i ni e, Suria-ho nên Afek-ah in inbei ang a, a hnehtu zâwk i ni ang,” a ti a.

¹⁸Elisa chuan lal hnênah, “Thal dang kha la leh teh,” a ti a, a han lâk chuan, “Lei kha chhun teh,” a ti a, vawi thum a han chhun a, a bâng ta a.

¹⁹Pathian mi chu a thinur a, “Vawi nga vawi ruk chhun la, Suria-ho chu an ral dêr thlengin i hneh tûr, vawi thum chauh in hneh dâwn a nih hi,” a ti a.

²⁰Elisa chu a thi a, an phûm ta a. Kum a lo thar apiangin Moab-hovin Israel ram an rawn rûn ṭhîn a.

²¹Mi pakhat hi a thi a, an phûm dâwn laiin Moab rual khat lo kal an hmu a, Elisa thlânah chuan an vawm lût rawk a, an tlân ta a. Chu mi ruang chuan Elisa ruh a deh veleh a lo nung leh a, a ding thei ta mai a.

²²Jehoahaza dam chhûng chu Suria lal Hazaela chuan Israel-te chu a tirethei hle a.

²³Mahse, LALPA chuan a khawngaih a, an chhiat ṭhak a phal lo va, Abrahama te, Isaka te leh Jakoba te hnêna a thuthlung avângin a lainat a, a ngaihsak leh ṭhîn, tûn thlengin a la thlauhthla lo va.

²⁴Suria lal Hazaela chu a thi a, a fapa Ben-hadada chu a lo lal ta a.

²⁵Jehoahaza fapa Joasa chuan Hazaela fapa Ben-hadada kut ata, a pa Jehoahaza khua an lâksakte chu a la kîr leh a, an indonaah vawi thum a hneh a, Israel ram khuate chu a chhuhsak leh ta a ni.