Read Mizo Lushai LEHKHABU PAHNIHNA LALTE 14 Bible Online

LEHKHABU PAHNIHNA LALTE 14 - Mizo Lushai bible

LEHKHABU PAHNIHNA LALTE 14

¹Jehoahaza fapa Joasa chu Israel lal a nih kum hnih kumin Joasa fapa Amazia chu,

²kum sawmhnih leh pangaa upa a nihin Judai ram lal a ni ṭan a, Jerusalem-ah kum sawmhnih leh pakua a lal a. A nu chu Jerusalem khaw mi Jehoadini a ni.

³LALPA hmuha thil ṭha a ti a, a pu lal Davida erawh chu a tluk lo, a pa Joasa tih ang a ti ve zêl mai.

⁴Hnam dang pathian an biakna hmunsângte chu a tichhe lo, mipuite chuan chûngah chuan thilhlan an hlân a, rimtuite an la hâl ta cheu a ni.

⁵Amazia chuan, a lal ngheh veleh, a pa thattute chu a that ve a.

⁶An fate erawh chu a that lo; Mosia Dân bu-a LALPA thupêk, ‘Fate chu an pate sual avânga tihhlum tûr an ni lo, pate pawh an fate sual avânga tihhlum tûr an ni lo; mi tin mahni sual avâng chauhva thi tûr an ni,’ a tih kha a zâwm a ni.

⁷Amazia chuan ‘Chi ruamah’ Edom mi singkhat a that a, Sela khua a bei a, a la a, a hmingah Joktheel a vuah a, tûn thlengin hmingah a la pu.

⁸Amazia chuan Jehoahaza fapa Joasa, Israel lal hnênah palai a tîr a, “Ti teh, pa leh pa i han inhmachhawn teh ang,” a ti a.

⁹Israel lal Joasa chuan Juda lal Amazia chu thu a thawn a, “Lebanon tlânga sidar thing hnênah Lebanon tlâng lênhlîng chuan, ‘I fanu ka fapa nupuiah min neihtîr rawh,’ a ti a. Ramsa tei mai mai hian lênhlîng chu a pal thlu ta mai a.

¹⁰‘Edom-ho ka zu hneh e’ i ti a, i inchhuang ta vei hle a ni maw: lungawi takin inah tawm hle hle tawh mai rawh. Nang leh Judai ram chhiatna tûr buaina chawk chhuak teh suh,” a ti a.

¹¹Amazia chuan a pawisa lo va, Israel lal Joasa chu a thawk chhuak a, Juda lal Amazia nên chuan Judai ram chhûng Beth-semes khuaah chuan ‘pa leh pa an inhmachhawn’ ta a.

¹²Juda-ho chan chu a chau ta zâwk a, mahni in lamah an tlân haw ta a.

¹³Israel lal Joasa chuan Juda lal Amazia chu Beth-semes-ah chuan a man a. Jerusalem-ah a chho va, kulh bang, Efraim kawngkhâr aṭanga kulh Kawina kawngkhâr thlengin, tawng zali zet chu a tichhia a.

¹⁴LALPA Tempul chhûng leh lal sum in aṭanga tangka leh rangkachak leh bungbêl awm zawng zawng chu a la a, a sal mante nên chuan Samaria khuaah a haw leh ta a.

¹⁵Joasa thil tih dang, a ropuizia te, Juda lal Amazia nêna an indo thu te Israel-te lal chanchin ziakna bu-ah a chuang.

¹⁶Joasa chu a thi a, Samaria khuaa lalho thlânah an phûm a. A fapa Jeroboama pahnihna chu a lo lal ta a.

¹⁷Israel lal Jehoahaza fapa Joasa thih hnuin Amazia chu kum sâwm leh panga a dam a.

¹⁸Amazia thil tih dangte chu Juda lal chanchin ziakna bu-ah a chuang a ni.

¹⁹Jerusalem-ah Amazia chu an phiar a, Lakis khuaah a tlân a; mahse, a hmêlmate chuan an ûm a, an that ta tho va.

²⁰A ruang chu Jerusalem-ah sakawrin an phur haw a; Davida khawpuiah, lal thlânah an phûm a.

²¹Judai ram mite chuan a fapa kum sâwm leh paruka upa Uzia chu a pa Amazia aiah lalah an siam a.

²²A pa thih hnu chuan Uzia chuan Elath khua chu Judai ramah a la kîr a, a din ṭha leh ta a.

²³Joasa fapa Amazia chu Juda lal kum sâwm leh panga a nih kumin Joasa fapa Jeroboama pahnihna chu Israel lal a ni ṭan a, Samaria khuaah kum sawmli leh pakhat a lal a.

²⁴LALPA hmuha thil sual chu a ti a, an pu Nebata fapa Jeroboama thil sual tih, Israel-te a hruai khawlohna sual chu a bân chuang lo.

²⁵Israel ram ni ṭhîn, Hamath kalkhân aṭanga Tuipui Thi inkâr ramte chu a la kîr a. Chu chu, a chhiahhlawh Gathhefer mi, Amitaia fapa zâwlnei kâa LALPA, Israel-te Pathianin a sawi kha a ni.

²⁶Israel-te tuar hrehawmzia chu LALPA chuan a hmu a, naupang pawh puitling pawh, tu mah tuar lo an awm lo va, ṭanpuitu rêng rêng an awm lo.

²⁷LALPA chuan Israel-te chu tihchhiat hlen dêr zawng a tum lo, chhantu atân Jeroboama pahnihna hi a rawn hmang a ni.

²⁸Jeroboama thil tih dang zawng zawng, indonaa a huaizia te, Damaska leh Hamath kalkhân Israel rama a lâk kîr thu te, Israel lalte chanchin ziakna bu-ah a chuang.

²⁹Jeroboama chu a thi a, Samaria khuaa lalho thlânah chuan an phûm a, a fapa Zekaria chu a lo lal ta a.