Read Mizo Lushai LEHKHABU PAHNIHNA LALTE 15 Bible Online

LEHKHABU PAHNIHNA LALTE 15 - Mizo Lushai bible

LEHKHABU PAHNIHNA LALTE 15

¹Jeroboama pahnihna chu Israel rama kum sawmhnih leh pasarih a lal kumin

²Amazia fapa Uzia chu kum sâwm leh paruk a ni a, Juda lalah a ṭang ṭan a, Jerusalem-ah kum sawmnga leh pahnih a lal a. A nu chu Jerusalem mi Jekoli a ni.

³A pa Amazia angin LALPA hmuha thil ṭha a ti ṭhîn a. Hnam dang pathian biakna hmunsângte erawh chu a tibo lo va, chûngah chuan miten thil an la hlânin rimtui an la hâl cheu a ni.

⁴Chuvângin, lal chu LALPA chuan a rawn khawih a, a dam chhûngin a phâr ta a, in hrangah a inkhung ta a.

⁵A fapa Jothama chuan lal chhûngkua chu a ho va, Judai ram chu a awpsak a.

⁶Uzia thiltih dangte chu Juda lalte chanchin ziakna bu-ah a chuang.

⁷Uzia chu a thi a, Davida khawpuia lal thlânah an phûm ve a, a fapa Jothama chu a lo lal ta a.

⁸Uzia chu Judai rama kum sawmthum leh pariat a lal kumin Jeroboama fapa Zekaria chu Israel ramah a lal ṭan a. Samaria khuaah thla ruk a lal a.

⁹A hmaa lal dangte ang bawkin LALPA hmuha thil sual chu a ti ve a, Nebata fapa Jeroboama thil sual tih, Israel-te a hruai khawlohna sual kha a bân chuang lo.

¹⁰Jabesa fapa Saluma chuan Zekaria chu a phiar a, Ibleam-ah a that a, a aiah a lal ta a.

¹¹Zekaria thil tih dangte chu Israel lalte chanchin ziakna bu-ah a chuang.

¹²Jehua hnêna LALPA thu sawi, “I thlah chhuan li thlengin Israel lal in ni ang,” a tih ang kha a ni ta a ni.

¹³Uzia chu Juda lal kum sawmthum leh pakua a nih kumin Jabesa fapa Saluma chu Israel lal a ni ṭan a. Samaria khuaah thla khat a lal a.

¹⁴Gadia fapa Menahema chu Tirza aṭangin Samaria khuaah a lo kal a. Saluma chu a that a, a lo lal ta a.

¹⁵Saluma thil tih dang zawng zawng chu Israel-te lal chanchin ziakna bu-ah a chuang.

¹⁶Tirza aṭanga Menahema a lo kal khân Tapua khua chu a hnêna an inpêk duh loh avângin a tichhe vek a, a chhûnga chêngte leh a vêl rama mite chu a that a, hmeichhe rai laite pawh an dul a pîrthlêrsak a.

¹⁷Uzia chu Juda lal kum sawmthum leh pakua a nih kumin Gadia fapa Menahema chu Israel ramah lal a ni ṭan a, Samaria khuaah kum sâwm a lal a.

¹⁸LALPA hmuha thil sual a ti a, Nebata fapa Jeroboama thil sual tih, Israel-te a hruai khawlohna sual kha a dam chhûng chuan a thlah lo.

¹⁹Lal Tiglat Pilesera chuan Israel ram a rawn rûn a, Menahema chuan tangkarua kg. sîngthum leh sângli a lo pe a, Israel rama nghet lehzuala lala ṭhu tûrin a puih duh a beisei a ni.

²⁰Menahema chuan Israel mi hausate tangka tlang sawmnga zêl a lâksak a, chu chu a pe a ni. Tichuan, Tiglat Pilesera chu an ram lamah a haw leh ta a.

²¹Menahema thiltih dang zawng zawng chu Israel lalte chanchin ziakna bu-ah a chuang.

²²A thi a, an phûm a, a fapa Pekahia chu a lo lal ta a.

²³Uzia chu Juda lal kum sawmnga a nih kumin Menahema fapa Pekahia chu Israel ramah lal a ni ṭan a, Samaria khuaah kum hnih a lal a.

²⁴LALPA hmuha thil sual a ti a, Nebata fapa Jeroboama thil sual tih, Israel-te a hruai khawlohna sual kha a thlah chuang lo.

²⁵A sipai hotu pakhat Remalia fapa Peka chuan Gilead khaw mi sawmnga nên an phiar a, Pekahia chu Samaria khaw kulhbîng Argob leh Aria bulah an that a, a aiah a lo lal ta a.

²⁶Pekahia thil tih zawng zawng chu Israel lalte chanchin ziakna bu-ah a chuang.

²⁷Uzia chu Juda lal kum sawmnga leh pahnih a nih kumin Remalia fapa Peka chu Israel ramah lal a ni ṭan a, Samaria khuaah kum sawmhnih a lal a.

²⁸LALPA hmuha thil sual a ti a, Nebata fapa Jeroboama thil sual tih, Israel-te a hruai khawlohna sual kha a thlah chuang lo.

²⁹Peka lal lai hian Asuria lal Tiglat Pilesera chuan Ijon te, Abel-beth-maaka te, Janoa te, Kades te leh Hazor khua te chu a la a, Gilead ram te, Galili ram te, Naftali ram te a la bawk a, mite chu Asuria ramah salah a hâwn a.

³⁰Uzia fapa Jothama chu Judai lal kum sawmhnih a nih kumin Ela fapa Hosea chuan Peka chu a phiar ru a, a bei a, a that a; a aiah a lo lal ta a.

³¹Peka thil tih dangte chu Israel lalte chanchin ziakna bu-ah a chuang.

³²Remalia fapa Peka chu Israel lal kum hnih a nih kumin Uzia fapa Jothama chu,

³³kum sawmhnih leh panga a ni a, Juda lal a ni ṭan a, Jerusalem-ah kum sâwm leh paruk a lal a, a nu chu Zadoka fanu Jerusi a ni.

³⁴A pa Uzia tih angin LALPA hmuha thil ṭha a ti a.

³⁵Hnam dang pathian biakna hmunsângte erawh chu a tiral lo; miten thil an hlân a, rimtui an hâl ta cheu a ni. Tempul hmâr lam kawngkhâr hi Jothama siam a ni.

³⁶Jothama thil tih dangte chu Juda lalte chanchin ziakna bu-ah a chuang.

³⁷A lal lai hian LALPA chuan Suria lal Rezina leh Israel lal Peka chu Judai ram bei tûrin a rawn tîr a ni.

³⁸Jothama chu a thi a, Davida khawpui lalho thlânah an phûm a, a fapa Ahaza chu a lo lal ta a.