Read Mizo Lushai LEHKHABU PAHNIHNA LALTE 16 Bible Online

LEHKHABU PAHNIHNA LALTE 16 - Mizo Lushai bible

LEHKHABU PAHNIHNA LALTE 16

¹Remalia fapa Peka chu Israel lal kum sâwm leh pasarih a nih kumin Jothama fapa Ahaza chu

²kum sawmhnih a nihin Judai ramah a lal ṭan a. Jerusalem-ah kum sâwm leh paruk a lal a. A pu Davida angin LALPA hmuha thil ṭha a ti ve lo; LALPA lâwm loh zâwng a ti thung a.

³Israel lalho tih dân ṭha lo a zâwm ve a ni. Ama fapa ngei pakhat pawh hâlral thilhlan atân a talh a, milem hmaah a hlân a; Israel-te hmaa LALPA hnawh chhuah hnam danghote thiltih tenawm tak tak tih an chînte kha tih a chîng ve ta a ni.

⁴Tlâng tinrênga hnam dang pathian biakna hmunsângah te, thingbuk ṭha hlim apiangah te thilhlante a hlân a, rimtuite a hâl ṭhîn.

⁵Suria lal Rezina leh Israel lal Peka chuan Jerusalem an bei a; mahse, an la thei lo.

⁶Hetih lai hian Suria lal Rezina chuan Elath khua a la leh a, Juda-ho va awmte chu a hnawt chhuak a, Edom-ho chu Elath khuaah chuan tûn thlengin an awm ta a ni.

⁷Ahaza chuan Asuria lal Tiglat Pilesera hnênah palai a tîr a, “I chhiahhlawh, i fa ka nih hi, Suria lal leh Israel lalin min bei a, an kut ata min rawn chhan chhuak ta che,” a ti a.

⁸Ahaza chuan LALPA Tempul leh lal sum dahna in ata tangka leh rangkachak awm chu Asuria lal biak tlawn nân a thawn a.

⁹Asuria lal chuan Ahaza ngen angin Damaska khua chu a sipaite nên a bei a, a la a, Rezina chu a that a, mite chu a khawpui Kir-ah salah a hâwn a.

¹⁰Asuria lal Tiglat Pilesera hmu tûrin Ahaza chu Damaska khuaah a kal a, Damaska khuaa maichâm chu a en a, puithiam Uria a ko va, maichâm an siam dân hmang chu chipchiar takin a entîr a.

¹¹Uria chuan Damaska khuaa mi ang chiah maichâm a siam a, Ahaza lo kîr hmain a siam zo va.

¹²Damaska khua aṭanga a lo hâwn chuan Ahaza chuan maichâm siam zawh tawh chu a rawn hmu a.

¹³Lal chuan hâlral thilhlan te, buhbâl thilhlan te a hlân a, uain thilhlan te a bun a, remna thilhlan thisen te chu maichâmah chuan a theh a.

¹⁴Dâr maichâm, LALPA hnêna hlan tawh chu maichâm thar leh Tempul inkâra awm a ni a, a la sawn a, maichâm thar hmâr lamah a dah sawn ta a.

¹⁵Uria hnênah, “Ka maichâm hi a lian zâwk a, zîng hâlral thilhlan leh tlai hâlral thilhlan hâl nân hmang la, lal leh mipui puala hâlral leh buhbâl thilhlante pawh hâl ṭhîn la, mipui uain thilhlante chu bun ṭhîn ang che. Hâl ral atân leh thil dang atâna ran hlan thisen chu he maichâmah hian theh ang che. Dâr maichâm erawh chu Pathian ka rawn biak nân khêk tlat ang che,” a ti a.

¹⁶Uria chuan lal thu ang chuan a ti a.

¹⁷Lal Ahaza chuan dâr nawrlirh chu a phelh darh a, tui bâwm chu a la thla a. Dâr tuizêm, bâwngpa sâwm leh pahnih chunga inhûng pawh kha a sawn a, lungrem chungah a hûng a.

¹⁸Asuria lal tlawn lungawi nân Ahaza chuan Tempul aṭangin lalṭhutthlêng hûnna tûr dawhkân pawh chu a la sawn a, Tempula lal luhna tûr bîka siam kawngka pawh a hnawh ta a.

¹⁹Lal Ahaza thiltih dang zawng zawng chu Juda lalte chanchin ziakna bu-ah a chuang.

²⁰Ahaza chu a thi a, Davida khawpuia lal thlânah an phûm a, a fapa Hezekia chu a lo lal ta a.