Read Mizo Lushai LEHKHABU PAHNIHNA LALTE 18 Bible Online

LEHKHABU PAHNIHNA LALTE 18 - Mizo Lushai bible

LEHKHABU PAHNIHNA LALTE 18

¹Ela fapa Hosea chu Israel lal kum thum a nih kumin Ahaza fapa Hezekia chu

²kum sawmhnih leh pangaa upa a nihin Juda lal a ni ṭan a, Jerusalem-ah kum sawmhnih leh pakua a lal a. A nu chu Zekaria fanu Abijai a ni.

³A pu Davida angin LALPA hmuha thil ṭha a ti a.

⁴Hnam dang pathian biakna hmunsângte a tichhia a, lungphunte a tibung a, pathiannu Aseri lim thing phunte chu a kit a. Mosia dâr rûl siam Nehustan an tih chu a chhu chhia a. Chumi hun thleng chuan Israel-ten dâr rûl lem tân rimtui an hâl ṭhîn.

⁵Hezekia chuan LALPA, Israel-te Pathian chu a ring a, Juda lal, amah ang hi an awm ngai lo, an awm leh tawh hek lo vang.

⁶LALPA chu a vuan tlat a, a thu a hnial ngai lo. Mosia hnêna Pathian thupêk kha ngun takin a zâwm ṭhîn.

⁷Chuvângin, LALPA chuan a awmpui a, a thiltih apiangah a hmuingîl zêl a ni. Asuria lakah a hel a, a thu a awih duh lo.

⁸Filistia mite a sawisa ṭhîn, an awmna apiang a rûn a; khaw tê ber pawh, khaw lian ber pawh Gaza leh a chhehvêl ramte pawh a hrût ṭhîn.

⁹Hezekia kum li a lal kum chuan Hosea chu Israel lal kum sarih a ni hman tawh a, Asuria lal Salmanesera chuan Israel ram a rawn rûn a; Samaria khua chu a hual a.

¹⁰An hual kum thum kum, Hezekia lal kum ruk kum chuan an la ta a, chu chu Hosea lal kum kuana a ni.

¹¹Asuria lal chuan Israel-te chu salah a man a, Asuria ramah a hruai a, a ṭhen erawh chu Gozan bial Habor lui kamah te, Media khuaah te a awmtîr a.

¹²Israel-ten an Pathian LALPA thu an awih loh avângin Samaria khua chu an la a ni, thuthlung a siamte kha an bawhchhia a, LALPA chhiahhlawh Mosia dân pakhat mah an zâwm duh hek lo. An ngaithla duh lo va, an pawm duh lo va.

¹³Hezekia kum sâwm leh pali a lal kumin Asuria lal Senakeriba chuan Judai rama kulh nei khuate chu a bei a, a la ta hlawm a.

¹⁴Lakis khuaa Senakeriba awm chu Hezekia chuan, “Thil ka lo tidik lo a ni; min kîrsan la, i phût ang ang ka pe ang che,” tiin thu a thawn a. Asuria lal chuan tangkarua kg. sîngkhat leh rangkachak kg. sângkhat a lo phût a.

¹⁵Tempul leh lal sum bâwma tangka awm zawng zawng chu a thawn a,

¹⁶Tempul kawngkhâra rangkachak belte chu a khawk a, amah ngeiin kawngka biang a tuamna rangkachak pawh chu a khawk a, Senakeriba chu a thawn a.

¹⁷Asuria lal chuan Lakis aṭangin Jerusalem-a Hezekia chu bei tûrin sipai tam tak a tîr a, a sipai hotu lian lian pathum-Tartana te, Rab-Saria te leh Rab-Sakea te chuan an ho va. Jerusalem an han thlen chuan dîl chhakta zâwk aṭanga tuikawng kam, puansutu hmun panna kawngah chuan an awm a.

¹⁸Lal chu an au va, lal in enkawltu Hilkia fapa Eliakima te, lehkhaziaktu Sibna te, Asafa fapa, thil chhinchhiahtu Joa te chu an lo chhuak a.

¹⁹Rab-Sakea chuan an hnênah, “Hezekia hi han hrilh rawh u, lal ropui Asuria lal chuan heti hian a ti: ‘Tu nge maw rinchhan i neiha, heti taka i inchhutngên le!

²⁰Hmui themthiam ringawtin sipai chakna leh indo thiamna i ngam thei dâwn em ni? Asuria lal laka i hel vei hi tu nge rawn pui dâwn che?

²¹Aigupta-in a rawn pui ang che maw? Luang tiang hawl ang lek a ni asin, a tliak ang a, i kut a chhun mai ang. Aigupta lal Farawa chu amah rinchhantute tân chutiang lek chu a ni asin.

²²“In Pathian LALPA chu kan rinchhan a ni in ti elo? Juda mite leh Jerusalem mite chu ‘Jerusalem-ah chauh LALPA chu biak tûr a ni’ in ti vei a, hmun danga LALPA maichâm leh a biakna hmun tichhetu kha Hezekia hi a nih kha.

²³Tichuan, ka pu, Asuria lal nên inremsiam mai rawh u; a chuang tûr mihring i hmuh zawh dâwn phei chuan sakawr sânghnih ka pe nghâl mai ang che.

²⁴Asuria sipai hotu neu ber pawh in tluk si lo va, sakawr-tawlailîr te, sakawr chungchuang te Aigupta chuan a rawn thawn tehlul ang che maw?

²⁵In ram ka rawn bei a, ka rawn la hi LALPA thu a ni lâwm ni? Amah LALPA ngei chuan, ‘Han bei la, la vek rawh,’ min ti a ni,” a ti a.

²⁶Eliakima te, Sebna te leh Joa te chuan, “Suria ṭawngin thu sawi rawh, kan hre thei e; Juda ṭawng chu hmang suh, kulh banga ṭhute hian an ngaithla ṭhup a ni,” an ti a.

²⁷Ani chuan, “Asuria lal hian nangni leh in lal Hezekia hnênah chauh thu sawi tûrin mi tîr em ni? Ni suh e; mipui, tûna kulh banga ṭhu, nangmahni ang bawka mahni zun leh êk eia in tûrte hnênah pawh thu ka sawi a nih hi,” a ti a.

²⁸Tin, Rab-Sakea chu a ding a, Juda ṭawngin a au va, “Lal ropui Asuria thu hi ngaithla teh u:

²⁹‘Hezekia chuan bum che u suh se, ka lakah a hum thei chuang lo vang che u,’ lal chuan a ti e.

³⁰‘LALPA chuan min chhan dâwn alâwm, Asuria lal chuan he khua hi a la lo vang’ tiin LALPA ring tûrin bum che u suh se.

³¹Hezekia thu ngaichâng duh suh u, Asuria lal chuan, ‘Inremsiam ang u, lo chhuak ula, ka lo kal leh hma chu mahni grep rah in ei ang a, mahni theipui rah in tlân ang a, mahni tuizêm tui in in ṭheuh dâwn nia,’ a ti a.

³²Lal chuan in ram anga ram ṭhaah, grep huan ṭha tak tak, uain tamna ramah a la awmtîr ang che u a, chhangphut tûr buh ṭhat duhna ram, oliv kûng te, a hriak te, khawizu tamna ramah chuan a awmtîr ang che u. A thu in awih chuan nungdamin in chhuak ang, in thi lo vang. ‘LALPA chuan min chhan chhuak ngei dâwn e,’ tiin Hezekia chuan bum che u suh se,

³³Hnam dang pathiante zingah Asuria lal laka chhanhim thei an awm em ni?

³⁴Hamath leh Arpad pathiante kha khaw nge an awm tâk? Sefarvaim pathian te, Hena leh Iva pathiante kha khaw nge an awm tâk? Samaria khua chhan thei an awm em ni?

³⁵Hêng ram zawng zawng pathiante hian engtikah khân nge an ram chu an chhan ngai? LALPA pawhin Jerusalem khua hi a chhan thei bîk dâwn em ni?” a ti a.

³⁶Lalin, “Tu man chhâng suh u,” a tih avângin an ngawi ṭhuap a, kam khat mahin an chhâng lo.

³⁷Lal chhûngkaw enkawltu Hilkia fapa Eliakima te, ziaktu Sebna te, thil chhinchhiahtu Asafa fapa Joa te chuan an puan an pawtthlêr a, an lo kal a, Rab-Sakea thu chu Hezekia an hrilh a.