Read Mizo Lushai LEHKHABU PAHNIHNA LALTE 19 Bible Online

LEHKHABU PAHNIHNA LALTE 19 - Mizo Lushai bible

LEHKHABU PAHNIHNA LALTE 19

¹Lal Hezekia chuan chûng thu chu a hriatin a puan a pawtthlêr a, saiip puan a sin a, LALPA Tempulah a lût ta a.

²Lal chhûngkaw enkawltu Eliakima te, ziaktu Sebna te leh puithiam zînga upate chu saiip puan sinin zâwlnei Isaia hnênah a tîr a.

³“Lal Hezekia chuan heti hian a ti: ‘Vawiin hian kan tân manganna ni a lo thleng ta; min hmuhsit a, min diriam tâk êm hi! Nau hrin hun tawh a nu chau lutuk tawh si ang mai kan nih hi.

⁴Pathian nung sâwt tûra Asuria lal mi tirh, Rab-Sakea thu sawi kha, LALPA, i Pathian chuan a lo hre châwk ang a; LALPA, i Pathian chuan hriain hrem teh se. Kan mi la dam chhunte tân nang ṭawngṭai rawh khai,’ a ti e,” an va ti a.

⁵Lal Hezekia mi tirhte chu Isaia hnên an va thleng a,

⁶Isaia chuan an hnênah, “LALPA chuan heti hian a ti: ‘Asuria lal chhiahhlawhten min diriam dân thu i hriat kha hlau suh.

⁷Ngai teh, a rilru ka tizâm ang a, thuthang ka hriattîr ang; a ramah a kîr ang a, a ram ngeiah khandaihin an sât hlum ang,’ tiin in pu hnênah sawi rawh u,” a ti a.

⁸Rab-Sakea chu a ṭîn a, Lakis aṭangin Asuria lal chu a insawn a, Libna khua a bei tih a hriatin chu lam chu a pan a, a va hmu a.

⁹Ethiopia lal Tirhaka chanchin Asuria lal chu an hrilh a; amah bei tûrin a lo thawk tih a hriatin Hezekia hnênah zualko a tîr a, lehkha a thawn a.

¹⁰Judai ram lal Hezekia hnênah, “I rinchhan in Pathian chuan, ‘Asuria lal kutah Jerusalem chu a pe lo vang,’ tiin bum che u suh se.

¹¹Asuria lalten an ram luah dang zawng zawnga an thiltih, an ram an tihchhiat vek dânte i hria a. Nang tehlul hi i him bîk dâwn em ni?

¹²‘Ka paten an tihchhiat hnam Gozan te, Haran te, Rezep te leh Telasar-a awm Edom-ho te kha an pathianten an chhan thei em ni?

¹³Khawiah nge Hamath lal te, Arpad lal te, Sefarvaim-a khaw awm lal te, Hena lal te, Iva lal te kha an awm tâk?’ va ti rawh u,” a ti a.

¹⁴Zualko lehkha rawn ken chu Hezekia chuan a hmuhin a han chhiar a, LALPA Tempulah a chho va, LALPA hmaah chuan a pharh a.

¹⁵Hezekia chu LALPA hnênah a ṭawngṭai a, “Aw LALPA, Israel-te Pathian, Cherub chunga ṭhu, nang chauh hi Pathian chu i ni, ram luah zawng zawng rorêltu i ni a, lei leh vân pawh hi i siam a ni.

¹⁶Aw LALPA, i beng lo chhi la, ngaithla teh. Aw LALPA, meng la, han en teh; Pathian nung sâwt tûra Senakeriban thu a rawn sawi zawng zawng hi ngaithla teh.

¹⁷Aw LALPA, Asuria lalte hian hnam tin an bei a, an ramte an tihchhiat tâk hi.

¹⁸An pathiante chu meiah an rawhsak a, chu chu Pathian an ni lo rêng a, mihring kuta siam thing leh lung mai mai an ni a, chhe ngei tûr phei zawng an ni.

¹⁹Aw LALPA, tûnah a kut aṭang hian min chhan chhuak la; tichuan, khawvêl ram luah zawng zawnga miten nang chauh hi Pathian, LALPA chu i ni tih an hre dâwn nia,” a ti a.

²⁰Amoza fapa Isaia chuan Hezekia hnênah mi a tîr a: “A hnêna i ṭawngṭaina chungchâng leh Asuria lal Senakeriba chungchânga

²¹Israel-te Pathian, LALPA thu sawi chu hei hi a ni: ‘Zion fanuin a hmusit che a, a nuihzat che. Jerusalem fanuin I tlânchhia chu lu a thinkhum che.

²²Tu nge i nuihzata, i sâwt le? Tu lakah nge i râwl i rin? Tu lakah nge i hawi chapo hle le? Israel Mi Thianghlima lakah a ni.

²³I chhiahhlawhte hmangin LALPA i sâwt vei a, ‘Tawlailîr tam tak nên tlâng sâng sângah ka lâwn a, Lebanon tlâng kil tin ka fang; Sidar thing sâng ka kit a, Fâr thing ṭha ṭha ka kit asin. A tlâng sâng lai ngaw rilte pawh ka fang vek a.

²⁴Tuite ka chhun chhuak a, ka in bawk a, Aigupta luite ka kephahin ka dai kang vek a ni,’ i ti vei a.

²⁵Hmân aṭanga tih ka tum tawh a ni, I hre na nge? Tûna thil lo thleng hi hmâna ka rêl daih tawh a ni. Kulh nei khuate i tihchhiata,

²⁶A chhûnga chêng an zâmzia te leh thlabâr taka an mualpho te, Phûl leh muala hlobet, In chung zâwla hnim ṭiak tîr te, Thli lum chhêm vuai tâk te, Ka rêl lâwk vek a ni.

²⁷Ka chunga i ânhla te, I ṭhut, i luh leh chhuahte ka hria asin.

²⁸Ka chungah hian i âng vei a, I chapozia ka beng a lo thleng ta, I hnârah chuan hnâr kawl ka vuah ang a, Lakam ka barh ang che a, I lo kalna lamah ka hnûk kîr leh ang che,” tiin.

²⁹Lal Hezekia hnênah, “Hei hi i tân chhinchhiahna a ni ang. Kuminah buh hli in ring ang a, nakkumah pawh chumi hli chu in ring leh ang. A kum thumnaah chuan thlai chîng ula, a rah in seng dâwn nia. Grep phun ula, a rah in ei bawk ang,

³⁰Judai rama la dam chhunte chu theikûng, thûk taka zung thlâk, rah tup ang hi an la ni ang.

³¹Jerusalem aṭangin dam chhuak tûr an awm a, Zion tlângah thi bâng an awm ngei dâwn a ni. LALPA ṭhahnemngaihna chuan chu chu a ti ngei ang.

³²Chuvângin, Asuria lal chungchâng chu LALPA chuan heti hian a ti: ‘He khawpuiah hian a lût lo vang a, thal khat pawh a thlah lo vang, phaw nên a rawn bei lo vang a, lei kulh a lai hek lo vang.

³³A lo kalna kawngah ngei a haw leh ang, khuaah a lo lût tawp lo vang.’

³⁴He khua hi keimah avâng leh ka chhiahhlawh Davida avângin ka vêng ang a, ka hum dâwn a ni,” a ti a.

³⁵Chumi zân chuan LALPA tirhkoh chu Asuria-ho bûkah chuan a kal a, mi nuaikhat leh sîngriat leh sangnga a that a, zînga an han thawh chuan mitthi ruang hlîr a lo thal phung a.

³⁶Asuria lal Senakeriba chu a ṭîn a, a haw a, Ninevi khuaah a awm ta a.

³⁷Nisroka tempula a pathian biaa a kûn lai chu a fa Andrameleka leh Sarezera te chuan khandaihin an sât hlum a, Ararat ramah an tlân ta a. A fapa Esarhadona chu a lo lal ta a.