Read Mizo Lushai LEHKHABU PAHNIHNA LALTE 20 Bible Online

LEHKHABU PAHNIHNA LALTE 20 - Mizo Lushai bible

LEHKHABU PAHNIHNA LALTE 20

¹Chûng lai chuan lal Hezekia chu thih ngamin a na a. Amoza fapa Isaian a rawn tlawh a, a hnênah, “LALPA chuan heti hian a ti: ‘I chhûngkaw thu rêl fel rawh, i thi dâwn si a, i dam chhuak dâwn lo ve,’ a ti,” a rawn ti a.

²Hezekia chuan bang lam a hawi a, a ṭawngṭai a,

³“Aw LALPA, i hmaah dik takin ka awm ṭhîn a, thinlung thianghlim puin i mit hmuha thil ṭha ka tih ṭhin kha khawngaih takin hre reng ang che,” a ti a, a ṭap ta zawih zawih a.

⁴Isaia chu a haw a, lal in tual chu a pelh hmain LALPA mite chunga rorêltu Hezekia hnênah chuan LALPA chuan

⁵a tîr kîr a, “‘Kei LALPA, i pu Davida Pathian hian i ṭawngṭaina ka lo hria a, i mittui pawh ka hmu. Ka tidam ang che, a ni thum ni chuan Tempulah i kal thei ang.

⁶Kum sâwm leh pangain i dam chhûng hun ka pawtsei bawk ang. Asuria lal lakah nang leh he khua hi keimah avâng leh ka chhiahhlawh Davida avângin ka humhim dâwn a ni, a ti,’ va ti rawh,” a ti a.

⁷Isaia chuan, “Theipui rah hmin hlâwm han la teh u,” a ti a. Theipui rah hlâwm chu a khawihliah chuan an belsak a, a lo dam ta a.

⁸Lal Hezekia chuan, “LALPA chuan min tidam ang a, ni thum ni chuan Tempulah ka kal thei ang tih engtin nge ka hriat ang?” a ti a.

⁹Isaian, “LALPA chuan a tidam dâwn che tih hriatna tûr chhinchhiahna a entîr ang che. I rahkaa hlim saw, rahka sâwm kîr nge i duh rahka sâwm kal belh se, i duh zâwk thlang rawh,” a ti a.

¹⁰Hezekia chuan, “Rahka sâwm kaltîr chu a awl em mai, rahka sâwm kîr rawh se,” a ti a.

¹¹Isaia chu a ṭawngṭai a, lal Ahaza rahka siama hlim chu LALPA chuan rahka sâwm a tikîr a.

¹²Chumi lai chuan Babulon lal Baladana fapa Merodak-baladana chuan Hezekia chu a dam leh tih a hriatin thilpêk leh lehkha a rawn thawn a.

¹³Hezekia chuan anni chu a lo lâwm hle a, a sum dahna in te a entîr a, a tangkarua leh a rangkachak te, a mosola leh a thil rimtui te, a râlthuam dahkhâwmna in leh a ram chhûng hmun hrang hranga a ro dahte chu entîr loh rêng rêng a nei lo.

¹⁴Zâwlnei Isaia chu Hezekia hnênah a lo kal a, “Hêng mite hi khawi aṭanga lo kal nge an niha, eng nge an rawn sawi?” a ti a. Hezekia chuan, “Ram hla tak, Babulon aṭanga lo kal an nih hi,” a ti a.

¹⁵Isaia chuan, “Lal ina thil eng eng nge an hmuh?” a ti a. Lal chuan, “Engkim an hmu vek, thil dahnaa kan dah entîr loh rêng ka nei lo,” a ti a.

¹⁶Lal hnênah Isaia chuan, “LALPA thu hi ngaithla teh,

¹⁷‘Ngai teh, i ina thil awm zawng zawng, i paten vawiin thlenga an dah khâwmte nên, Babulon-a an lâk vek hun a lo thleng lawk dâwn, eng mah hnutchhiah an nei lo vang,’ LALPA chuan a ti e.

¹⁸Nangma hrin ngei, i fapate chu an man ang a, an til an rehsak ang a, Babulon lal rawng an bâwl ang,” a ti a.

¹⁹Lal Hezekia chuan a dam chhûng chu muang takin an awm ang a, an him dâwn tihna niin a ngai a, “LALPA thu i rawn thlen chu a ṭha alâwm,” a ti a.

²⁰Lal Hezekia thil tih dang zawng zawng, a huaizia te, tui khuapin tui kawng a kera khuaa tui a lâk luh thu te, Juda lalte chanchin ziakna bu-ah a chuang vek a ni.

²¹Hezekia chu a thi a, a fapa Manasea chu a lo lal ta a.