Read Mizo Lushai LEHKHABU PAHNIHNA LALTE 21 Bible Online

LEHKHABU PAHNIHNA LALTE 21 - Mizo Lushai bible

LEHKHABU PAHNIHNA LALTE 21

¹Kum sâwm leh pahnih a nihin Manasea chu Juda lalah a ṭang ṭan a, Jerusalem-ah kum sawmnga leh panga a lal a. A nu chu Hefzibi a ni.

²A mite hmaa LALPA hnawh chhuah hnamte tih dân tenawm tak tak chu Manasea chuan a ti ve a, LALPA lakah thil sual a ti a.

³A pa Hezekia tihchhiat, hnam dang pathian biakna hmunsângte chu a din ṭha leh a, Baal tân maichâm a siam a, Israel lal Ahaba ang khân Aseri limte a phun a, vâna arsite pawh a bia a.

⁴‘Jerusalem khua hi min biakna hmun tûr chu a ni,’ tiin LALPA chuan a hmun hi a thlang a; chuta LALPA Tempulah chuan maichâm chi tinrêng a dah a.

⁵Tempul chhûng pindan pahnihah chuan vâna arsi rual tân te maichâm a dah thluah a.

⁶A fapa pakhat chu hâlral thilhlanah a hlân a. Aien te, ṭhumvâwrte a chîng a, ramhuaizâwl leh mitthi thlûk thiamte a ruai ṭhîn. LALPA hmuha thil sual nasa tak a ti a, a tithinur a ni.

⁷Davida leh a fapa Solomona hnênah LALPA chuan, ‘He Jerusalem khuaa Tempul hmun hi Israel hnam sâwm leh pahnih ram zawng zawng zîngah min biakna hmun tûra ka thlan a ni,’ a tih, Tempul chhûngah khân Aseri lim thing a phun a.

⁸‘Israel mite chuan ka thupêk zawng zawng an awiha, ka dân, Mosia hrilh kha an zawm vek chuan an thlahte hi ram ka pêk ata chu ka hnawt chhuak lo vang,’ a ti bawk a.

⁹Judai rama mite chuan LALPA thu chu an awih lo va, an hmaa LALPA hnawh chhuah hnamte tih ṭhin aia sual zâwk ti tûrin Manasea chuan a hruai a ni.

¹⁰ LALPA chuan a chhiahhlawh a zâwlneite hmangin hetiang hian a sawi:

¹¹“Manasea chuan thil tenawm tak tak, he rama an awm hmaa awm Kanan mite tih aia tenawm zâwk a ti ṭhîn, a milem siam chawpin Juda-te chu a hruai sual a ni.

¹²Tichuan, Kei, LALPA, Israel-te Pathian hian, a hria apiangin mak an tih êm êm tûr Jerusalem leh Judai ramah chhiatna ka thlentîr ang.

¹³Samaria khua leh Israel lal Ahaba leh a thlahte ka sawisa ang khân Jerusalem pawh ka sawisa ang. Thlêng hrûk fai an khup ang hian Jerusalem pawh a chhûnga awmte chu ka hru fai ang.

¹⁴Ka mi, la thi bângte pawh chu ka hnâwl ang a, an hmêlmate kutah ka pe ang a, chûng chuan an duh duhin an rawk ang a, an sawisa ang.

¹⁵An thlahtute Aigupta ram aṭanga an lo chhuah aṭang tawh khân tûn thlengin, ‘hei chu thil sual a ni’ ka tih chu an ti ṭhîn a, min tihthinur avângin chutiang chuan ka mite chu ka sawisa dâwn a ni,” a ti a.

¹⁶Manasea chuan pawi khawih lo a that tam khawp a, Jerusalem khaw laiah thisen a luang zuih ṭhîn; Juda mipuite chu milem biak a chîntîr a, LALPA lakah thil sual an tih phah ta a.

¹⁷Manasea thil tih dang, thil sual a tihte chu Juda lalte chanchin ziakna bu-ah a chuang.

¹⁸Manasea chu a thi a, lal huan, lal Uzia huanah an phûm a, a fapa Amona chu a lo lal ta a.

¹⁹Amona chu kum sawmhnih leh pahniha upa a nihin Juda lalah a ṭang ṭan a, Jerusalem-ah kum hnih a lal a. A nu chu Jotba khaw mi Haruza fanu Mesulemeti a ni.

²⁰A pa Manasea angin LALPA hmuha thil sual a ti a.

²¹A pa tih dân a la a, a pa biak ṭhîn milemte kha a be ve zêl a.

²²An thlahtute Pathian, LALPA chu a hnâwl a, LALPA thupêkte chu a awih duh lo.

²³A hote zînga miin an phiar ru a, lal in chhûngah an that a.

²⁴Juda-ho chuan Amona fapa Josia chu lalah an siam a.

²⁵Amona thil tih dangte chu Juda lalte chanchin ziakna bu-ah a chuang.

²⁶Amona chu Uzia huana thlânah chuan an phûm a, a fapa Josia chu a lo lal ta a.