Read Mizo Lushai LEHKHABU PAHNIHNA LALTE 22 Bible Online

LEHKHABU PAHNIHNA LALTE 22 - Mizo Lushai bible

LEHKHABU PAHNIHNA LALTE 22

¹Josia chu kum riat a nihin Juda lal a ni ṭan a, Jerusalemah kum sawmthum leh pakhat a lal a. A nu chu Bozkat khaw mi Adaia fanu Jedidi a ni.

²Josia chuan LALPA lawmzâwng a ti a, a pu lal Davida awm dân a la a, Pathian dânte chu uluk takin a zâwm thlap ṭhîn.

³Kum sâwm leh pariat a lal kumin Josia chuan ziaktu Safana, Azalia fapa, Mesulama tupa chu LALPA Tempulah a tîr a,

⁴“Puithiam lalber Hilkia hnênah kal la, Tempul kawngkhâra mipui thawhlâwm puithiamhovin an dawn kha eng zât nge tling tawh va zâwt teh.

⁵Tempul siam ṭha tûra mi ruatte kutah pe sela, anni chuan,

⁶mistiri te, in satu te leh lung chher mi te pe rawh se; Tempul siam ṭhatna tûr thing te, lung te lei teh se.

⁷Hêng kan mi ruatte hi mi rinawm tak tak an ni, en zuipui an ngai lo vang,” a ti a.

⁸Puithiam lalber Hilkia chuan ziaktu Safana hnênah, “Tempulah dân bu ka chhar e, hei,” a ti a, a pe a. Safana chuan a han chhiar a,

⁹Lal hnênah a lo kîr leh a, “I chhiahhlawhte chuan in chhûnga tangka an hmuhte chu an phawrh a, LALPA Tempul siam ṭha tûra mi ruatte kutah an pe tawh e,” a ti a.

¹⁰Lal hnênah chuan, “Puithiam Hilkia chuan hei lehkhabu hi mi lo pe asin,” a ti a, lal hriat tûr chuan Safana chuan a chhiar ta a.

¹¹Lalin Dân lehkhabua thu chu a han hriat chuan a puan a pawtthlêr a.

¹²Puithiam Hilkia te, Safana fapa Ahikama te, Mikaia fapa Akbora te, ziaktu Safana te, lal in enkawltu Asaia te hnênah lal chuan,

¹³“Kal ta ula, mipui leh Judai ram mi zawng zawng tân he Dân bu chhara zirtîrna chungchâng hi LALPA min va râwnsak teh u. Kan pute chuan heta thu chuangte hi an ngaihsak lo va, tih tûrte hi an tih loh avângin LALPA chu a thinur a ni,” a ti a.

¹⁴Puithiam Hilkia te, Ahikama te, Akbora te, Safana te, Asaia te chu zâwlneinu, Mika fapa Saluma nupui Huldaii hnênah an kal a. A pasal Saluma hi Tikva fapa a ni, lal thawmhnaw enkawltu a ni a, Harhasa tupa a ni, Jerusalem vêng thara awm an ni.

¹⁵An hnênah chuan, “Israel-te Pathian, LALPA chuan, ‘A rawn tîrtu che u chu hrilh rawh u.

¹⁶Juda lalin a chhiar lehkhabua thu chuang ang khân Jerusalem leh a chhûnga chêngte chu ka sawisa dâwn.

¹⁷Min hawisan a, pathian dang hnênah thilhlan an hlân a, an thiltihte chuan min tithinur a ni. Jerusalem chungah ka thinur a alh ang a, a mit mai mai lo vang,’ a ti.

¹⁸LALPA râwn tûra rawn tîrtu che u lal hnênah chuan sawi rawh u, Israel-te Pathian, LALPA chuan, ‘Lehkhabua thu chuang chu i ngaihven a,

¹⁹Jerusalem leh a chhûnga chêngte ka sawisak dân tûr i hriatin pawi i ti a, LALPA hmaah i inphahhniam a, puan pawtthlêrin i ṭap a. Hmuh râpthlâk khawp leh ânchhia inlawhna hiala hman tûrin khawpui chu ka sawisa dâwn a ni; mahse, i ṭawngṭaina chu ka lo hria a.

²⁰I thih hma chuan Jerusalem chu ka tichhe lo vang; nang zawng thlamuang takin i thi ang,’ a ti e,” a ti a. Chu thu chu lal hnênah an rawn thlen leh a.