Read Mizo Lushai LEHKHABU PAHNIHNA LALTE 23 Bible Online

LEHKHABU PAHNIHNA LALTE 23 - Mizo Lushai bible

LEHKHABU PAHNIHNA LALTE 23

¹Lal chuan Judai ram leh Jerusalem-a upate chu a ko khâwm a.

²Judai ram leh Jerusalem-a awm puithiam leh zâwlnei te, mipui, mi rethei leh hausate nên, an za chuan tempulah an lo kal a, Tempula an chhar Thuthlung bu chu an hriatah lal chuan a chhiar a.

³Dinna tûra an siamah chuan lal chu a ding a, LALPA hnung zuia a thupêkte zâwma, a thuruatte leh a thupêkte chu ti tûrin LALPA hmaah thu a tiam a. Rilru tak tak leh tihtakzetin thuthlung thu lehkhabua chuangte chu pawm tlat a tiam a. Mipui zawng zawng pawh chuan dingin thuthlung chu pawm an tiam ve a.

⁴Lal chuan puithiam lalber Hilkia te, a dawttu puithiamte leh kawngkhâr vêngtute chu LALPA Tempul chhûnga Baal te, Aseri te leh vân arsi an biakna thil hman zawng zawng chu a lâk chhuahtîr a, Jerusalem dai Kidron luiruamah chuan a hâl a, a vâp chu Bethel-ah a kentîr a.

⁵Judai khawpuiah te, Jerusalem kiang vêla hnam dang pathian biakna hmunsânga thil hlântu atâna Juda lalten puithiam an lo dah, Baal hnênah te, ni leh thla hnênah te, arsi leh vâna thil awm hnênah te thil hlân ṭhîntu zawng zawng chu a bân a.

⁶LALPA Tempul chhûnga pathiannu Aseri lim an phunte chu a la chhuak a, Jerusalem daiah Kidron ruamah chuan a hâl a, a vâp chu a râwt sawm a, vântlâng thlânmualah chuan a theh darh a.

⁷Tempula nawhchizuarho awmna, Aseri biakna tûr, nu hovin puan an tahna hmun chu a ṭhiat bawk a.

⁸Judai ram khawpui hrang hranga Geba leh Beer-seba inkâra awm puithiamte chu a hruai khâwm a, hnam dang pathian hnêna thil an hlanna ṭhin hmunsângte chu a tihbawlhhlawhsak a. Khawpui luhna kawngkhâr vei lam, khawpui awptu Josua siam kawngkhâr bula maichâm, kêlhuai lim an biaknate chu a ṭhiat a.

⁹Chûnga puithiama ṭang ṭhînte chu Tempula rawng an bâwl an phal lo, an puithiamte puala dah chhang dawidim telh loh erawh chu an ei ve thei.

¹⁰Moleka hnênah hâlral thilhlana pêk atân an fanu te, an fapa te an hlan tawh loh nân Hinom ruama Tofet chu a sawisa nek a.

¹¹Juda lalten ni hnêna hlan tûr sakawr an pêkte chu Tempul tual kawngka bul, sawrkâr milian tak Nathan-meleka chênna in aṭanga hnai têah an dah ṭhîn, chûng chu a dah bo va, ni pathian an hnuh ṭhinna tawlailîrte chu a hâl a.

¹²Lal inahte leh Ahaza in chung chhâwng zâwla an maichâm te, Tempul pindan pahnihna Manasean maichâm a siam belhte nên chuan a ṭhiat a, a chhu chhe vek a, Kidron ruamah a paih a.

¹³Jerusalem khawchhak lam Oliv tlâng chhim lama Sidon pathian tenawm Astarte lim te, Moab pathian tenawm Khemosa te, Amon-ho pathian ngeiawm tak Milkoma lim an biakna tûr hmunsâng, Israel lal Solomona siamte kha a tibawlhhlawh zo vek a.

¹⁴Josia chuan lungphunte chu a chhu sawm a, pathiannu Aseri lim, an thingtum phunte chu a kit a; chûng awmna hmunah chuan mihring ruh a dah phung a.

¹⁵Israel hruai khawlotu Nebata fapa Jeroboaman Bethel khuaa pathian biakna tûra maichâm a siamte pawh Josia chuan a ṭhiat a, a lungte chu a tikeh a, a chhu dip vek a. Aseri limte pawh chu a hâl a.

¹⁶Josia chu a han hawi vêl a, mualah chuan thlân a hmu a, a phawrh a, mihring ruhte chu maichâmah chuan a hâl a, a tibawrhbâng ta a. Chutiang a nih tûr thu chu tûn hma, kût an hman ṭuma lal Jeroboaman maichâma thil a hlan laia zâwlneiin a hrilh lâwk kha. Josian a han en vêl chuan chu thu lo hrilh lâwktu

¹⁷zâwlnei thlân chu a hmu a. “Tu thlân nge?” a ti a. Bethel khaw mite chuan, “Judai ram aṭanga lo kal zâwlnei, hêng i thil tih tâk lo sawi lâwktu thlân a ni,” an ti a.

¹⁸Josia chuan, “Khawih ve suh u, a ruhte chu awm mai mai teh se,” a ti a. Tichuan, tu man a ruhte chu an khawih lo, Samaria khua aṭanga lo kal zâwlnei ruh pawh an khawih lo.

¹⁹Israel ram khaw tinah Israel lalhovin hnam dang pathian biakna hmunsâng an lo siamte chu a tichhia a, chûng lalte chuan LALPA chu an tithinur a ni. Bethel khuaa a tih ang khân an hâl a.

²⁰Chûnga rawngbâwltu puithiamte chu a that a, maichâmah chuan mihring ruhte a hâl a, Jerusalem-ah a lo kîr leh ta a.

²¹Thuthlung bu-a ziak angin an Pathian, LALPA chawimawi nân mipuite chu Kalhlên kût hmang tûrin lal Josia chuan a ti a.

²²Hemi ṭuma mi ang rêngin Israel lal pawh, Juda lal pawh, Kalhlên kût hmang ropui, rorêltuten ro an rêl lai ata tu mah an la awm lo.

²³Chutiangin Josia lal kum sâwm leh pariat kum chuan Jerusalem-ah Kalhlên kût an hmang ta a ni.

²⁴Puithiam lalber Hilkian Tempula Dân bu a chhara chuang Dânte chu an zawm theih nân Josia chuan Jerusalem khua leh Judai ram ata chu aienthiam te, mitthi thlûk chîngte a hnawt chhuak a, chhûngkaw pathian an biak te, milem te leh hnam dangin pathian an biak te pawh chu a paihtîr vek a.

²⁵Rilru leh tihtakzetin theihtâwp chhuaha LALPA rawngbâwl leh Mosia dâna mi ang zâwm hi tûn hmain tu mah lal an la awm ngai lo, tûn hnuah pawh an awm tawh lo vang.

²⁶Lal Manasea thiltihte avâng khân Juda-ho chungah LALPA thin a ur a, tûn thleng pawhin a thinur a la dai lo a ni.

²⁷“Israel-te chunga ka tih ang kha Juda-ho chungah pawh ka ti ve ang, Juda-ho chu ka hmuh phâk loh tûrah ka hnawt chhuak ang. Ka hmun thlan, Jerusalem chu ka hnâwl ang a, min biak ṭhinna tûra ka ruat Tempul chu ka chhuahsan bawk ang,” a ti a ni.

²⁸Josia thil tih dangte chu Juda lalte chanchin ziakna bu-ah a chuang.

²⁹Josia lal lai hian Aigupta lal Nekoa chuan a sipaite Eufretis luiah Asuria lal ṭanpui tûrin a hruai a. Lal Josia hian lo dan a tum a. Megido-a an inbeihnaah a thi ta a.

³⁰A hote chuan a ruang chu tawlailîrah an dah a, an hâwn a, lal thlânah an phûm ta a. Juda-ho chuan Josia fapa Jehoahaza lalah an thlang a, hriak an thih a.

³¹Jehoahaza chu kum sawmhnih leh pathum a nihin Juda lal a lo ni a, Jerusalem-ah thla thum a lal a. A nu chu Libna khaw mi Jeremia fanu Hamutali a ni.

³²A pute ang bawkin LALPA hmuha thil sual a ti a.

³³Aigupta lal Nekoan Hamath bial Ribla hmunah salah a man a, a lal a tâwp ta a. Aigupta lal chuan Juda-te chu tangkarua kg. sângnga leh rangkachak kg. sawmnga a chawitîr a.

³⁴Lal Nekoa chuan Josia fapa pakhat Eliakima chu a pa aiawh tûrin lalah a dah a, a hming a thlâksak a, Jehoiakima a vuah a. Jehoahaza chu Aigupta ramah a hruai a, a thi ta a.

³⁵Lal Jehoiakima chuan Aigupta lalin chhiah a phût pe tûrin mipui hnênah, an hausak leh hausak loh athuin a khawn ve thung a.

³⁶Jehoiakima chu kum sawmhnih leh panga a nihin Juda lal a lo ni a; Jerusalem-ah kum sâwm leh pakhat a lal a. A nu chu Ruma khaw mi Pedaia fanu Zebidi a ni.

³⁷A pute ang bawkin Jehoiakima chuan LALPA hmuha thil sual a ti a.