Read Mizo Lushai LEHKHABU PAHNIHNA LALTE 25 Bible Online

LEHKHABU PAHNIHNA LALTE 25 - Mizo Lushai bible

LEHKHABU PAHNIHNA LALTE 25

¹Zedekia chu Babulon lal lakah a hel a. Tichuan, Zedekia kum kua a lal kum, thla sâwmna, ni sâwm niin Nebukadnezara chu a sipaite nên an lo kal a, Jerusalem chu an rawn bei a, khaw daiah chuan bûk an khuar a, bang an theu hual a.

²Zedekia lal kum sâwm leh pakhatna thlengin an hual a.

³Chumi kum, a thla lina, ni kua ni chuan khuaah ṭâm a nasa ta hle a, mite chuan ei tûr an nei ta lo va.

⁴Khaw kulh chu an tiâwng ta a. Babulon-ho chuan an hual tlat nâ a, a chhûnga sipai zawng zawng chu lal hovin zânah an chhuak ru vek a. Lal huan bulah an kal a, kulh bang pahnih inkâr kawngkhârah an chhuak a, Jordan lui lamah an tlân a.

⁵Babulon sipaite chuan lal Zedekia chu an ûm a, Jeriko bul phaiah an man a, a sipaite chuan an tlânsan ta vek a.

⁶Zedekia chu Ribla khuaa Nebukadnezara hnênah an hruai a, a chungah ro a lo rêl nghâl a.

⁷A hmuh lai ngeiin a fate chu Nebukadnezara chuan a thahsak a, Zedekia mitmu pawh a kherchhuahsak bawk a; kawl a buntîr a, Babulon-ah a hruai ta a.

⁸Babulon lal Nebukadnezara lal kum sâwm leh pakuana thla nga, ni sarih ni chuan Nebukadnezara vêngtu pâwl hotu Nebuzaradana chu Jerusalem khuaah a lût a.

⁹Tempul chu a hâl a, lal inte leh Jerusalem-a milianho zawng zawng inte pawh a hâl a.

¹⁰A sipaite chuan khaw kulh bang chu an ṭhiat a.

¹¹Nebuzaradana chuan khawpuia mi la awmte chu Babulon-ah a hruai a, mi themthiam, Babulon-a la kal ve lote pawh salah a hruai.

¹²Mi berh tê tê chauh grep huante leh lote thlo atân Judai ramah chuan a hnutchhiah a ni.

¹³Kaldai-ho chuan Tempul dâr ban te, tawlailîrte leh dâr tuizêm te chu an chhuchhia a, a dâr tlangin Babulon-ah an hâwn a.

¹⁴Maichâma vutlawh leh vut dahna te, khâwnvâr chhitna hmanrua te, thilhlan thisen lo dawhna no te, rimtui hâlna bûr te, Tempul rawngbâwlnaa thil hman dâr chi rêng rêng chu an la vek a.

¹⁵Rangkachak leh tangkaruaa thil siam rêng rêng chu, berhbu tê tak tê tê, meilawh chenin an la a.

¹⁶Solomonan Tempul atân dâra a siam ban te, tawlailîr te, tuizêm te chu bûk hleih theih loh khawpa rit a ni.

¹⁷Ban pahnihte chu an inang chiah a, tawng sâwm leh pariata sâng an ni ve ve bawk.

¹⁸Sipai hotu ber Nebuzaradana chuan puithiam lalber Seraia te, a dawttu puithiam Zefania te leh Tempula hotu lian pathumte pawh Babulon-ah a hruai a.

¹⁹Khuaa hotu la awm te, sipai hotu dawttu sipai lam chanchin vawng ṭhatu te leh mi dang, mi pawimawh, mi sawmruk te chu

²⁰Nebuzaradana chuan Hamath bial Libna khua, Nebukadnezara awmna khuaah chuan a hruai a.

²¹Lal chuan a vua a, a lo tihlum hlawm a. Chutiang chuan an ram aṭangin sala hruai an ni ta a.

²²Babulon lal Nebukadnezara chuan Ahikama fapa Gedalia, Safana tupa chu Judai ram awptuah a ruat a, Babulon-a hruai ve lohte kha a kutah a dah a.

²³Juda sipai leh an hotu Babulon lal hnêna inpe ve duh loten an hriatin Mizpa khuaa Gedalia hnênah an kal a; chûng sipaite chu Nethania fapa Ismaela te, Karea fapa Johanana te, Netofa khaw mi Tanhumeta fapa Seraia te, Maaka khaw mi Jazania te, an mite nên an ni.

²⁴Gedalia chuan an hnênah leh an mite hnênah chuan, “Kaldai sawrkâr hnathawkho hi hlau suh u. Ramah hian awm ve mai ula, Babulon lal hnuaiah kûn ula in tân a ṭha ang,” a ti a.

²⁵Chumi kum, a thla sarihnaah Nethania fapa Ismaela, Elisama tupa, lal thlah zînga mi chu mi sâwm nên Mizpa khuaah a kal a, Gedalia chu a bei a, a that ta mai a. A bula awm Israel leh Babulon mite pawh chu a that bawk a.

²⁶Israel mi zawng zawng, rethei tak takte leh sipai hotu ni ṭhînte chu Babulon-ho an hlauh avângin Aigupta ramah an kal ta a.

²⁷Evil-merodaka, Babulon lal a nih kumin, Judai lal Jehoiakina chu a khawngaih a, tân in ata a chhuah a, Jehoiakina chu kum sawmthum leh pasarihna, thla sâwm leh pahnihna, ni sawmhnih leh pasarih a tân hnu chuan a chhuak ta a.

²⁸A be ṭha hle a, lalṭhutthlêng chu a tânpui lal dang lalṭhutthlêng aiin a tihsânsak a.

²⁹A tân in kawrte chu a hlîp a, a dam chhûng chuan lal bulah chaw a kîl ve ta a.

³⁰A dam chhûng chu a mamawh tûr ni tin bithliah neiin an pe ṭhîn a.