Read Mizo Lushai LEHKHABU PAHNIHNA LALTE 3 Bible Online

LEHKHABU PAHNIHNA LALTE 3 - Mizo Lushai bible

LEHKHABU PAHNIHNA LALTE 3

¹Judai rama Jehosafata kum sâwm leh pariat a lal kum khân, Ahaba fapa Jehorama chu Israel ramah a lal ṭan a. Samaria khuaah kum sâwm leh pahnih a lal a.

²LALPA hmuhah thil sual a ti a, a nu Jezebeli leh a pa ang êm zawngin a sual lo. A pa milem, Baal biakna hmuna a dahte chu a tichhia a;

³mahse, a hmaa lal Nebata fapa Jeroboama thil sual tihte chu a bânsan duh lo, Israel-te chu a hruai sual a, a sim duh lo.

⁴Moab lal Mesa chuan berâm a vulh a, kum tin Israel lal hnênah chhiah angin berâmno nuaikhat leh berâmchal nuaikhat hmul a pe ṭhîn a.

⁵Israel lal Ahaba a thih khân Moab lal chu Israel lakah a hel a.

⁶Lal Jehorama chu Samaria khua aṭang chuan a chhuak vat a, a sipaite chu a khâwm a.

⁷Juda lal Jehosafata hnênah, “Kan lakah Moab lal a hel ta a, min beihpui thei ang em?” tiin thu a thawn a. Lal Jehosafata chuan, “Ka rawn pui ang che; ka mite leh i mite chu pumkhat kan ni alâwm.

⁸Khawi lam kawng aṭangin nge ka rawn beih ang?” a ti a. Jehorama chuan, “A hla lam Edom thlalêr aṭangin ka rawn bei ang e,” a ti a.

⁹Lal Jehorama te, Juda lal leh Edom lalte chu an thawk chhuak a, ni sarih an kal hnuin tui an tlachham ta a. Mihring in tûr pawh, an puakphur ran in tûr pawh a awm hiau tawh lo.

¹⁰Jehorama chuan, “LALPA, kan Pathian hian Moab lal duh duha tih tûrin min hruai khâwm a lo nih hi, a va pawi êm!” a ti a.

¹¹Lal Jehosafata chuan, “LALPA min râwnsak thei tûr zâwlnei an awm em?” a ti a. Jehorama sipai hotu pakhat chuan, “Safata fapa Elisa he laiah hian a awm, zâwlnei Elija hnungzui ṭhîntu kha,” a ti a.

¹²Lal Jehosafata chuan, “Zâwlnei dik tak a nih chu,” a ti a. Lal pathum chu zâwlnei Elisa hnênah chuan an kal ta a.

¹³Elisa chuan Israel lal hnênah, “Engah nge ka ṭanpui ang che, i nu leh pate biakrâwn zâwlneite kha va râwn la a ni mai alâwm,” a lo ti a. Jehorama chuan, “Amah, LALPA hi alâwm he lai lal pathum hi Moab lal kuta min dahtu chu,” a ti a.

¹⁴Elisa chuan, “A rawng ka bâwl, mi nung LALPA chhâlin, Judai ram lal Jehosafata hi pawisa lo ila chu, kawng eng mahin ka pui lo vang che, ka lo ti asin le,” a ti a.

¹⁵Elisa chuan, “Ṭingṭang tum thiam han tîr teh u,” a ti a. Ṭingṭang tum thiamin ṭingṭang a han tum chuan, LALPA kut chuan Elisa chu a rawn khawih a.

¹⁶“ ‘Hemi ruamah hian khur lai chuk rawh u,’ LALPA chuan a ti e;

¹⁷LALPA chuan heti hian a ti: ‘Thli tleh lovin chhûm hmu lo mah ula, ruam chu tuiin a khat dâwn; chu chu in rante leh in sate nên in in dâwn nia,’ a ti e.

¹⁸Chutiang lek chu LALPA tân tih harsa tham a ni lo, in kutah Moab-ho pawh a pe dâwn.

¹⁹Kulh nei khua leh khaw nuam deuh deuh tawh phawt chu in tichhia ang a, thing ṭha deuh deuhte chu in kit ang a, tuikhur zawng zawng in hnawh ang a, lo ṭha laiah lung in dah thluah dâwn nia,” a ti a.

²⁰A tûk zîng hâlral thilhlan an hlan ṭhin hun lai chuan Edom ram lam aṭangin tui a lo luang a, ruamah chuan tui a khat ta a.

²¹Moab-ho chuan anmahni bei tûr lal pathumte chu an lo kal tih an hriat chuan mipa râlkai chin tawh phawt chu, naupang ber pawh, upa ber pawh an pung khâwm a, an ramri an lo vêng a.

²²A tûk zîng khua a lo vâra, ni a lo chhuah chuan tui chu a rawn chhun sen phût a, thisen ang maia senin a lang a.

²³“Thisen a nih khu, sipai pâwl thumho an inbei ang a, an inthat a ni ngei ang. Ti rawh u, an bûk i zu suam ang,” an ti a.

²⁴Hmêlma bûk an zu thlenin Israel-te chuan an lo bei a, an ûm kîr a, Israel-ho chuan an ûm zêl a, Moab-ho chu an that ṭeuh va.

²⁵An khuate chu an tihchhiatsak a, an lo ṭha laiah te chuan Israel-ho veivâk chuan lung an paih zêl a, an lote chu lunghmun a ni ta ngawt a. Tuikhurte chu an hnawh a, thei kûngte an kit a, a tâwpah chuan khawpui ber ‘Kir-hareset’ chauh a la chhe lo va, chu pawh chu virvawma beituten an hual a.

²⁶Moab lal chuan hmêlmate chu a hneh dâwn lo tih a hriat chuan khandaih keng sipai zasarih nên hmêlma rual chu sut tlanga, Suria lalrama tlân a tum a; mahse, a thei lo.

²⁷Tichuan, a fapa upa ber, a aiawhtu tûr chu a man a, Moab-ho pathian hnênah kulh bang bulah chuan a talh a, a hlân a. Israel miten an hmuh chuan an hlau hle a, khua chu an kalsan a, an ram lamah an haw ta a.