Read Mizo Lushai LEHKHABU PAHNIHNA LALTE 4 Bible Online

LEHKHABU PAHNIHNA LALTE 4 - Mizo Lushai bible

LEHKHABU PAHNIHNA LALTE 4

¹Zâwlnei pâwl khat zînga mi pakhat nupui chu zâwlnei Elisa hnênah a lo kal a; “Ka pu, i chhiahhlawh, ka pasal chu a thi a, i hriat angin Pathian ṭih mi tak a ni a. A leibatna pain a fapa pahnih bawih atân ka pasal leiba aia lâk tumin a lo thawk e,” a ti a.

²Elisa chuan, “Eng nge ka tihsak ang che le! Inah neih i nei em?” a ti a. Ani chuan, “Eng mah ka nei lo, Oliv hriak bûr tê tak tê pakhat chauh a ni ka neih,” a ti a.

³Elisa chuan, “Haw ta la, i ṭhenawmte bûr va hawh tawh, i hawh theih zât hawh ang che.

⁴I fate nên inkhârkhum ula, bûrah chuan hriak chu ruak zêl ula, a khah veleh dah sawn zêl ang che u,” a ti a.

⁵A haw ta a, a fate nên kawng an inkhârkhum a, bûr chu a fate chuan an rawn la a, ani chuan a lo thun khat zêl a.

⁶An bûr hawh a thun khah hnu chuan, “Bûr dang han la zêl rawh u,” a ti a. Anni chuan, “Bûr a awm tawh lo,” an ti a. Hriak pawh chu a kang ta a.

⁷Pathian mi chu a va hrilh a, ani chuan, “Kal la, hriak chu va hralh rawh, in leiba chu rûl ula, a bâng chu i fate nên ei ang che u,” a ti a.

⁸Ni khat chu Sunam khuaah Elisa chu a kal a; chu khuaah chuan nu hausa tak pakhat hi a awm a. Elisa chu chaw eiah a sâwm a. Chumi hnu chuan Sunam khuaa a kal apiangin a hnênah chaw a lam ṭhîn a.

⁹A pasal hnênah, “Heta min rawn pal fotu hi Pathian mi thianghlim tak a ni phawt ang.

¹⁰Ti teh, in chungah a riahna tûr pindan siamsak ila, khum te, dawhkân te, ṭhutthlêng te dah ila, mi a rawn tlawh apiangin a awm ṭhîn dâwn nia,” a ti a.

¹¹Ni khat chu Elisa a lo kal leh a, pindanah chuan a mu hahdam a.

¹²Sunam hmeichhia chu ko tûrin a hnungzui Gehazia chu a tîr a, hmeichhia chu a lo thleng a,

¹³Elisa chuan Gehazia hnênah, “He nu hian min duat hle mai a, eng nge kan tihsak ve ang le? Lal emaw, sipai hotu emaw biaksak a duh em zâwt teh,” a ti a. Chu nu chuan, “Mahni chipuite zînga awm ka ni alâwm, mamawh ka nei lo ve,” a ti a.

¹⁴Elisa chuan Gehazia hnênah, “Eng nge ka tihsak tak ang?” a ti a. Ani chuan a chhâng a, “Fapa a nei lo asin, a pasal lah a tar hle tawh si a,” a ti a.

¹⁵Elisa chuan, “Hetah hian lo kal teh se,” a ti a. A lo kal a. Kawngkaah chuan a ding a.

¹⁶Elisa chuan a hnênah, “Nakkum hetih hunah hi chuan fapa i pawm tawh ang,” a ti a. Ani chuan, “Khai, Pathian mi i ni a, dâwt min hrilh teh suh,” a ti a.

¹⁷Elisa sawi ang chuan nau a pai a, a kum leh chutih hun lai vêl chuan fapa a hring ta a.

¹⁸Naupang chu a lo ṭhang lian a, tûk khat chu a pa hnênah buhsengtute nên buh an sengnaah a kal a.

¹⁹A pa hnênah chuan, “Ka lu, ka lu,” a ti ta chûl a. A chhiahhlawh hnênah chuan, “A nu hnênah paw haw rawh,” a ti a.

²⁰Chhiahhlawh chuan a nu hnênah a paw haw ta a. Chhûn lai thlengin a nu chuan a chawi a, a thi ta a.

²¹Elisa pindanah a luhpui a, a khumah chuan a mut a; a chhuak a, kawng chu a khâr hnan a.

²²A pasal chu a ko va, “Chhiahhlawh pakhat leh sabengtung pakhat han tîr teh, Pathian mi hnênah ka va kal ang a, ka lo kîr leh mai ang,” a ti a.

²³Ani chuan, “Thla thar kût emaw, sabat ni emaw a ni si lo va, eng atân nge vawiin ber khera a hnêna kal i duh le?” a ti a. “Kal a ṭûl a ni e,” a ti a.

²⁴Sabengtung chu an buatsaih fel hnu chuan chhiahhlawh hnênah, “A chak thei ang berin sabengtung hi khalh ang che; ka hrilh loh che chuan muang hauh suh ang che,” a ti a.

²⁵Elisa awmna Karmel tlâng lam pan chuan an chhuak ta a. Hla fea a la awm lai chuan Elisa chuan a lo hmu a, a hnungzui Gehazia hnênah, “En teh, Sunam-nu kha a lo kal e.

²⁶A pasal te, a fate an za-in an dam emaw lo zâwt tûrin va hmuak vat rawh,” a ti a. Ani chuan, “Kan dam e,” tiin a lo chhâng a.

²⁷Tlânga Pathian mi hnên a lo thlen chuan a ke chu a vuan ta tlat a, Gehazia chuan rawn nam kian a tum a; mahse, Pathian mi chuan, “Eng mah tih suh, a rilru a na hle a nih hi, LALPA lah chuan ka lakah a la thup a, min la hrilh si lo,” a ti a.

²⁸Hmeichhia chuan, “Ka pu, fapa ka dîl che em ni kha? ‘Min tihder suh’ ka ti che a ni lâwm ni?” a ti a.

²⁹Gehazia hnênah chuan, “In siam la, ka tiang hi kengin kal rawh. Mi i tawh rêng rêng chibai bûk suh la, chibai an bûk che pawhin chhâng hek suh. Ka tiang hi naupang hmaiah va kham rawh,” a ti a.

³⁰Naupang nu chuan, “LALPA, mi nung leh i nunna chhâlin ka sawi e; i tel lo chuan ka haw hauh lo vang,” a ti a. Tichuan, a tho va, hmeichhia chu a zui ta a.

³¹Gehazia chu an hmaah a kal a, naupang hmaiah tiang chu a han kham a; mahse, thâwm rêng a nei lo va, a ngawi reng mai a. Elisa tâwk tûrin a lo kîr leh a, “Naupang chu a tho hauh lo mai,” a rawn ti a.

³²Elisa chu inah a lo thleng a, naupang chu a thi a, a khumah khân an lo mut a.

³³A lût a, an pahnih chauh chuan a inkhârkhum a.

³⁴Khumah chuan a lâwn a, naupang chu a bawh a, a hmui leh a hmui, a mit leh a mit, a kut leh a kut a chuktuah a; chutia a bawh lai chuan naupang pang chu a lo lum leh ṭan ta a.

³⁵Khum ata a lo chhuk a, chhuatah vawi hnih khat a vei hnuin a lâwn leh a, naupang chungah chuan a bawk leh a, naupang chu vawi sarih a hahchhiau dawt dawt a, a lo nung ta a.

³⁶Gehazia chu a ko va, “Sunam-nu kha han ko teh,” a ti a. A han ko va, a lo kal chuan, “I fapa hi, kha, pawm rawh,” a ti a.

³⁷Pindan chhûngah chuan a lût a, a ke bulah chuan a bawkkhup a, a fapa chu a pawm chhuak ta a.

³⁸Ṭum khat, ram puma ṭâm a tlâk laiin Elisa chu Gilgal-ah a haw a; zâwlnei rual a zirtîr a; a chhiahhlawh hnênah chuan, “Bêl lian kha la la, zâwlnei zirho hi sawhchiar siamsak teh,” a ti a.

³⁹An zînga pakhat chu thil thlâk tûr zawngin ramah a kal a, ram hruizâm a hmu a, a rah chu a theih tâwk a rawn pawm hâwng a; an chan a, eng tih an hre si lo va, sawhchiarah chuan an thlâk ta a.

⁴⁰Ei tûr an suak chhuak a, an han ei dâwn chuan, “E heu, Pathian mi, bêlah hian tûr a awm a ni,” an ti a, an ei thei ta lo va.

⁴¹Ani chuan, “Chhangphut han la teh u,” a ti a. Bêlah chuan a phul a, mite hnênah chuan, “Suak ula, a ei theih tawh e,” a ti a.

⁴²Baal-salisa aṭangin mi pakhat a lo kal a, Pathian mi chu barli thar chhang tlang sawmhnih leh buh vui a rawn kensak a. “Hêng mite hi eitîr rawh,” a ti a.

⁴³A chhiahhlawh chuan, “Eng â ni? Hei hi patling za zet ka hlui ang maw?” a ti a. Ani erawh chuan, “Hlui rawh, ei rawh se, LALPA chuan ‘Ei sela, an ei sêng lo vang,’ a ti e,” a ti a.

⁴⁴Tichuan, a han hlui a, an ei a, LALPA thu ang chuan an ei sêng ta lo va.