Read Mizo Lushai LEHKHABU PAHNIHNA LALTE 5 Bible Online

LEHKHABU PAHNIHNA LALTE 5 - Mizo Lushai bible

LEHKHABU PAHNIHNA LALTE 5

¹Suria sipai hotu ber Naamana chu LALPA chuan Suria hmêlma hnehsaktua a hman ṭhin avângin lal chuan a ngaisâng a, a duhsak hle bawk a. Mi chak, mi huaisen ni mah se phâr a ni.

²Suria sipaite chu a pâwl pâwlin an rammu ṭhîn a, Israel ram aṭangin hmeichhe naupang tê hi an man a. Naamana nupuiin chhiahhlawhah a chhawr a.

³A pi hnênah chuan, “Ka pu hi Samaria khuaa zâwlnei hnênah va kal se ka va ti êm, a phâr hi a dam ngei ang,” a ti a.

⁴Naamanan chu chu a hriat chuan a pu lal hnênah a kal a, “Israel rama hmeichhe naupang chuan chutiang chuan zu sawi a le,” a ti a.

⁵Suria lal chuan, “Va kal ta che, Israel lal hnêna pêk tûr lehkha ka kentîr ang che,” a ti a. A kal ta a, tangka tlang sîngthum, rangkachak tlang sângruk leh puan zai sîn sin sâwm a keng a.

⁶Israel lal hnênah lehkha chu a pe a, hetianga ziak a ni: “He lehkha kengtu, ka chhiahhlawh Naamana hi a phâr a, i tihdam tûrin ka rawn tîr a ni,” tiin.

⁷Israel lalin lehkha a han chhiar chuan a puan a pawtthlêr a, “Mi thata tidam thei Pathian em ka niha, he mi hian phâr tidam tûra mi rawn tih hi? Min beihna remchâng chhuanlam a zawng a ni phawt mai,” a ti a.

⁸Lal mangangin a puan a pawtthlêr hial tih Pathian mi Elisa chuan a lo hriatin lal hnênah chuan mi a tîr a, “Engati nge i puan i pawhthlêr le? Ka hnênah lo kal sela, Israel ramah zâwlnei a awm tih a hre mai ang,” a ti a.

⁹Naamana chu a sakawr leh a sakawr-tawlailîr nên chuan Elisa hnênah a lo kal a.

¹⁰Elisa chuan mi a tîr a, “Kal la, Jordan luiah vawi sarih va inbual ang che, i vun chuan a ngai a awh leh ang a, i thianghlim tawh ang,” a ti a.

¹¹Naamana erawh chu thinur deuhvin a kal tau ta a, “A lo chhuak ang a, ka hmaa dingin a Pathian, LALPA hming a lam ang a, a na lai chungah a kut han dahin a tidam dâwn emaw tih nâk alai a;

¹²Damaska bula Abana leh Pharpar lui tui kha Israel lui tui ai chuan a thianghlim zâwk a ni lâwm ni? Chûngah chuan inbualin ka thianghlim thei tho dâwn lâwm ni?” a ti a. A lehhawi a, thinrim deuhvin a haw dâwn ta a.

¹³A chhiahhlawh te chu a hnênah an lo kal a, “Ka pu, zâwlnei khân thil khirh tak tih tûr tuk che sela i ti dâwn lâwm ni? ‘Va inbual la, i thianghlim ang,’ a tih chuan tih mai tûr a ni lâwm ni?” an rawn ti a.

¹⁴Zâwlnei sawi ang chuan Naamana chu Jordan luiah a chhuk a, vawi sarih a inhnim a, a vun chu naupang vun ang a lo ni leh a, a thianghlim ta a.

¹⁵A hote zawng zawng nên Pathian mi hnênah a lo kîr a, a hmaah chuan a ding a, “Israel ramah lo chuan ram dangah Pathian a awm lo tih ka hre ta, en teh, i chhiahhlawhin thil a pêk che hi khawngaih takin la teh,” a ti a.

¹⁶Ani chuan, “A hmaa ka awmna ṭhin mi nung, LALPA chhâlin ka sawi e, ka la tawp lo vang,” a ti a. La hrâm tûrin a ngên a, mahse, a duh lo tlat a.

¹⁷Naamana chuan, “I lâk duh si loh chuan i chhiahhlawh hi sabengtung phur hnih lei min pe rawh; i chhiahhlawh hian LALPA hnênah lo chuan eng pathian dang hnênah mah hâlral thilhlan ka hlân dâwn tawh lo.

¹⁸Amaherawhchu, Suria pathian Rimona be tûra ka pu a kalin a hnung ka zui a ṭûl ṭhîn a; chutianga Rimona tempula ka kala, ka ṭhingṭhit ve pawhin LALPA chuan min ngaidam a ni ang chu,” a ti a.

¹⁹Ani chuan, “Thlamuang takin kal rawh,” a ti a. Tichuan, a kal ta a.

²⁰Thui a kal hmain Pathian mi Elisa hnungzui Gehazia chuan, ‘Ka pu hian Naamana chu eng mah sêng lovin a kaltîr tâk mai hi: kha Suria pain pêk a tum kha la se a ṭha tûr. Khawi nge, LALPA mi nung chhâlin ka sawi e, ka ûm ang a, eng emaw tal chu ka lâksak teh ang,” a ti a.

²¹Tichuan, Naamana chu Gehazia chuan a ûmzui ta a. Naamanan mi pakhat rawn ûmtu a hmuh chuan lo hmuak tûrin a tawlailîr aṭang chuan a lo chhuk a, a hnênah, “A ṭha lam em ni?” a lo ti a.

²²Ani chuan, “Ṭha lam ni e, ka pu chuan, ‘Efraim tlângram aṭangin zâwlnei pahnih an lo kal a, tangka tlang sângthum leh puan sin hnih i pe thei lâwm ni?’ a ti a che,” a ti a.

²³Naamana chuan, “Tangka sângruk tal hi la teh,” a ti a. La tûrin a nawr chiam a, tangka chu ip hnihah a khung a, puan sin hnih nên a chhiahhlawhte a phurhtîr a, an kal ta a.

²⁴Tlângchhîp a lo thlen chuan an kut ata chu a la a, in chhûngah a dah ṭha a, mite chu a tîr haw leh ta a.

²⁵Ani chu inah a lût a, a pu hmaah chuan a va ding a, Elisa chuan, “Gehazi, khawi aṭanga lo kal nge i nih?” a ti a. Ani chuan, “Khawiah mah ka kal hlei nêm,” a ti a.

²⁶Ani chuan, “Mi, nangmah hmuak tûra a tawlailîr ata a lo chhuk lai khân ka thlarau chu i hnênah a awm lo vem ni? Tangka leh puan kha i la a ni lâwm ni? Grep huan te, berâm leh bâwng te, chhiahhlawh mipa leh hmeichhiate pawh lei ta mai che.

²⁷Naamana phâr hi nang leh i thlahten in kai hlen ang,” a ti a. A pu hma ata chu a chhuak a, vûr angin a vun a phâr vâr ta a.