Read Mizo Lushai LEHKHABU PAHNIHNA LALTE 6 Bible Online

LEHKHABU PAHNIHNA LALTE 6 - Mizo Lushai bible

LEHKHABU PAHNIHNA LALTE 6

¹Zâwlnei zirho chuan Elisa hnênah, “I hova kan khawsakna in hi a chêp hle si a,

²Jordan lui kamah zuk kal ila, thing kan la ang a, kan awmhona tûr in kan zu sa ang e,” an ti a. “Kal ta che u,” a ti a.

³An zînga pakhat chuan, “Khawngaih takin lo kal ve ta che,” a ti a. Ani chuan, “Kal ve e maw le,” a ti a;

⁴an rual chuan a kal ve ta a. Jordan lui an zu thlen chuan thing chu an kit ta a.

⁵Mi pakhatin thing a kih lai chuan a hrei chu a thlawn a, tuiah a tla ta a; “Ka pu, a va pawi em! Mi ta kan hawh a ni si a,” a ti a.

⁶Pathian mi chuan, “Khawiah tak nge a tlâk?” a ti a, a tlâkna lai chu a kawhhmuh a.

⁷Thingṭang a tan a, a khawh lût a, hreifang chu a tilâng ta a, “La rawh le,” a ti a, a han ban a, a la ta a.

⁸Suria lal chuan Israel lal a rûn dâwn a, khawi khawia chân rûk nge ṭha ang tih a hote nên an sawi tlâng a.

⁹Pathian mi Elisa chuan Israel lal hnênah, “Hêngah te hian kal suh, Suria lal hovin an châng ru dâwn che a ni,” tiin a hrilh zêl a.

¹⁰Israel lal chuan Pathian miin a sawi hmuna awmte chu a hrilh a, an inrâlring hman zêl a ni; chutiang chuan vawi tam tak an ti a.

¹¹Suria lal chu a mangang ta a, a hote chu a ko va, “Israel lal lamṭang ru kan zîngah tu hi nge min hrilh teh u,” a ti a.

¹²A hotu zînga pakhat chuan, “Kan zîngah chutiang pakhat mah kan awm lo, aw lalber, Israel zînga zâwlnei Elisan i pindan chhûngrila i thu sawi chen khân Israel lal a hrilh ṭhîn alâwm,” a ti a.

¹³Ani chuan, “Khaw nge a awm va zawng teh u, mi ka tîr ang a, va man teh se,” a ti a. “Dothan khuaah a awm,” an ti a.

¹⁴Tichuan, sakawr te, tawlailîr te, sipai tam tak nên a tîr ṭeuh va, khua chu zânah an va hual a.

¹⁵Pathian mi chhiahhlawh tlangvâl chu zîngah a tho va, a va chhuah chuan sipai tam takin sakawr leh tawlailîrte nên khua an hual chu a va hmu a, a pu hnênah chuan, “Ka pu, a va pawi em! Engtin nge kan tih tâk ang?” a ti a.

¹⁶“Thlaphâng suh, kan lamṭang chu an lamṭang aiin an tam zâwk asin,” a lo ti a.

¹⁷Elisa chu a ṭawngṭai a, “Aw LALPA, a mit hi han tihmensak teh,” a ti a. LALPA chuan tlangvâl mit chu a tihmensak a, a hmu ve ta a, Elisa awmna chhak tlâng khatin mei-sakawr leh mei-tawlailîr a lo awm khup mai a.

¹⁸Elisa hualtute a hnêna an lo chhuk chuan Elisa chu LALPA hnênah a ṭawngṭai a, “An mit tihdelsak teh,” a ti a. Elisa thu ang chuan an mit chu a tihdelsak ta a.

¹⁹Elisa chuan an hnênah, “Hei hi kawng a ni lo ve, in mi zawn awmna khua lah a ni hek lo, a awmnaah ka hruai ang che u,” a ti a. Samaria khuaah a hruai lût ta a.

²⁰Samaria khua an va thleng a, Elisa chuan, “Aw LALPA, hêng mite mit hi tihmensak teh, hmu teh se,” a ti a. LALPA chuan an mit a tihmensak a, an hmu thei ta a. An han hawivêl chuan Samaria khaw chhûngah an lo awm reng a.

²¹Israel lal chuan Elisa hnênah, “Kan that mai dâwn lâwm ni?” a ti a.

²²Ani chuan a chhâng a, “That lo ve, khandaih leh thala inbeiha in mi mante mah in that hlei nêm. Ei tûr chaw leh tui pe la, eiin in sela, an pu hnênah haw rawh se,” a ti a.

²³Chaw tam tak a chhumsak a, an eia an in kham hnu chuan a chhuah a, an pu hnênah an kal ta a. Suria lal sipaite chuan Israel ram chu an rawn rûn leh tawh lo.

²⁴Chumi hnu fê chuan Suria lal Ben-hadada chuan sipai a khâwm a, Samaria khuaah a chho va, a hual ta a.

²⁵An hual rei avângin Samaria khua chu an ṭâm ta hle a, sabengtung lu hi tangka tlang sawmriatin an hralh a, ṭhuro êk gram zahnih tangka tlang nga man a ni bawk.

²⁶Israel lal chu kulh bang fangin a kal a, nu pakhat hian, “Min pui teh, aw lalber, ka LALPA,” a ti a.

²⁷“LALPA chuan a puih ngawt loh che chuan hruiha buh emaw, khura hriak emaw eng mah ka nei tawh bîk hlei nêm,” a ti a.

²⁸Lal chuan, “Eng i ti nge?” a ti leh a. Ani chuan, “He hmeichhia hian, ‘I fa kha han thawh la, vawiinah kan ei ang a, naktûkah ka fa kan ei dâwn nia,” a ti a.

²⁹Ka fa chu kan chhûm a, kan ei ta a. A tûkah chuan, ‘I fa chu han la la, kan ei dâwn nia,’ ka ti a; mahse, a fa chu a thukru ta daih si,” a ti a.

³⁰Lalin chu thu chu a han hriatin a puan a pawtthlêr a; kulh bang a fang a ni a, mipuiin an han en chuan a puan hnuaiah saiip puan a lo sin reng mai a.

³¹“Vawiin ni a tlâk hmain Safata fapa Elisa lu hi ka lâka ka lâk loh hrim chuan LALPA chuan a duh duhin, na tak pawhin min sawisa rawh se,” a ti a.

³²Elisa chu a inah a ṭhu a, upaho pawh an ṭhu ve a. Lal chuan mi a tîr a, chu mi lo thlen hma chuan Elisa chuan upaho hnênah, “Ngai teh u, he tual thah chîngpa hian ka lu lâk tumin mi a rawn tîr a nih hi. A mi tirh chu kawngkhâr hnan ula, lo dang tlat ang che u. Chu! A rawn zuitu thâwm chu a pu, lal kal thâwm a ni lâwm ni?” a ti a.

³³A la ṭawng lai chuan lal chu a lo thleng ve ta nghâl mai a: “Heti khawpa mi timangangtu chu LALPA hi a ni a, engah nge LALPA thu ka la ngaih cheu vang?” a ti a.