Read Mizo Lushai LEHKHABU PAHNIHNA LALTE 8 Bible Online

LEHKHABU PAHNIHNA LALTE 8 - Mizo Lushai bible

LEHKHABU PAHNIHNA LALTE 8

¹ LALPA chuan kum sarih chhûng Israel ramah chuan ṭâm a tlâktîr dâwn tih Elisa chuan Sunam-nu, a fapa a tihdamsak kha a hrilh a, an chhûnga hmun danga insawn tûrin a hrilh a.

²Pathian mi thu chu a zâwm a, an chhûng chuan Filistia ramah an kal a, kum sarih an thang bo va.

³Kum sarih a ral hnu chuan hmeichhia chu Israel ramah a lo kîr leh a, lal hnênah a in leh a ram kha pêk kîr leh a rawn dîl a.

⁴Lal leh Elisa hnungzui Gehazia chu an lo inbia a, Elisa thil mak tih lal chuan a hre duh a, a lo zâwt a.

⁵Elisan mitthi a tihnun leh thu Gehazian a hrilh lai chuan chu hmeichhia chu lal hmaah a lo kal ve chiah a. Gehazia chuan, “Ka pu, ka sawi hmeichhia kha he nu hi a ni; Pathian mi Elisan a tihnun leh pawh kha hei, a fapa hi alâwm,” a ti a.

⁶Lalin a dik leh dik loh a han zawh ve chuan, “Dik e,” a ti a. Lal chuan a thu ngaihtuah fel tûr hotu pakhat a ruatsak a, “A neih ṭhin zawng zawng chu pe kîr la, a awm loh chhûnga a ram aṭanga thil thar zawng man chhûtin pêk tûr zât chu pe ang che,” a ti a.

⁷Suria lal Ben-hadada a dam loh laiin Elisa chu Damaska khuaah a kal kher a, “Pathian mi a lo kal e,” tiin an hrilh a.

⁸Lal chuan Hazaela hnênah, “Thilpêk tûr eng emaw keng la, Pathian mi chu va hmu teh, ka dam chhuak dâwn nge dâwn lo, LALPA min râwnsak teh se,” a ti a.

⁹Tichuan, Hazaela chu amah hmu tûrin a kal ta a. Damaska khuaa thil ṭha ṭha, thilpêk a keng ṭeuh va, sanghâwngsei phur sawmli lai a keng a ni. A lo kal a, a hmaah chuan a ding a, “I fapa, Suria lal, Ben-hadada chuan i hnênah min tîr a ni. ‘Ka nâ hi ka dam leh ang em?’ a ti e,” a ti a.

¹⁰Elisa chuan a hnênah, “Kal ta la, a dam leh ngei ang tih hrilh rawh. Amaherawhchu, LALPA chuan a thi ngei dâwn tih min hmuhtîr e,” a ti a.

¹¹Hazaela chu zahthlâk khawpin a melh ta rûn a, Pathian mi chu a ṭap ta a.

¹²Hazaela chuan, “Ka pu, engtizia nge i ṭah tâk le?” a ti a. Ani chuan, a chhâng a, “Israel mite chunga thil ṭha lo i tih tûr ka hmu a ni, an kulh te i hâlsak dâwn a, an tlangvâlte khandaihin i sât hlum ang a, an nausênte leichârah i vaw hlum ang a, an hmeichhia, nau pai laite chu an dul i pir ṭehsak dâwn,” a ti a.

¹³Hazaela chuan, “Kei, i chhiahhlawh uicho mai hi chutiang ti tûr em ka nih?” a ti a. Elisa chuan a chhâng a, “LALPA chuan Suria lala i ṭang min hmuhtîr a ni,” a ti a.

¹⁴Elisa chu a chhuahsan a, a pu hnênah chuan a kal ta a. Ani chuan, “Elisa chuan eng nge a lo hrilh che?” a ti a. “I dam leh ngei dâwn thu min lo hrilh e,” a ti a.

¹⁵A tûkah chuan Hazaela chuan puan a la a, tuiah a chiah a, lal chu a hup hlum ta a. Hazaela chu Ben-hadada aiah Suria ram lal a lo ni ta a.

¹⁶Israel lal Ahaba fapa Jorama lal kum nga kum chuan Jehosafata fapa Jehorama chu Judai ram lal a lo ni ta a.

¹⁷Kum sawmthum leh pahnih a nihin a lal ṭan a, Jerusalem-ah kum riat a lal a.

¹⁸A nupui chu Ahaba fanu a ni. Ahaba chhûng dangte ang bawkin Israel lalte awm dân ṭha lo chu a la a. LALPA hmuha thil sual a ti a.

¹⁹LALPA chuan Juda-te chu tihboral vek a hreh a ni, a chhiahhlawh Davida hnênah, “I thlahte chu lalah an ṭang reng ang,” tia a lo tiam tlat tawh avângin.

²⁰Jehorama lal lai hian Judai ram lakah Edom-ho an hel a, mahni lal an nei a,

²¹Jehorama chu Zair lamah a sakawr-tawlailîr nên a kal a. Edom-ho chuan an lo hual a, zânah a tawlailîr pute nên an tlân chhuak thei hrâm a, a sipaite chu an darh a, in lamah an haw ta a.

²²Chuta chin chu Edom hi Juda-ho hnuaiah an awm lo hlen ta a. Hetih hun lai bawk hian Libna khua pawh an hel a.

²³Jehorama thil tih dang zawng zawng chu Juda-te lal chanchin ziakna bu-ah a chuang.

²⁴Jehorama chu a thi a, Davida khawpuia lal thlânah an phûm a, a fapa Ahazia chu a aiah a lal a.

²⁵Israel lal Ahaba fapa Jorama lal kum sawm pahnih kumah Jehorama fapa Ahazia chu Judai ram lal a lo ni a,

²⁶kum sawmhnih leh pahnih a nihin a lal ṭan a, Jerusalem-ah kum khat a lal a. A nu chu Ahaba fanu Athali, Israel lal Omria tunu a ni.

²⁷Ahazia chuan Ahaba thlahte zînga mi fanu nupuia a neih avângin Ahaba chhûng dangte ang bawkin LALPA hmuha thil sual an ti a.

²⁸Lal Ahazia leh Israel lal Jorama chu Suria lal Hazaela bei tûrin an inthurual a. Gilead biala Ramot khuaah an sipaite chu an inbei a; Jorama chuan indonaah hliam a tuar a.

²⁹Awm dam tûrin Jezreel khuaah a lo kal a, Ahazia chuan a va tlawh a.