Read Mizo Lushai LEHKHABU PAHNIHNA LALTE 9 Bible Online

LEHKHABU PAHNIHNA LALTE 9 - Mizo Lushai bible

LEHKHABU PAHNIHNA LALTE 9

¹Chûng lai chuan zâwlnei Elisan zâwlnei la tlangvâl tak hi a ko va, “Insiam la, he hriak bûr hi keng la, Ramot-gilead-ah va kal rawh.

²I va thlen chuan Nimsia tupa, Jehosafata fapa Jehua zawng chhuak ang che. A awmna inah lût la, a ṭhiante zîng ata pindan chhûngrilah luhpui la.

³A lu-ah he oliv hriak hi i leih ang a, ‘LALPA chuan Israel-te lal atân hriak a thih ta a che,’ ti ang che. Kawngkhâr chu hawng la, chhuak vang vang la, muangchâng suh ang che,” a ti a.

⁴Zâwlnei tlangvâl chu Ramot-gilead-ah chuan a kal a.

⁵A va thlen chuan sipai hotute chu an lo ṭhu khâwm a. “I hnênah thu sawi tûr ka nei e, sipai hotu,” a ti a. Jehua chuan, “Kan zînga tu hi nge i biak duh?” a ti a. Ani chuan, “Aw sipai hotu, nang kha a ni ka biak duh chu,” a ti a.

⁶A tho va, in chhûngah chuan a lût a, a lu-ah hriak chu a leih a, “Israel-te Pathian chuan, ‘LALPA mi, Israel-te chunga lal tûrin hriak ka thih ta a che,’ a ti e” a ti a.

⁷“I pu Ahaba chhûngte chu i that ang a, ka chhiahhlawhte thisen leh LALPA chhiahhlawhte thisen Jezebeli chhuahte phuba chu ka la dâwn a ni.

⁸Ahaba thlahte chu an boral vek ang a; naupang pawh, upa pawh mipa zawng zawng chu ka tiboral vek dâwn a ni.

⁹Ahaba chhûngte chu Nebata fapa Jeroboama chhûngte leh Ahija fapa Baasa chhûngte ang khân ka sawisa ang.

¹⁰Jezebeli chu Jezreel-ah ui-in a sa an ei ang; tu mah phûmtu an awm lo vang,” a ti a. Kawngka chu a hawng a, a chhuak ta vang vang a.

¹¹Jehua chu a pu hote zîngah chuan a lo chhuak a, pakhat chuan, “A ṭha lam em ni? Mi â-pa kha engah nge i hnêna a lo kal le?” a ti a. Jehua chuan, “A duh chu in hria alâwm,” a ti a.

¹²Anni chuan, “Hre suh e, han sawi teh,” an ti a. “LALPA chuan, ‘Israel lal atân hriak ka thih ta a che, a ti e,’ min ti alâwm,” Jehua chuan a ti a.

¹³A sipai hotupuite chuan an puan an hlîp sawk sawk a, kailâwn chungah Jehua din nân an phah a, tawtawrâwt an hâm a, “Jehua hi lal a ni ta,” an ti a.

¹⁴Nimsia tupa, Jehosafata fapa Jehua chuan Jorama chu a phiar a.

¹⁵Jorama chu Suria lal nên Ramot khuaa an inbeih lai khân an hliam a, Jezreel khuaah awm dam tûrin a kal a ni. Jehua chuan a ṭhiante hnênah, “Ka lama in ṭan phawt chuan Ramot khua aṭang hian Jezreel mite hnêna chanchin hrilh tûr tu mah chhuah suh ang che u,” a ti a.

¹⁶A tawlailîrah chuan a chuang a, Jezreel lam a pan ta vang vang a. Jorama chu a la dam chiang lo va, Juda lal Ahazia chuan a tlawh a; tah chuan a lo awm ve a.

¹⁷Jezreel in sânga râlvêngtu chuan Jehua leh a hote lo kal chu a hmu a, “Sakawr chunga chuang mi ṭhenkhat lo kal ka hmu e,” a ti a. Jorama chuan, “Hmêlma an ni nge ni lo hre tûrin sakawr chungchuang pakhat tîr teh u,” a ti a.

¹⁸An mi tirh chu Jehua-te hnên a va thleng a, “Lalin ṭhian ṭha anga lo kal i nih leh nih loh a hre duh e,” a ti a. Jehua chuan, “I hriat ve tûr a awm lo ve, hnung lamah khân kal rawh,” a ti a. Râlvêngtu chuan, “Mi lo kalte chu kan mi tirh chuan a va fin a, a lo kîr leh rih lo,” a ti a.

¹⁹Mi dang an tîr leh a, ani chuan Jehua chu thu ngai bawk a zâwt leh a, Jehua chuan, “I hriat tûr a awm lo ve, hnung lamah khân kal rawh,” a ti leh a.

²⁰Râlvêngtu chuan an mi tirh chu, “Mi lo kalte chu kan mi tirh chuan a va fin a, a lo kîr bîk lo,” a ti a. “An hruaitu chuan a tawlailîr chu mi â ang maiin a khalh ka ti, Jehua ang maiin,” a ti bawk a.

²¹Lal Jorama chuan, “Ka tawlailîr buatsaih teh u,” a ti a. An siam zawh chuan Juda lal Ahazia nên mahni tawlailîr ve vea chuangin Jehua tâwk tûr chuan an chhuak dûn a. Nabota huanah an va tâwk a.

²²Jorama chuan, “Jehu, ṭha lam thil em ni?” a ti a. Jehua chuan, “I nu Jezebeli chîn chhuah milem biak leh dawi heti taka a hluar chhûng chu engtin nge a ṭha lam a nih theih ang?” a ti a.

²³Jorama chuan, “Ahazia, min thah an tum a ni e,” tiin a au va, a tawlailîr chu a kai her a, a tlânchhe ta a.

²⁴Jehua chuan a thalngul chu theihtâwpin a kuai a, Jorama hnung lamah a kâp a, a thal chuan a lung a fuh a, tawlailîrah chuan a thi ta a.

²⁵Jehua chuan a hnungzuitu Bidkara hnênah, “A ruang saw Nabota huanah paih ang che. Jorama pa Ahaba hnungzuia sakawra kan chuan laia Ahaba chungthu LALPA sawi kha hre reng ang che.

²⁶‘Nabota leh a fate nimina an tualthih dân kha ka hmu ve reng a ni; hemi hmunah ngei hian ka hrem ve ang che,’ a tih kha. Jorama ruang chu la la, Nabota huan ngeiah, LALPA sawi angin paih ang che,” tiin a hnungzuitu chu a hrilh a.

²⁷Juda lal Ahazia chuan hêng thil hi a hmuhin a tawlailîr nên Beth-hagan lamah a tlân a, Jehua chuan a ûmzui a, a hote hnênah, “A tawlailîr chuang saw that rawh u,” a ti a. Ibleam khaw bul Gur chhova a tlân lai chuan an kâp hliam a, Megido-ah a kal a; tah chuan a thi ta a.

²⁸A hote chuan tawlailîrin a ruang chu Jerusalem-ah an phur chho va, Davida khawpui, lal thlânah an phûm a.

²⁹Ahaba fapa Jorama chu Israel rama kum sâwm leh pakhat a lal kumin Ahazia chu Judai ramah a lal ṭan a.

³⁰Jehua chuan Jezreel a lo thleng tih Jezebeli chuan a hriatin a mit ko a hnawih dum a, a sam a chei danglam a, lal insâng tukverh aṭangin a lo dâk chhuak a.

³¹Kulh kawngkhâra Jehua a lo luh chuan, “Mahni pute thattu Zimri, a ṭha lam duha lo kal em i nih?” tiin a lo au va.

³²Jehua chu a han dâk a, “Ka lamṭang in awm em?” a ti a. Hotu pahnih pathum tukverhah an lo dâk a.

³³Jehua chuan an hnênah, “Han nam thla rawh u,” a ti a. Tichuan, Jezebeli chu an nam thla a, a thisen a per uai a, bangahte a kai a, sakawrte pawh chu a per berh a, a ruang chu an rap nawk nawk a.

³⁴In chhûngah Jehua chu a lût a, a eiin a in tê tê a, “Kha hmeichhe sual ruang kha phûm rawh u, lal fanu a ni khanglâng si a,” a ti a.

³⁵Phûm tûrin an va kal a, a luruh, a kut leh keruh chauh an va hmu tawh a.

³⁶Jehua chu an rawn hrilh a, “LALPAN a chhiahhlawh Tisbe mi Elija kâa a sawi, ‘Jezebeli chu Jezreel khuaah ui-in an ei ang a;

³⁷an ei bâng chu tu ruang nge tih hriat rual loh khawpin lei vaivutah a darh ang,’ a tih kha a lo thleng ta a nih chu,” a ti a.