Read Mizo Lushai BU KHATNA CHRONICLES 10 Bible Online

BU KHATNA CHRONICLES 10 - Mizo Lushai bible

BU KHATNA CHRONICLES 10

¹Filistia leh Israel-te chu Gilboa tlângah an inbei a. Israel mi tam tak chu an that a, mi dang chu Saula leh a fate nên an tlânchhia a.

²Filistia-ho chuan an nangchîng a, Saula fa pathum - Jonathana te, Abinadaba te, Malkisua te chu an that a.

³Saula bulah chuan an inbei nasa hle a, hmêlmain thalin an kâp fuh a, a hliam na viau va.

⁴Tlangvâl, a râlthuam kengtu hnênah, “I khandaih phawi la, min that mai teh, Filistia serh tan lohho hian min uankhum dah ang e,” a ti a; mahse, râlthuam kengtu chuan a hlau êm a, a that thei lo. Chuvângin, Saula chuan ama khandaih chu a la a, a bawh ta a.

⁵Tlangvâl chuan Saula thi a hmuh chuan a khandaih ken chu a bawh a, a thi ve ta a.

⁶Saula leh a fate pathum chu an thi a, an lalna pawh chu a tâwp ta a.

⁷A sipaite chu an tlânchhia a, Saula leh a fate pawh an thi tih an hriatin Jezreel ruama awmte chuan an khua chu an tlânchhiatsan a, Filistia mite chu an lo kal a, an rawn luah ta a.

⁸A tûkah Filistia-ho chu an mi thahte râlthuam hlihsak tûrin an lo kal a, Gilboa tlângah chuan Saula leh a fate ruang chu an va hmu a.

⁹Saula lu chu an la a, an râlthuam chu an hlihsak a, Filistia ram tinah, he thil lâwmawm tak hi an milemte leh an mite hrilh tûrin mi an tlântîr a.

¹⁰Saula râlthuamte chu an pathian Tempulahte an dah a, a lu chu an pathian Dagon tempulah an târ a.

¹¹Gilead rama Jabes khaw miten Filistia-hovin Saula an sawisak dân an han hriat chuan,

¹²an pasalṭhaho chu an thawk chhuak a, Saula leh a fate ruang chu an va hlâwm a, Jabes khuaah an rawn hâwn a, chutah chuan sasaw buk hnuaiah an phûm a, ni sarih chaw an nghei a.

¹³ LALPA laka a bawhchhiatna avângin Saula chu a thi ta a. LALPA thu chu a awih lo va,

¹⁴LALPA râwn lovin mitthi thlûk thiam a râwn; chuvângin, LALPA chuan a tihlum ta a, a ram chu Jesaia fapa Davida hnênah a pe ta a ni.