Read Mizo Lushai BU KHATNA CHRONICLES 11 Bible Online

BU KHATNA CHRONICLES 11 - Mizo Lushai bible

BU KHATNA CHRONICLES 11

¹Hebron khuaa Davida hnênah Israel mi zawng zawng chu an kal a, “I thisen zawmpui kan ni a,

²Saula lal a nih lai pawh khân Israel mite chu indonaah i ho ṭhin kha. LALPA i Pathian pawhin, ‘Ka mi Israel-te hi i kaihruaiin an rorêltu i ni ang,’ tiin a tiam che kha,” an ti a.

³Israel hotu zawng zawng chu Hebron-ah Davida hnênah an lo kal a, Davida chuan LALPA hmaah anni nên chuan thu a thlung a, hriak an thih a, Samuela hmanga LALPA tiam ang khân Israel-te lal a ni ta a.

⁴Lal Davida leh Israel-te chu an kal a, Jerusalem khua bei tûrin an han kal a; chutih lai chuan Jebus tih a ni ṭhîn. Jebus mi, a tîr aṭanga lo awmte an la awm reng a ni.

⁵Jebus-ho chuan, “Khuaah i lo lût thei hauh lo vang,” an lo ti a; mahse, Davida chuan Zion kulh chu a la ta a, chu kulh awmna mual chu ‘Davida khawpui’ tih a ni ta a.

⁶Davida khân, “Jebus mi that hmasa ber chu sipai hotu-ah ka dah ang,” a ti a. Zeruii fapa Joaba chuan khaw bei tûr chuan hma a hruai a, sipai hotu berah a ṭang ta a ni.

⁷Chumi kulhah chuan Davida a awm tâk avângin ‘Davida khawpui’ tih a ni ta a.

⁸Khaw kulh chu Milo an tih tlâng chhak lam ruama lei chhûn khahna lai aṭangin a siam ṭan a, a dang zawng chu Joaban a chhunzawm a.

⁹Lal Davida chu a chak tulh tulh a, Engkim LALPA chuan a awmpui tlat a ni.

¹⁰Hêng hi Davida sipai hmingthangte chu an ni a; anni hian Israel mi zawng zawng nên lalah an siam a, LALPA thu ang zêlin ram an dinpui a, a ram chu an tiropui hle a ni.

¹¹‘Pasalṭha pathum’ an tih zînga hotu deuh ber chu Hakmon mi Jasobeama a ni. Mi zathum feiin a bei a, ṭum khatah a that vek a ni.

¹²Pasalṭha pathum an tih zînga pakhat leh chu Aho chi, Dodoa fapa, Eleazara a ni. Pasdamim-ah Filistia-ho leh Davida-hote an inbei a,

¹³ani chu Davida lamṭang a ni; Barli hmuna an awm laiin Israel-te chu an tlânchhe ta mai a.

¹⁴A fate nên an lo ding a, Filistia-ho chu an that a, LALPA chuan a hnehtîr ta a.

¹⁵Ni khat chu Davida awmna Adulam pûkah a pasalṭha sawmthum chu an awm ve a, Filistia rual khat chuan Refa-ho awmna phaiah bûk an khuar tlat a.

¹⁶Chu hmun hima Davida a awm lai chuan Filistia mite chu Bethlehem khuaah an inkulh a.

¹⁷Davida chuan a khua Bethlehem chu a ngai hle a, “Bethlehem kawngka bula tuikhur tui min va chawisaktu awm teh sela ka va ti em,” a ti a.

¹⁸Pasalṭha pathumte chuan Filistia sipaihote chu an tâwn tlang a, Bethlehem kulh kawngka bula tuikhur tui chu an va thâl a, Davida chu an rawn pe a; mahse, ani chuan a lo in duh lo. LALPA hnênah a hlân a, a bun chhuak ta zâwk a.

¹⁹“He tui hi ka in thei lo, mi huaisen thih huamte thisen in ka ni ngawt dâwn alâwm, thih huama va chawi an ni si a,” a ti a. Chûng chu ‘Pasalṭha Pathum’ an tihte thil tih chu a ni.

²⁰Joaba u Abisaia chu, ‘Pasalṭha sawmthum’ an tih zînga hotu ber a ni. Feiin mi zathum a bei a, a that vek a, a hming a ṭha ta hle a ni.

²¹‘Pasalṭha sawmthum’ an tih zînga hmingthang ber a ni, an hotu berah a ṭang ta a. ‘Pasalṭha pathum’ an tih zîngah erawh chuan a tel pha lo.

²²Kabzeel khaw pasalṭha, Jehoiada fapa Benaia pawhin thil mak tak tak a ti. Moab chhuan êm êm milian pahnih a that a, vûr tlâk laiin a pûka sakeibaknei tawm a that bawk.

²³Aigupta mi pa lian tak, tawng ngaa sâng a that bawk a ni. He pa hian kechâwn tiat dâwn laia lian fei hi a hmang a, Benaia hian talhtum nên a bei a, a fei chu a chhuhsak a, chu fei chuan Aiguptapa chu a chhun hlum a ni.

²⁴Pasalṭha sawmthum zînga mi Jehoiada fapa Benaia chuan hêng thil hi a ti a, ‘Pasalṭha sawmthum’ zîngah chuan a hming a ṭha hle a,

²⁵‘Pasalṭha pathum’ zîngah erawh chuan a tel pha lo. Davida chuan amah vêngtute hotu-ah a dah a.

²⁶Pasalṭha dangte: Joaba nau Asahela te, Bethlehem mi Dodoa fapa Elhanana te,

²⁷Haror mi Samota te, Pelon mi Heleza te,

²⁸Tekoa mi Ikesa fapa Ira te, Anathot mi Abiezera te,

²⁹Husa mi Sibekaia te, Aho mi Ilaia te,

³⁰Netofa mi Maharaia te, Netofa mi Baana fa Heleda te,

³¹Benjamina thlah Gibea khaw mi Ribaia fa Itaia te, Pirathon mi Benaia te,

³²Nahale-gaas mi Huraia te, Arbat mi Abiela te,

³³Baharum mi Asmaveta te, Saalbon mi Eliaba te,

³⁴Gizon mi Hasema te, Herar mi Sagea fapa Jonathana te,

³⁵Harar mi Sakara fa Ahiama te, Ura fa Elifala te,

³⁶Mekerat mi Hefera te, Pelon mi Ahija te,

³⁷Karmel mi Hezroa te, Ezbaia fa Naaraia te,

³⁸Nathana unaupa Joela te, Hagria fa Mibhara te,

³⁹Amon mi Zeleka te, Berot mi Naharaia te: ani hi Zeruii fapa Joaba râlthuam kengtu a ni;

⁴⁰Jatir mi Ira leh Gareba te,

⁴¹Hit mi Uria te, Ahlaia fa Zabada te,

⁴²Siza fa Adina te: ani hi Reubena thlahte zînga hotu a ni, a chipuite a ho, mi sawmthum nên;

⁴³Maaka fa Hanana te, Mithna mi Josafata te,

⁴⁴Asterat mi Uzia te, Aroer mi Hothama fa Sama leh Jeiela te,

⁴⁵Tiz mi Simria fapa Jediaela leh a unau Joha te, Mahava mi Eliela te,

⁴⁶Elnaama fa Jeribaia leh Josavia te, Moab mi Ithma te,

⁴⁷Eliela te, Obeda te, Mezobia mi Jaasiela te.