Read Mizo Lushai BU KHATNA CHRONICLES 12 Bible Online

BU KHATNA CHRONICLES 12 - Mizo Lushai bible

BU KHATNA CHRONICLES 12

¹Lal Saula hlauva Ziklag khuaa Davida a tlân lai khân, Saula chu an chipui Benjamin chi ni mah se, indo ṭhang sipai rinawm tak tak Benjamin chia miten an rawn pan a.

²Ding lam leh vei lam inang rengin thal kah nân an hmang thiam a, virvawmte an vawm thei a ni.

³Gibea mi Sama fa Ahiezera leh Joasa te chuan an ho va. Chûng sipaite chu hêngte hi an ni: Azmaveta fa Jeziela leh Peleta, Anathot khaw mi Beraka leh Jehua.

⁴‘Pasalṭha sawmthum’ tih zînga tel sipai hmingthang Gibea mi Ismaela, Gedera mi Jeremia, Jahaziela, Johanana leh Jozabada,

⁵Harif mi Eluzaia, Jerimota, Bealia, Semaria, Sefatia.

⁶Kora thlah Elkana, Isia, Azarela, Joezera, Jasobeama.

⁷Gedor mi Jerohama fa Joela, Zebadia.

⁸Thlalêra a bîkna hmuna a awm laiin Gada thlah zînga indo ṭhang sipai hmingthang tak tak hêng mite hian an rawn pan a, phaw leh fei an hmang thiam êm êm a, sakeibaknei hlauhawm hmêl an pu a, khâm saza anga chak an ni.

⁹An lal dân indawtin an hming chu: Ezera te, Obadia te, Eliaba te,

¹⁰Mismana te, Jeremia te,

¹¹Ataia te, Eliela te,

¹²Johanana te, Elzabada te,

¹³Jeremia te, Makbanaia te an ni.

¹⁴Gada thlah sipai ṭhenkhat chu sâng hotu an ni a, a thar deuhte erawh chu za hotute an ni.

¹⁵Kum tîr, thla hmasa ber, Jordan lui len laiin lui chu an rawn kai a, lui chhak leh thlang lama awmte chu an ûm darh a.

¹⁶Benjamin leh Juda thlah mi ṭhenkhat chu Davida awmna pûkah an kal a.

¹⁷Davida chuan a lo hmuak a, “Ka lamṭanga min pui tûra lo kal in nih chuan lâwm takin ka lo pawm ang che u; thil ṭha lo eng mah in chunga ka tih loh pawha ka hmêlmate kuta min pêk tum in nih chuan, kan pate Pathian chuan a hria a, a hrem ngei ang che u,” a ti a.

¹⁸An zînga hruaitu pakhat Amasaia chu Pathian thlarauvin a thuam a, hetiang hian thu a chham ta a: “I mi kan ni e, David, Jesaia fapa, I lamṭang kan ni. Thlamuanna i hnênah awm sela, I lamṭangte hnênah pawh awm sela, Pathianin ṭanpui che rawh se,” a ti a. Davida chuan a lo lâwm a, a sipai hotu-ah te a dah hlawm a.

¹⁹Filistia mite nên Lal Saula bei tûra Davida a thawh chhuah ve lai khân Manasea thlah zînga mi sipai ṭhenkhat chu Davida lamah an ṭang a. Filistia-ho hi a pui tak tak hman lo, an lal ṭhenkhatten an ringhlel a, a pu Saula lamah a ṭan thut an hlau va, Ziklag khuaah an tîr kîr a nih kha.

²⁰Chutia a kîr lai chuan hêng Manasea thlah sipaite hian an rawn belh a ni: Adna te, Jozabada te, Jediaela te, Mikaela te, Jozabada te, Elihua te, Zilethaia te. Hêngho hi Manasea thlah zîngah sâng hotu ṭhalh an ni.

²¹Davida sipaiah an ṭang ta a, sipai hotu-ah te a lo dah a, sipai ṭha tak tak an ni.

²²Ni tin deuhthaw mai Davida lama ṭang tûr mi an lo kal a, sipai tam tak a nei ta a.

²³ LALPA thu anga Saula aia Davida chu lala siam tum, sipai râlthuam nêna Hebron khuaa Davida rawn pantu zât chu hetiang hi a ni:

²⁴Juda thlah aṭangin phaw leh fei keng mi sângruk leh zariat,

²⁵Simeona thlah zînga indo thiam tak tak sipai sângsarih leh za.

²⁶Levia chi aṭangin mi sângli leh zaruk.

²⁷Arona thlah, Jehoiada ho, mi sângthum leh zasarih.

²⁸Tlangvâl huai tak Zadoka leh a ṭhian sipai hotu mi sawmhnih leh pahnih.

²⁹Saula chipui, Benjamina thlahte, mi sângthum (Benjamina thlah tam tak chu Saula lama ṭang an ni),

³⁰Efraim thlah zînga hmingthang tak tak mi sînghnih leh zariat.

³¹Jordan thlang lama awm Manasea thlah, Davida lala siam tûra thlan chhuah mi sîngkhat leh sângriat.

³²Isakara thlah, hotu zahnih leh an hote. Hêng hotute hian Israel-te tih tûr leh an tih hun tûr an hre êm êm a ni.

³³Zebulun thlah mi sîngnga, hriam chi tinrêng hmang thiam; mi rinawm, rilru nghet pu mi an ni hlawm.

³⁴Naftalia thlah - hotu rual sângkhat leh an ho phaw leh fei keng ṭhalh mi sîngthum leh sângsarih.

³⁵Dana thlah, indo thiam mi sînghnih leh sângriat leh zaruk.

³⁶Asera thlah, indo tûra inpeih reng, mi sîngli.

³⁷Jordan chhak lama awm Reuben te, Gad te leh Manasea thlah te, hriam chi tinrêng hmang thiam mi nuaikhat leh sînghnih.

³⁸Hêng sipai rual, indo tûra inpeih rengte hi Davida chu Israel lala siam tum tlatin Hebron khuaah an lo kal a. Israel hnam dangte pawh Davida lala siam tûrin an lungrual hle a ni.

³⁹Davida ho chuan ni thum chhûng an chipuite tân ruai an lo buatsaih chu an ei a, an in a.

⁴⁰Hmâr lama awm Isakar-ho te, Zebulun-ho te, Naftali-ho te chuan chhangphut te, theipui te, grep pho ro te, uain te, oliv hriak te an rawn la a, sabengtung te, sanghâwngsei te, sakawr puakphur chi te, bâwng te an rawn phurhtîr zut zut a. Talh tûr berâm te, bâwng te an rawn khalh zut zut bawk a. Israel ram mite chu an lâwm êm êm a ni.