Read Mizo Lushai BU KHATNA CHRONICLES 14 Bible Online

BU KHATNA CHRONICLES 14 - Mizo Lushai bible

BU KHATNA CHRONICLES 14

¹Insumdâwn tawn thuah Tura lal Hirama chuan Davida hnênah palai a tîr a. Lal in sak nân sidar thingtumte a pe a, lungchher thiam te leh thing dek thiam mistiri a ngaihtuahsak bawk a.

²LALPA chuan Israel-te chunga a lalna chu a tinghetin a mi Israel-te avângin a ram pawh a chawimawi ta hle tih Davida chuan a hria a.

³Davida chuan Jerusalem-ah nupui tam tak a neih belh a, fanu fapa pawh a neih belh ṭeuh bawk.

⁴Jerusalem-a a fate chu hêngte hi an ni: Samua, Sobaba, Nathana, Solomona,

⁵Ibhara, Elisua, Elpeleta,

⁶Noga, Nefega, Jafia,

⁷Elisama, Beeliada, Elifeleta.

⁸Filistia mite chuan Davida chu Israel ram pumah a lal ta tih an hriatin amah chu man tumin an sipaite an tîr a. Davida chuan a lo hriatin bei lêt tûrin a thawk chhuak a,

⁹Filistia sipaite chuan Refa-ho ruam an tih chu an lo thleng a, mite chu an rawk ta a.

¹⁰Davida chuan, “Filistia-ho hi ka bei ang em? Min hnehtîr ang em?” tiin Pathian a râwn a. LALPA chuan, “Bei rawh, ka hnehtîr ang che,” a ti a.

¹¹Davida chuan Baal-Perazim-ah a bei a, a hneh ta a. “Hmêlma sipaite chu tuilian hrût ang hrimin Pathianin min sawisaktîr hi,” a ti a. Chu hmun chu Baal-Perazim an vuah ta a.

¹²Filistia-ho chuan an pathian lemte chu an tlânchhiatsan a, Davida chuan a hâltîr vek a.

¹³Rei lo tê hnuah, chu hmunah bawk chuan Filistia-ho an lo kal leh a, chûng lai mite chu an rawk a.

¹⁴Davida chuan Pathian a râwn leh a, Ani chuan, “He lam aṭang hi chuan bei mai suh, râl lehlama thingtheihmu hmunah sâwn kal kual la, chuta ṭang chuan bei ang che,

¹⁵Thingtheihmu lêra kal thâwm ang ri ṭhup ṭhup i hriat veleh chê ang che. Filistia sipaite sawisa tûrin i hnênah ka lo kal dâwn a ni,” a ti a.

¹⁶Pathian thupêk ang chuan Davida chuan a ti a, Gibeon aṭangin Gezer thleng rawkin Filistia-ho chu a ûm ta a.

¹⁷Davida hming chu ram tinah a thang ta a, LALPA vângin hnam tinin an hlau a ni.