Read Mizo Lushai BU KHATNA CHRONICLES 15 Bible Online

BU KHATNA CHRONICLES 15 - Mizo Lushai bible

BU KHATNA CHRONICLES 15

¹Davida chuan ama chên nân “Davida khawpuiah” in a sa hlawm a. Pathian Thuthlung Bâwm dahna tûr hmun a buatsaih a, puan in a kaih bawk a.

²“Levia chi chauhvin Thuthlung Bâwm chu an zâwn tûr a ni, a zâwntu atân leh kumkhuaa a rawngbâwltu atân LALPA chuan anni hi a thlang a ni,” a ti a.

³Davida chuan Israel mi zawng zawng chu Jerusalem-ah, Thuthlung Bâwm dahna tûr a buatsaihah chuan dah tûrin a pun khâwm a.

⁴Arona thlah leh Levia chite chu a ko khâwm a,

⁵Levia chi, Kohata thlahte chu mi za leh sawmhnih, Uriela hovin an lo kal a.

⁶Meraria thlah aṭangin mi zahnih leh sawmhnih, Asaia hovin an lo kal a.

⁷Gersona thlah aṭangin mi za leh sawmthum, Joela hovin an lo kal a;

⁸Elizafana thlah aṭangin mi zathum, Semaia hovin an lo kal a.

⁹Hebrona thlah aṭangin mi sawmriat, Eliela hovin an lo kal a.

¹⁰Uziela thlah aṭangin mi za leh sâwm leh pahnih, Aminadaba hovin an lo kal bawk a.

¹¹Davida chuan puithiam Zadoka leh Abiathara chu a ko va, Levia chi mi paruk, Uriela te, Asaia te, Joela te, Semaia te, Eliela te, Aminadaba te pawh chu a ko va,

¹²an hnênah, “Levia chi hruaitute in ni a, inthian thianghlim ula, in Levia chipuite pawh thian thianghlim rawh u. LALPA, Israel-te Pathian Thuthlung Bâwm chu a dahna tûr ka buatsaihah in zâwn thleng tûr a ni.

¹³Lâk kan tum hmasak ṭum khân in tel ve lo va, LALPA kan Pathian chu a tih dân tûr kan râwn lo va, min sawisa ta a nih kha,” a ti a.

¹⁴ LALPA, Israel-te Pathian Thuthlung Bâwm la sawn tûr chuan puithiamte leh Levia chite chu an inthian thianghlim ta a.

¹⁵Mosia hnêna LALPA sawi angin Levia chite chuan bâwm chu a zâwnfungin an zâwn ta a ni.

¹⁶Levia chite chu zaipâwl te, perhkhuang tuma dârbenthek bêng pâwl te insiam tûrin an hotute chu Davida chuan a hrilh a.

¹⁷Dârbenthek ring taka bêng tûrin hêng mite hi an ti a:

¹⁸Joela fapa Hemana te, a unau Berekia fapa Asafa te,

¹⁹an unau Meraria thlah zînga mi Kusaia fapa Ethana te.

²⁰Anniho hi ṭanpuia perhkhuang fiak chi perh tûrin hêng Levia chite hi an ruai a: Zekaria, Aziela, Semiramota, Jehiela, Unia, Eliaba, Maaseia, Benaia.

²¹Perhkhuang ri thum perh tûrin Levia chi hêngte hi an thlang chhuak: Matithia, Elifelehua, Mikneia, Azazia, Tempul pulis Edoma leh Jeiela te nên.

²²Kenania chu thil tum thiam tak a ni a, Levia chi, rimawi tumtute chu an hotîr a.

²³Berekia leh Elkana chu Obed-edoma leh Jehia nên Thuthlung Bâwm vêngtuah an ruat a.

²⁴Puithiam Sebania te, Josafata te, Nethanela te, Amasaia te, Zekaria te, Benaia te, Eliezara te chu Thuthlung Bâwm hmaa kal a, tawtawrâwt hâmtuah an thlang a.

²⁵Lal Davida te, Israel upa te leh Sipai sâng hotute chu Obed-edoma inah Thuthlung Bâwm la tûr chuan hlim takin an kal a.

²⁶LALPA chuan Levia chi, Thuthlung Bâwm zâwntu tûrte a ṭanpui duh nân a hnênah bâwngpa pasarih leh berâm pasarih an hlân a.

²⁷Davida chuan puan zai sîn ṭha ber chi a sin a, hla satute pawh, an hotu Kenania leh Bâwm zâwntute nên chutiang chuan an inthuam a; Davida chuan puan zai sîn Efod a inbel bawk a.

²⁸Israel mi zawng zawng chu hlim takin an au va, tawtawrâwt te, berâm kîte an hâm a, dârbenthek te an bêng a, perkhuang te perh chungin Thuthlung Bâwm chu Jerusalem-ah an chhawm chho ta a.

²⁹Khuaa Bâwm an zâwn luh lai chuan Saula fanu Mikali chuan tukverhah a lo thlîr a, Lal Davida lâwma a lâm leh a zuang vêl chu a zu hmu a, a hmusit rilru hle a.