Read Mizo Lushai BU KHATNA CHRONICLES 17 Bible Online

BU KHATNA CHRONICLES 17 - Mizo Lushai bible

BU KHATNA CHRONICLES 17

¹Lal Davida chu inah a awm ta deuh reng a. Ni khat chu zâwlnei Nathana a ko va, a hnênah, “Sidar thinga sak inah ka awm a, LALPA Thuthlung Bâwm lah puan in mai maiah a awm si,” a ti a.

²Nathana chuan, “I vei rilrûk ang chu ti ta che, Pathianin a awmpui zêl ang che,” a ti a.

³Nimahsela, chumi zân chuan Pathianin Nathana hnênah,

⁴“Kal ta la, ka chhiahhlawh Davida hnênah ka thu hi va hrilh rawh, ‘Nang zawng, ka chênna tûr Tempul satu tûr i ni lo ve.

⁵Israel mite Aigupta ram ata ka hruai chhuah aṭanga tûn thleng hian tempulah ka la awm ngai lo. Puan in mai maiah hlîr ka awm a, hmun hrang hrangah ka insawn ka insawn ṭhîn.

⁶Israel mite ka kalpui ṭhin laite khân, hruaitua ka ruat tu mah, sidar thinga Tempul min siamsak tûrin ka phût ngai lo.

⁷“ ‘Chuvângin, ka chhiahhlawh Davida chu hrilh rawh; Kei, Engkim LALPA hnênah, ‘phûla i berâm vêng lai ka la che a, ka mi Israel-te lalah ka siam ta che a ni.

⁸I kalna apiangah ka awmpui che a, i do, i hmêlma zawng zawngte chu ka hnehtîr zêl che a, khawvêla lal hmingthang berah ka siam dâwn che a ni.

⁹Tu man an tihduhdah tawh lohna tûr hmun, ka mi Israel-te tân ka thlang a, ka awmtîr tawh a, mi kawlh pui puiin an bei ṭhîn a; mahse, an bei tawh lo vang.

¹⁰Ka mi Israel-te tân chuan rorêltute ka ruatsak a. I hmêlma zawng zawng hnehpui che leh thlah tam tak pêk che ka tiam a.

¹¹I thih hunah, i pate hnêna i kal hnu chuan i fate zînga pakhat chu lalah ka siam ang a, ka tilal êm êm ang.

¹²Ani chuan in mi saksak dâwn a ni, kumkhuaa lal tûrin ka dah nghet ang.

¹³A pa ka ni ang a, ka fapa a ni bawk ang. I lal hmaa lal ka hawisan ang khân ka hawisan lo vang.

¹⁴Ka mite leh ka ram chunga rorêltuah ka dah ang a, a thlahte ngeiin lalṭhutthlêng chu an chhawm zêl ang,’ ” a ti a.

¹⁵Pathianin thu a hrilh leh a sawi zawng zawng chu Nathana chuan Davida a hrilh a.

¹⁶Lal Davida chu Biakbûkah chuan a kal a, a ṭhu a, a ṭawngṭai a, “Aw LALPA Pathian, kei leh ka chhûngte tehlul hi engtizia nge heti taka min duat le?

¹⁷Chu chu tâwk ti mai lovin ka thlahte pawh la tihṭhat zêl i tiam lehnghal a; a ni, aw LALPA Pathian, mi ropui tak angin min cheibâwl hi.

¹⁸Eng nge ka ngen leh chuan ang? I chhiahhlawh hi i hre tlang vek a ni.

¹⁹Aw LALPA, i chhiahhlawh hi ka ṭhatna tûrin, nangma thu ngeiin min chawimawi i tum a lo ni; ka thlahte pawh i chawimawi zêl dâwn tih min hrilh hi.

²⁰Aw LALPA, kan hriat phâkah chuan nang ang tu mah an awm lo va, nang chauh hi Pathian chu i ni.

²¹Israel mite ang pawh hi khawvêlah hnam dang an awm lo; bawih ata i tlan a, Aigupta ram ata i hruai chhuak a, thil ropui leh mak tak tak tiin khawvêl pumah i hming i chher tâk hi.

²²Israel mite chu i mi ni kumkhua tûrin i ti ta a, Aw LALPA, nang hi an Pathian chu i nih tâk ngei hi.

²³“Khai le, aw LALPA, kei leh ka thlahte chungthua i thutiam hi i duh ang angin han tipuitling teh le.

²⁴I hming a lo ropui ang a, i mite chuan ‘Engkim LALPA hi Israel-te tân zawng Pathian a lo nih ngei hi,’ an ti dâwn nia. Ka lalna pawh hi kumkhua atân i tinghet dâwn a.

²⁵I chhiahhlawh chu hêng thil hi i hrilha, ka thlahte pawh an lal zêl dâwn tih i sawi avângin i hnênah hêng hi ka rawn sawi ngam a ni.

²⁶Nang zawng, Aw LALPA, Pathian i ni a, he thil ropui tak hi min tihsak i tiam ta si a.

²⁷An chunga ngil i neih zêlna tlâk an nih theih nân ka thlahte hi malsâwm la. Aw LALPA, nang chuan mal i sâwm tawh a, i malsâwmna chu an chungah awm reng rawh se,” a ti a.