Read Mizo Lushai BU KHATNA CHRONICLES 18 Bible Online

BU KHATNA CHRONICLES 18 - Mizo Lushai bible

BU KHATNA CHRONICLES 18

¹Nakin deuhvah chuan Filistia-ho chu Davida chuan a rûn a, a hneh a, Gath khawpui leh a vêl khuate chu a chhuhsak a.

²Moab-ho pawh a hneh a, a thuhnuaiah an awm a, a hnênah chhiah an chawi ṭhîn.

³Hamath dep, Zoba lal Hadadezera chuan Eufretis lui hmâr lam ram neih a tum a, a beih avâng hian Davida chuan a rûn a.

⁴Davida chuan a sakawr-tawlailîr sângsarih leh sakawr chuang mi sângsarih leh kea kal sipai sînghnih a mansak a. Tawlailîr za hnûk thei tûr sakawr chu a zuah a, a dang chu an tha a chhahsak a.

⁵Suria mi, Damaska lal chuan Hadadezera chu pui tûrin sipai a tîr a. Davida chuan a lo bei a, sipai sînghnih leh sânghnih a lo thahsak a.

⁶Suria ramah chuan sipai a dah a, Davida khualehtui an ni ta a, a hnênah chhiah an chawi a, LALPA chuan Davida chu kil tinah a tichak zêl a.

⁷Hadadezera ho rangkachak phawte chu a lâksak a, Jerusalem-ah a hâwn a,

⁸Hadadezera khua Tibhat leh Kun khua aṭang pawhin dâr tam tak a la a, chûng chuan Solomonan Tempula tuizêm te, dâr ban te, leh bêl te a siam a.

⁹Hamath lal Toia chuan Hadadezera leh a sipaite chu Davidan a hneh tih a lo hria a.

¹⁰Toia leh Hadadezera hi an indo fo tawh ṭhîn a, Davida hian a hneh tâk avângin lo hmuak tûr leh lâwmpui tûrin a fapa Jorama chu Toia chuan a tîr a. Jorama chuan rangkachak te, tangkarua te leh dâra siam thil tam tak te a pe a.

¹¹Davida chuan, Edom-ho te, Moab-ho te, Amon-ho te, Filistia-ho te leh Amalek-ho te a chhuhsak, rangkachak te, tangkarua te leh dâr te chu Tempul sak nân a pe vek a.

¹²Zeruii fapa Abisaia chuan Chikhur ruamah Edom-ho sîngkhat leh sângriat a that a.

¹³Edom ramah chuan sipai a dah thluah a, Davida khualehtui an ni ta a. LALPA chuan Davida chu khawiah pawh a tichak ta zêl a ni.

¹⁴Davida chu Israel zawng zawng lal a ni ta a; tu mah hleih nei lovin ro a rêlsak ṭhîn.

¹⁵Zeruii fapa Joaba chu sipai hotu lal ber a ni a, Ahiluda fapa Jehosafata chu Ziaktu lian a ni.

¹⁶Ahituba fapa Zadoka leh Abiathara fapa Abimeleka chu puithiam hotu an ni; Seraia chu ziaktu a ni.

¹⁷Jehoiada fapa Benaia chu Keret leh Pelet, lal vêngtute hotu a ni. Lal Davida fapate pawh ram chhûnga mi lian tak tak an ni.