Read Mizo Lushai BU KHATNA CHRONICLES 19 Bible Online

BU KHATNA CHRONICLES 19 - Mizo Lushai bible

BU KHATNA CHRONICLES 19

¹Tin, Amon-ho lal Nahasa chu a thi a, a fapa chuan a ai a awh a.

²Davida chuan, “Khawi nge, Nahasa khân min khawngaih a, a fapa Hanuna khawngaih hi ka ba ve a ni,” a ti a, a pa râl tûrin mi a tîr a. Hanuna râl tûr chuan Davida chhiahhlawhte chu an kal a, Amon-ho rama Hanuna in chu an va thleng a.

³Amon milianho chuan Hanuna hnênah, “Davida hian i pa hi sûn tak taka râl tûr chein mi a rawn tîr niin i ring em ni? Kan ram hi an lâk mai theih nân a chhiahhlawhte hi en thlithlai tûrin a rawn tîr a ni zâwk dâwn lâwm ni?” an ti a.

⁴Davida palaite chu Hanuna chuan a man a, an hmuihmul a ziahkâwnsak a, an kawrfual chu a kâwng chinah a tansak bawk a, a hâwntîr leh ta a.

⁵An lo sawisak dân chu Davida hrilh tûrin mi an tîr a, anmahni chu an zak lutuk a, lal hnênah chuan an kal hreh a ni. Davida chuan, “Jeriko khuaah awm ula, in hmuihmul a chawr buk leh deuh hunah in lo haw dâwn nia,” tiin mi a chah a.

⁶Lal Hanuna leh Amon mite chuan Davida thinurzia an hriat chuan Mesapotamia rama mi te, Suria rama Maaka leh Soba mite chu sakawr-tawlailîr leh sakawr chungchuang rawih nân tangka kg. sîngthum leh sângli an pe a. Tawlailîr sîngthum leh sânghnih an ruai a, chu nên chuan Maaka lal leh a sipaite chuan Medeba bulah bûk an rawn khuar a.

⁷Amon mite pawh khaw tin aṭangin indo tûrin an lo thawk chhuak a.

⁸Chu chu Davida chuan a lo hria a, a sipai hotu Joaba chu a ko va, a sipai huaisen rual pawh chu a ko khâwm a.

⁹Amon-ho chu an insiam a, an lal awmna khawpui Raba kulh pâwnah ṭanhmun an siam a; an lama ṭang tûr lalte leh sipai lo thawkte chuan ram palailêngah ṭanhmun an siam a.

¹⁰Joaba chuan hma lamah leh hnung lamah hmêlmaten an rawn bei dâwn tih a hriatin a sipai ṭha zualte chu a thlang chhuak a, Suria ram aṭanga lo kal sipaite bei tûrin a tlar a.

¹¹Sipai dangte chu a u Abisaia a hotîr a, Amon-ho bei tûrin an intlar a.

¹²Joaba chuan, “Suria ram mite ka hneh loh chuan min rawn pui la, Amon-ho i hneh loh chuan ka rawn pui ang che.

¹³I tum tiruh la, kan mite leh kan Pathian mite awmna khuate i chhan teh ang; LALPA chu ṭha a tih angin a lo che ang chu,” a ti a.

¹⁴Joaba leh a mite chuan Suria mite chu an bei a, an hmaah chuan an tlânchhe ta a.

¹⁵Amon miten Suria mite an tlânchhia an hmuh chuan Joaba u Abisaia hmaah chuan an tlânchhe ve a, an khaw kulh chhûngah chuan an tlân lût a, Joaba chuan Jerusalem-ah a hâwnsan ta a.

¹⁶Suria mite chuan Israel-te chu an ngam lo tih an hriatin Eufretis lui râla Suria mi dangte chu an pun a, Zoba lal Hadadezera sipai hotu Sofaka hovin an lo thawk a.

¹⁷Chu thu chu Davida an hrilh a, Israel mite chu a khâwm a, Jordan a kân a, an awmna chu a va thleng a. Suria mite nên chuan an inbei a.

¹⁸Suria mite chu Israel-te hmaah chuan an tlânchhia a, Davida chuan tawlailîr khalhtu sângsarih a that a, kea kal sipai sîngli nên; an hotu Sofaka pawh chu a that a.

¹⁹Hadadezera hote chuan Israel-te chu an ngam lo a ni tih an hriat chuan Davida nên an inberem a, a khua leh tuiah an awm ta a; Amon-ho pawh an pui duh tawh lo.