Read Mizo Lushai BU KHATNA CHRONICLES 21 Bible Online

BU KHATNA CHRONICLES 21 - Mizo Lushai bible

BU KHATNA CHRONICLES 21

¹Setana chuan Israel-te sawisak a duh a, Davida chu Israel-te chhiarpui a neihtîr a.

²Joaba leh hotu dangte hnênah, “Israel ram hi a kil tâwp Beer-seba aṭanga Dan thlengin fang chhuak ula, Israel mi eng zât nge awm ka hre duh a ni,” a ti a.

³Joaba chuan, “LALPA hian tûna awm lêt za aia tam Israel-te chu awmtîr teh se. Ka pu, i mite vek an ni a, engtizia nge hetiang thil tih hi i duh a, hnam pumin thiam loh kan chan ang?” a ti a.

⁴Nimahsela, lal thu chu a tlang ta zâwk a. Joaba chuan Israel ram chu a fang chhuak a, Jerusalem-ah a lo haw leh a.

⁵Joaba chuan Israel mi zât chu a hrilh a, “Sipaia ṭang thei mi maktaduaikhat leh nuaikhat Israel ramah an awm a, Judai ramah mi nuai li leh sîngsarih an awm,” a ti a.

⁶Lal thu chu ṭha a tih loh avângin Joaba chuan Levia chite leh Benjamin chite a chhiar tel ve lo.

⁷An thiltih avâng chuan Pathian chu a lâwm lo va, Israel mite chu a hrem a.

⁸Davida chuan Pathian hnênah, “Thil ka tisual nasa a, a âtthlâk hle a ni, min ngaidam rawh,” a ti a.

⁹ LALPA chuan Davida zâwlnei Gada hnênah,

¹⁰“Kal la, ‘Kawng thum, a eng ber emaw a thlan tûr ka ruatsak a ni; a thlan ber chu ka tihsak dâwn’ tih Davida chu va hrilh rawh,” a ti a.

¹¹Gada chu Davida hnênah a kal a, LALPA thu sawi chu a hrilh a, “A eng nge i duh ber thlang rawh le,

¹²kum thum ṭâm tuar nge, thla thum hmêlma ûm nge, ni thum LALPA Vantirhkohvin Israel ram pum khandaiha a sawisaka, hri-a a hrem? Mi tîrtu LALPA chu engtin nge ka chhân dâwn?” a ti a.

¹³Davida chuan Gada chu a chhâng a, “A ngaihna ka va hre lo ve! Mihring kut tuar zawng ka duh lo, LALPA kut tuar ka thlang zâwk e, ani chuan ngil a nei si ṭhîn a,” a ti a.

¹⁴Tichuan, Israel-te zîngah hri a rawn lêntîr a; mi sîngsarih an thi a.

¹⁵LALPA chuan Jerusalem tichhe tûrin Vântirhkoh a rawn tîr bawk a; mahse, a duh leh ta lo va, Vântirhkoh hnênah chuan, “A tâwk e, ti tawh suh,” a ti a. Jebus mi Arauna hruihah chuan Vântirhkoh chu a ding a.

¹⁶Davida chuan a han en a, Jerusalem tichhe tûr Vântirhkoh khandaih keng, lei leh vân inkâra ding chu a hmu a, Davida leh mipui hruaitute chuan saiip puan an sin vek a, hmaia lei siin an kûn a.

¹⁷Davida chu a ṭawngṭai a, “Aw Pathian, thil sual titu chu kei hi ka ni; chhiarpui kha keima tihtîr a ni; hêng mipui, eng mah ti ve lote hian tihsual an nei hlei nêm. Kei leh ka chhûngte hi min hrem mai ta che, I mite hi chu zuah rawh,” a ti a.

¹⁸ LALPA Vântirhkoh chuan Gada hnênah, “Davida chu Jebus mi Arauna hruihah maichâm siam tûrin hrilh rawh,” a ti a.

¹⁹Davida chuan LALPA thu chu a zâwm a, Gada sawi ang chuan a kal ta a.

²⁰Hruihah chuan Arauna leh a fapa pali chuan huit an lo vua a, Vântirhkoh an hmuh chuan a fate chu an biru a.

²¹Araunan Davida lo kal a hmuh chuan hruih ata chu a lo kal a, bawkkhupin chibai a lo bûk a.

²²Davida chuan, “Hri hi a reh theih nân i hruihah hian maichâm ka siam ang e, min leitîr rawh, a man tûr chu ka pe ang che,” a ti a.

²³Arauna chuan, “Ka pu, nei mai rawh, ṭha i tih ang angin ti rawh. Maichâma thilhlan tûr hei bâwngpa a awm a, a hâlna tûr thing pawh buh vuakna hmanrua a awm a; chhangphut thilhlan tûr huit pawh hi ka pe a che, engkim ka tum vek ang e,” a ti a.

²⁴Lal Davida chuan a chhâng a, “Ni lo ve, a man dik tak ka pe ang che, LALPA hnêna thilhlan atân i ta eng mah a thlâwnin ka la lo vang; a man pe lovin hâlral thilhlan tûr pawh ka hlân lo vang,” a ti a.

²⁵Davida chuan Arauna chu a hruih manah rangkachak tangka zaruk a pe ta a.

²⁶Chumi hmunah chuan LALPA tân maichâm a siam a, hâlral thilhlan leh remna thilhlan a hlân a. A ṭawngṭai a, LALPA chuan a rawn chhâng a, maichâma hâlral thilhlan chu vân aṭanga meiin a rawn kâng ral ta a.

²⁷ LALPA chuan Vântirhkoh chu a khandaih dah bo tûrin a hrilh a, a thu ang chuan a ti a.

²⁸LALPA chuan a ṭawngṭaina a rawn chhâng a ni tih Davida chuan a hria a, Arauna hruiha maichâmah chuan thilhlan a hlân ṭhîn ta a.

²⁹Chutih lai chuan Biakbûk leh thilhlanna maichâm Mosia siam chu Gibeon-ah a la awm a;

³⁰mahse, LALPA khandaih tuar a hlauh avângin Pathian be tûrin chutah chuan Davida chu a kal ngam lo va ni.