Read Mizo Lushai BU KHATNA CHRONICLES 22 Bible Online

BU KHATNA CHRONICLES 22 - Mizo Lushai bible

BU KHATNA CHRONICLES 22

¹Davida chuan, “He laiah hian LALPA, Pathian Tempul chu a awm tûr a ni. He lai maichâm hi a ni Israel-ten hâlral thilhlan an hlan ṭhinna tûr chu,” a ti a.

²A ram chhûnga hnam dang awm zawng zawng chu Davida chuan a ko khâwm a, hnathawkah a chhawr a. Ṭhenkhat chuan Tempul sakna tûr lung an chher a.

³A kawngkhâra hman tûr thîrkilhna te, kawpza te, thîr tam tak leh dâr tam tak, bûk chhuah sên loh a chhertîr a.

⁴Tura leh Sidon mite chu sidar thing tam tak rawn tawlh tûrin a ti a.

⁵Davida chuan, “Ka fapa Solomona sak tûr Tempul chu ropui tak, khawvêla hmingthang tham a ni tûr a ni. A la naupang a, chinchâng a la hre tâwk lo va, a châk ka lo chhuahsak tûr a ni,” a ti rilru a. Tichuan, a thih hmain Tempul sakna tûr châk tam tak Davida chuan a lo chhêk khâwm hman a ni.

⁶A fapa Solomona chu a ko va, LALPA, Israel-te Pathian tân Tempul saksak tûrin a hrilh a.

⁷Davida chuan, “Kei pawhin ka Pathian, LALPA hminga in sak chu ka châk êm êm a;

⁸amaherawhchu, LALPA chuan ‘Thisen i chhuah nasa êm a, indo lah i uar si. Nangmah avângin leia thisen luang ka hmu tam êm mai; nang chuan ka in chu i sa lo vang.

⁹Inrem ngaina tak fapa Solomona i nei a, a hming hi ‘muanna’ tih a nih ang ngei hian a vêla a hmêlmate lakah thlamuang takin ka awmtîr ang a, a lal chhûngin Israel ram a râlmuang ang a, thlamuang takin an awm ang.

¹⁰Ani chuan ka in tûr chu a sa ang a, ka tân fapa a ni ang a, a tân pa ka ni bawk ang; Israel-te chunga a lalṭhutthlêng chu kumkhua atân ka tinghet ang,’ tiin mi hrilh a ni.

¹¹“Chuvângin, ka fapa, LALPA chu i hnênah awm sela, malsâwm che sela, a tih ang ngei chuan LALPA i Pathian in tûr chu sa rawh le;

¹²Finna leh hmang hriatna pe phawt mai che sela, Israel mite chu LALPA, i Pathian dân hmangin ro i rêlsak thei ang a;

¹³Israel-te tâna LALPA thuruatte leh a Dân, Mosia a hrilhte kha zâwm la, kawng engkimah i hlawhtling ang. Huai takin ṭan la sauh sauh rawh; hlauthâwng suh la, beidawng mai hek suh.

¹⁴LALPA in sak nân rangkachak quintal nuaithum leh sângli, tangkarua quintal nuaithum leh sîngli ka lo khâwl hrâm hrâm tawh a, dâr leh thîr phei chu bûk sên a ni lo; thing leh lung pawh ka la ṭeuh tawh, lâk belh erawh chu a la ngai ang.

¹⁵Hnathawk tûr mi tam tak an awm a; lungchher mi te, thing dek mi te,

¹⁶rangkachak te, tangkarua te, thîr leh dâr chher thiam tak takte pawh an tam mai. Hma la ṭan rawh le, LALPA chuan malsâwm che rawh se,” a ti a.

¹⁷Davida chuan Solomona pui tûrin Israel hruaitute chu a hrilh a,

¹⁸“LALPA, in Pathian chuan a awmpui che u a, kil tin kil tangah râlmuang takin a awmtîr che u hi. He rama lo awm ṭhînte chu LALPA chuan min tukdawltîr a, ram hi in thuhnuaia awm a nih tâk hi.

¹⁹In rilru zawng zawngin LALPA, in Pathian rawng chu tihtakzetin bâwl rawh u. LALPA Thuthlung Bâwm leh Pathian bungbêl thianghlim dahna in tûr sa rawh u le,” a ti a.