Read Mizo Lushai BU KHATNA CHRONICLES 23 Bible Online

BU KHATNA CHRONICLES 23 - Mizo Lushai bible

BU KHATNA CHRONICLES 23

¹Davida chu a upain a tar ta hle a. Solomona chu Israel-te lalah a dah ta a.

²Israel hruaitute, puithiamte leh Levia chi zawng zawngte chu Davida chuan a ko khâwm a.

³Levia chi, kum sawmthum chin chung lam chu a chhiar a, mi sîngthum leh sângriat an tling.

⁴Mi sînghnih leh sângli chu Tempul sak hna enkawltuah a dah a; mi sângruk chu thil ziak fela thubuaite rem tûrin a ti a.

⁵Mi sângli chu pulis hna thawk tûrin a ti a; mi sângli dang chu lalin a pêk thil tum rîk theihte tuma LALPA fak hla sa ṭhîn tûrin a ti a.

⁶Davida chuan Levia chite chu an thlahtu athuin pâwl thumah a ṭhen a, Gerson te, Kohat te, Merari pâwlte an ni.

⁷Gersona khân fapa - pahnih Ladana leh Simeia a nei a.

⁸Ladana chuan fapa pathum - Jehiela te, Zethama te, Joela te a nei a.

⁹Hêngho hi Ladana thlah chi hrang hrang hruaitute an ni ta a (Simeia chuan fapa pathum - Selemota te, Haziela te, Harana te a nei a).

¹⁰Simeia thlahte chu a upat dân indawtin hêngte hi an ni: Jahata, Zina, Jeusa, Beria.

¹¹Hêng mi palite hi Simeia fate chu an ni a. Jahata chu hotu ber a ni a, Ziza chu a dawttu a ni; Jeusa leh Beria hian fa an ngah lo va, thlah khat anga chhiar an ni.

¹²Kohata hian fapa pali - Amrama te, Izara te, Hebrona te, Uziela te a nei.

¹³Amrama hi Arona leh Mosia pa a ni. Arona hi a thlahte nên, LALPA biaknaa rimtui hâltu, thilhlante hlâna bungraw thianghlim enkawltu leh LALPA hminga mipuite tân malsâwmna sawi thîntu atân serh hran an ni.

¹⁴Pathian mi Mosia thlahte erawh chu Levia chite zînga chhiar tel an ni.

¹⁵Mosia chuan fapa pahnih - Gersoma leh Eliezara a nei a.

¹⁶Gersoma thlahte zînga mi lâr chu Sebuela a ni.

¹⁷Eliezara hian fapa pakhat chauh Rehabia a nei a. Rehabia erawh hi chuan fa a ngah hle.

¹⁸Kohata fa upa dawttu Izara chuan fapa Selomita a nei a; ani chu an chi hotu a ni.

¹⁹Kohata fa dawt leh Hebrona chuan fapa pali - Jeria te, Amari te, Jahaziela te, Jekameama te a nei a.

²⁰Kohata fa tlum Uziela chuan fapa pahnih Mika leh Isia a nei.

²¹Meraria chuan fapa pahnih - Mahlia leh Musia a nei a. Mahlia hian fapa pahnih Eleazara leh Kisa a nei a.

²²Eleazara hian fanu chauh a nei, fapa nei lovin a thi a. A fanute hian pasalah Kisa fate an nei a.

²³Meraria fapa Musia zâwk chuan fapa pathum - Mahlia te, Edera te, Jeremota te a nei a.

²⁴Hêngho hi a chi chi leh a chhûng chhûnga an hming ziak vek, Levia thlahte chu an ni; kum sawmhnih chin chung lam tawh phawt chuan LALPA inah thawh an nei a ni.

²⁵Davida chuan, “LALPA, Israel-te Pathian chuan a mite chu râlmuang takin a awmtîr ta a; Jerusalem-ah a awm reng dâwn tawh a.

²⁶Levia chite tân chuan LALPA chênna bâwkte leh bungraw dangte chu zâwn fo a ngai dâwn tawh lo,” a ti a.

²⁷Davida thu ang chuan Levia chi rêng rêng chu kum sawmhnih an tlinin rawngbâwla koh theih tûrin an hming ziak vek a ni.

²⁸Hêng hnate hi an thawh tûr chu a ni: Arona thlah puithiamho Pathian biaknaa ṭanpui te, Tempul tualzâwl leh pindan chhûnga bungraw thianghlim vawn thianghlim te,

²⁹Pathian tâna chhang serh hlan tûr siam te; dawidim telh loh chhang kan te, chhangphut oliv hriak nêna hmeh te, Tempula thilpêk lo lâka teh fel te,

³⁰a chhûn a zâna LALPA ropuina faka zai te hi a ni.

³¹Sabat ni te, thla thar ni te leh kût nikhuaa hâlral thilhlan an hlan laia fak hla lo sa tûr mi eng emaw zât inchhâwk tûr an ruat thliah a, chûng chuan fak hla an sa reng tûr a ni.

³²Hmun Thianghlima biakbûk chu an enkawl ang a, Puithiam Arona thlah, an unaute rawng pawh an bâwlsak tûr a ni.