Read Mizo Lushai BU KHATNA CHRONICLES 26 Bible Online

BU KHATNA CHRONICLES 26 - Mizo Lushai bible

BU KHATNA CHRONICLES 26

¹Levia chi, Tempul pulis-a chhawr mi hrang hrang hetiang hi an ni: Kora thlahte zînga mi Korea fapa; Asafa chhûngte zînga mi Meselemia chuan

²fapa pasarih a nei a, an upat dân indawtin hêngte hi an ni: Zekaria, Jediaela, Zebadia, Jathniela

³Elama, Jehohanana, Eliehoenaia.

⁴Obed-edoma pawh Pathianin mal a sâwm a, fapa pariat a nei a. Chûngte chu a upat dân indawtin: Semaia te, Jehozabada te, Joa te, Sakara te, Nethanela te,

⁵Amiela te, Isakara te, Peulethaia te an ni.

⁶Obed-edoma fapa upa Semaia hian fapa paruk Othnia te, Refaela te, Obeda te, Elzabada te, Elihua te, Semaia te a nei a.

⁷An chite zîngah chuan mi âwmkhauh, mi chhuanawm tak tak an ni: a naupang pahnihte phei hi chu huai tak an ni.

⁸Obed-edoma thlahte aṭang hian an hna atâna mi fel tak tak mi sawmruk leh pahnih an awm.

⁹Meselemia thlah zîngah mi tling tak tak mi sâwm leh pariat an awm.

¹⁰Meraria thlah Hosa chuan fapa pali - Simria te (a fa u ber a ni lo nâ a, a pain chhûngkaw hotu-ah a ruat a ni),

¹¹Hilkia te, Tebalia te, Zekaria te. Hosa thlah zîngah Tempul pulis sâwm leh pathum an awm.

¹²Tempul pulis-te chu an thlahtu azirin pâwl hrang hrangah an inṭhen a, Levia chi dangte ang bawkin Tempula hna thawh hun an ruatsak a.

¹³Thla tinin, an tam emaw, an tlêm emaw khawii kawngkhâr nge an vên dâwn tih hriat nân ṭhum an vâwr ṭhîn.

¹⁴Selemia-ho chuan khawchhak kawngka an chang a, a fapa Zekaria chuan hmâr lam kawngka a chang a; Zekaria hi rorêl pâwla pa fing tak a ni.

¹⁵Obed-edoma hovin chhim lam kawngka an chang a, a fate chuan Tempul kudâm an chang a.

¹⁶Supima leh Hosa chuan khawthlang lam kawngka an chang a, kawng chunga Saleket kawngka an chang bawk. Hna chu a indawtin an inthawh chhâwk ṭhîn.

¹⁷Khawchhak lam kawngkaah chuan ni tin mi paruk an ding ṭhîn a, hmâr lam kawngkaah mi pali, chhim lam kawngkaah mi pali bawk an ding a, kudâm vêng tûr ni tin mi pali; kudâm pakhat hi mi pahnihin an vêng ṭhîn a ni.

¹⁸Khawthlang lam pindante kawng bulah mi pali, pindan chhûngah vêngtu pahnih an dah bawk.

¹⁹Chûng chu Kora leh Meraria thlahte vên tûr chu a ni.

²⁰Levia chi, mi ṭhenkhat chu Tempul thawhlâwm bâwm leh thilpêk dahkhâwmna pindan enkawltu an ni.

²¹Gersona fapa pakhat Ladana chu ama fa Jehielia thlahte telin Gerson-ho lu ber a ni.

²²A fapa pahnih Zethana leh Joela chuan Tempul thawhlâwm bâwm leh thilpêk dahkhâwmna an enkawl a.

²³Amrama thlah te, Izara thlah te, Hebrona thlah te leh Uziela thlah te tân pawh thawh tûr an tuk a.

²⁴Gersoma fapa Sebuela, Mosia tupa chu Tempul sum enkawltu lu ber a ni.

²⁵Gersoma unaupa Eleazara vângin Selomit-ho nên an inchhûngkhat hnai hle. Eliezara chuan fapa Rehabia a nei a, ani chuan fapa Jesaia a nei a; Jesaia hian fapa Jorama a nei a, ani chuan fapa Zikria a nei a, Zikria hian fapa Selomita hi a nei a ni.

²⁶Selomita leh a fate chuan lal Davida te, chhûngkaw hotute, chi hrang hrang hotute leh mipui hotuten Pathian tâna thilpêk an pêk khâwmte chu an lo enkawl fel a, Tempul sak nân indonaa an râllâk sumte kha an rawn pe ṭhîn a ni.

²⁷Selomita leh a fate hian Tempula hman tûr miin an rawn pêk rêng rêng chu an lo enkawl a ni.

²⁸Zâwlnei Samuela rawn pêk te, lal Saula pêk te, lal Davida pêk te, Nera fapa Abnera pêk te, Zeruii fapa Joaba pêkte pawh an enkawl a ni.

²⁹Izara thlah zînga mi Kenania leh a fate chu khawpui pâwn ram awp hna an thawhtîr a; chanchin vawn ṭhat te, Israel mite thubuaite an remsak tûr a ni.

³⁰Hebrona thlahte zînga mi Hasabia leh a chhûngte mi sângkhat leh zasarih chu Jordan thlang lam ram awptuah an dah a, sakhaw lam thu leh vântlâng thil ngaihtuah ṭhîntu tûr an ni.

³¹Hebrona thlah hotu ber chu Jeria a ni. Davida lal kum sawmlinaah Hebrona thlahte chanchin hi an chhui a. He mi thlah zîngah sipai huai tak tak Gilead bial Jazer khuaah an lo awm hlawm a.

³²Jeria laichînte zîng aṭangin lal Davida chuan mi sânghnih leh zasarih, hotu fel tak tak a thlang chhuak a, Jordan lui chhak lam bial zawng zawng, Reubena thlah te, Gada thlah te leh khawchhak lam Manasea thlah te awmna bial sakhaw thil leh khawvêl thil lama ramawptuah a dah a.