Read Mizo Lushai BU KHATNA CHRONICLES 28 Bible Online

BU KHATNA CHRONICLES 28 - Mizo Lushai bible

BU KHATNA CHRONICLES 28

¹Davida chuan Israel upate, hnam hrang hrang hruaitute, lal bula lal hna thawka thla tina inthlâk kual pâwl, sâng chunga thuneitute, za chunga thuneitute, an hotute, lal sum leh pai leh ran enkawltute, ama fate nên, sawrkâr hna thawk zawng zawng leh pasalṭha rualte chu Jerusalem-ah a ko khâwm a.

²Davida chu an hmaah a ding a, an hnênah, “Ka unau, ka mite u, ka thu hi ngaithla teh u. LALPA Thuthlung Bâwm dahna, a ke nghahna tûr in sak ka châk êm êm a, châkte pawh ka la tawh a;

³amaherawhchu, sipai ka ni a, thisen ka chhuah tam êm avângin Pathian chuan ka sak a phal lo va.

⁴LALPA, Israel-te Pathian chuan, ka unaute zîngah ka dam chhûnga lal tûrin min thlang chhuak a, hnam hruaituah Juda thlahte hi a ruat a ni. Juda-ho zîngah kan chhûng hi min thlang a, kan chhûng zîngah kei hi min duhsak a, Israel-te lalah min siam a ni.

⁵Fapa ṭhahnem tâwk tak min neihtîr a, chûng zînga mi Solomona hi LALPA rama Israel-ho chunga lal atân a thlang a ni.

⁶“LALPA chuan ka hnênah, ‘I fapa Solomona hian ka Tempul chu a sa ang, ka fapa atân ka thlang a, a pa ka ni ang a.

⁷Ka thuruatte, ka thupêkte a zawm tlat chuan a lalna chu kumkhua atân ka tinghet ang,’ a ti a.

⁸Chuvângin, Israel zawng zawng, LALPA mi pung khâwm leh kan Pathian thupêkte chu ngaihvenin fîmkhur takin awm rawh u; tichuan, he ram ṭha tak hi in nei ang a, in fate pawhin an rochung kumkhua thei dâwn nia,” a ti a.

⁹Solomona hnênah chuan, “Nang, ka fapa Solomona, i pa Pathian hi pawm la, châk tak leh tihtakzetin a rawng bâwl ang che, kan ngaihtuah leh kan tumte hi a hre vek a ni. Ani chu i zawn phawt chuan i hmu ngei ang a, i ngaihsak loh erawh chuan a paihthla hlen ang che.

¹⁰A Hmun Thianghlima in sa tûrin LALPA chuan a thlang che tih hre rawh, ṭan la la, thawk ṭan rawh,” a ti a.

¹¹Davida chuan a fapa Solomona hnênah Tempul sak dân tûr ruahmanna: kudâm tûr te, pindan chi hrang hrang te, Hmun Thianghlim Ber te, sual ngaihdamna hmun rem dân tûrte chu a pe a.

¹²Tual hungchhûng chei dân tûr te, a vêla in sak dân tûr te, Tempula hman bungbêl dah ṭhatna tûr te, LALPA hnêna thilpêk dah ṭhatna sak dân tûr a lo ruahman dânte a hrilh vek a.

¹³Puithiamho leh Levia chiten an hna an thawha, Tempul chhûnga rawng an bâwl dân tûr te, Tempula bungbêl awm enkawl dân tûra a ruahman dânte a hrilh bawk a.

¹⁴Bungbêl siam nân tangkarua leh rangkachak eng zât nge hman tûr tih te,

¹⁵khâwnvâr leh a dahna siamna tûr zât te,

¹⁶tangkaraw dawhkân te, Pathian tâna chhang serh dahna tûr dawhkâna tangkaraw hman zât tûrte a hrilh bawk a.

¹⁷Thîrkut te, maihûnte leh uain thâwl siam nân rangkachak hlîr hlak hman zât tûr te, thlêng siam nân tangkarua leh rangkachak hman zât tûrte a hrilh vek a.

¹⁸Rimtui hâlna dawhkân siam nâna rangkachak hlîr hman tûr zât te, LALPA Thuthlung Bâwm chunga Cherub thla zâr tawlailîr siam nâna rangkachak hlîr hlak hman tûr zât te pawh a hrilh a.

¹⁹Lal Davida chuan, “LALPA min hrilh ang ngeia tih tûr ruahman ziaknaah chûng chu ziak vek a ni,” a ti a.

²⁰Lal Davida chuan a fapa Solomona hnênah, “I tum tiruh la, ṭan la rawh, hna chu thawk ṭan rawh, tu man tikhawtlai che suh se. Ka Pathian, a rawng ka bâwl ṭhîn, LALPA Pathian chuan a awmpui ang che, LALPA chuan a Tempul i sak zawh hma chu a thlah lo vang che a, a hawisan hek lo vang che.

²¹Tempula puithiamte leh Levia chite thawh tûr ruat fel a ni tawh a. Mi themthiam, thawk châk tak tak an tam a, mite leh an hruaitute chu i thu nghâkin an awm ṭhuap a ni,” a ti a.