Read Mizo Lushai BU KHATNA CHRONICLES 29 Bible Online

BU KHATNA CHRONICLES 29 - Mizo Lushai bible

BU KHATNA CHRONICLES 29

¹Lal Davida chuan pungkhâwmho hnênah, “Ka fapa Solomona hi Pathian mi thlan chu a ni; mahse, a la naupang hle a, chinchâng a la hre tâwk lo. Hna thawh tûr hi a tam hle a ni, a sak tûr hi mihring in tûr a ni lo, LALPA, Pathian in tûr a ni.

²Ka theih chin chin chu châk ka lo chhuah tawh a, rangkachak te, tangkarua te, dâr te, thîr te, thing te, lunghlu te, lungmantam te, lungmawi te leh sailungvâr te ka la khâwm tawh.

³Hêng bâkah hian keima sum aṭangin tangkarua leh rangkachak ka pe bawk a ni. Pathian Tempul tûr hi ka vei êm avângin.

⁴Ofir rangkachak ṭha chi kg. nuaikhat, rawh thianghlim tangkarua kg. nuaihnih leh sîngli dâwn lai Tempul chhûng lam bang chei nân te,

⁵themthiamhovin an duh anga an cheimawi nânte ka pe a ni. LALPA tân tu nge thilpêk ṭhahnem tâwk pe ve phal le?” a ti a.

⁶Hnam tin hotu te, chi tin hruaitu te, sâng hotu te, za hotu te leh sawrkâr hna thawkho chuan phal takin thilpêk an pe ve ta a.

⁷Tempul sak nân chuan rangkachak kg. nuaikhat leh sîngsarih, tangkarua kg. nuai zathum leh sawmli, dâr kg. nuai zaruk leh sawmhnih, thîr kg. nuai sângthum leh zali aia tam mah an pe a.

⁸Lungmantam neite pawhin LALPA Tempul atân an pe a, Gersona thlah Jehielan a enkawl a.

⁹Mipui chu an hlim hle mai, phal taka mahni thu ngeia LALPA tâna pe an nih avângin an lâwm a ni, lal Davida pawh namên lovin a lâwm a.

¹⁰Chuvângin, Davida chuan Israel pungkhâwmho hmaah LALPA chu a fak a, “Aw LALPA, kan pu Israela Pathian, kumkhuaa chawimawi tlâk i ni.

¹¹I ropui a, thil i ti thei a, i chungnung a, i mawi a, lei leh vâna thil zawng zawng hi i ta a ni a, Aw Pathian, i lalber a, engkim chunga thuneitu i ni.

¹²Hausakna leh chawimawina zawng zawng hi i hnên aṭanga lo kal a ni a, chakna leh thiltihtheihna i kawl a, mi i siam lian a, i tichak ṭhîn.

¹³Chuvângin, kan Pathian, lâwmthu kan hrilh a che, i hming ropui tak chu kan fak a ni.

¹⁴Kei leh ka mite tehlul hian hetiang khawpa tam i hnêna thilhlan kan pe thei che hi kan theih avânga pe che kan ni lo ve; engkim hi i ta a ni a, i ta chu kan rawn pe mai che a nih hi.

¹⁵Aw Pathian, i hmaah chuan kan pi leh pute ang khân keini pawh mikhual, rei lo tê châm ang lek kan ni a, kan dam chhûng nite chu hlimthla ang lek a ni a, a ral mai ṭhîn.

¹⁶Aw LALPA, kan Pathian, i hming chawimawi tûra i in sak nân châk kan lo chhuahte pawh hi i hnên aṭanga lo kal, i ta vek a ni.

¹⁷Mi thinlung chhûngril i fiah ṭhîn a, mi nun ngîlte chu i lâwm ṭhîn. Kei chuan hêng thilte hi phal tak leh rilru ṭha tak puin i hnênah ka rawn hlân a ni; i mi, lo pungkhâwmte pawhin thilhlan rawn pêk che an châkzia ka hmu a ni.

¹⁸Aw Pathian, min thlahtu Abrahama te, Isaka te, Jakoba te Pathian, hetiang rilru hi i mite puttîr reng la, i laka an rinawm reng theih nân vêng ang che.

¹⁹Ka fapa Solomona hi i thupêk châk taka zâwm zêl thei tûrin vêng la, i Tempul, a châkte ka lâk ṭeuh tawh chu sa puitling tûrin ṭanpui ang che,” a ti a.

²⁰Davida chuan mipuite chu, “In Pathian LALPA hi fak rawh u,” a ti a. Pungkhâwmho chuan an thlahtu Pathian LALPA chu an fak a, an kûn a, LALPA chu an chawimawi a, lal pawh an chawimawi a.

²¹A tûkah chuan ran an talh a, LALPA hnênah thilhlan an hlân a, mipui pawh an eitîr a. Bâwngpa sâng, berâmchal sâng, berâmno sâng an talh a, maichâma hâlral thilhlan pawh an rawn hlân a. Uain thilhlan pawh an rawn hlân a.

²²Chumi ni chuan LALPA hmaah hlim takin an eiin an in ta a. Solomona chu lalah an puang nawn leh a, LALPA hmingin rorêltuah hriak an thih a, Zadoka pawh puithiamah hriak an thih a.

²³Tichuan, Solomonan a pa lalṭhutthlêng, LALPA dinsak chu a luah ta a, lal tling tak a ni, Israel mi zawng zawngin a thu an awih a ni.

²⁴Sawrkâr milian, sipaite leh Davida fa dangte pawhin Solomona chu an lala pawm tûrin thu an tiam a.

²⁵Solomona chu LALPA chuan hnam pum pui a ngaihsântîr a, Israel chunga rorêltu zawng zawng aiin Solomona chu a chawimawi a ni.

²⁶Jesaia fa Davida chu Israel zawng zawng chungah,

²⁷kum sawmli a lal a, Hebron-ah kum sarih, Jerusalem-ah kum sawmthum leh pathum.

²⁸Tarkûna damin a thi ta a; a hausa êm êm a, mi zah a kai a, a fapa Solomona chu a aiah a lal ta a.

²⁹Davida chanchin, a tîr aṭanga a tâwp thlengin zâwlnei pathum Samuela, Nathana leh Gada te lehkhabu-ah ziak vek a ni.

³⁰A ro rêl dân te, thil a tih theihzia te, a chunga thil thleng te, Israel leh an chhehvêl ram chunga thil thlengte an ziak vek a ni.