Read Mizo Lushai BU KHATNA CHRONICLES 5 Bible Online

BU KHATNA CHRONICLES 5 - Mizo Lushai bible

BU KHATNA CHRONICLES 5

¹Jakoba fapa upa ber Reubena thlahte chu hêngte hi an ni. (Reubena hian a pa hmei a mutpui avângin fa u ber nihna lâksak a ni a, Israela fa Josefa fate hnêna pêk a ni a; chuvângin, fa tîr chhiarnaah a hming a tel ta lo va ni).

²Juda thlahte hian an unaute an khûm a, an zîng aṭangin lal a lo chhuak na a, fa tîr nihna chu Josefa chan a ni.

³Israela neih hmasak Reubena chuan fapa pali, Hanoka te, Palua te Hezrona te, Karmia te a nei a.

⁴Joela thlahte chu a chhuan indawtin hêngte hi an ni: Semaia, Goga, Simeia,

⁵Mika, Reaia, Baala,

⁶Beera; Beera hi Reubena thlahte zînga hotu ber a ni. Asuria Lal Tilgat-pilnesera a man a, salah a hâwn a;

⁷an chhûngkaw chanchin ziaknaah Reubena thlah chi hrang hruaitute hming hêng chauh hi a chuang: Jeiela, Zekaria,

⁸Bela hi Azaza fa a ni, a pu chu Sema, Joel chi a ni. Joel chite hi Aroer khuaah an awm. Hmâr lam ram Nebo leh Baal-meon thlengin an chan a ni.

⁹Gilead ramah hian berâm leh kêl an ngah hle a; chuvâng chuan, khawchhak lam thlalêr ram, Eufretis lui thlengin an luah a ni.

¹⁰Lal Saula hun lai khân Reuben-ho hian Hagar-ho an bei a, an that a, Gilead ram chhak lama an ram chu an neihsak ta a.

¹¹Reuben-ho dawt Basan ramah Gada thlahte hi an awm, khawchhak lamah Saleka thlengin an inzâr a.

¹²Joela thlahte hi an tam ber a, Sefama thlahten an dawt a. Janaia leh Sefata thlahte hi Basan rama chi hlâwm dang awm vete chu an ni.

¹³Gad hnam zîngah hêng chi sarihte pawh hi chhiar tel an ni: Mikael, Mesulam, Seba, Jorai, Jakan, Zia, Eber.

¹⁴Hêngho hi Huria fapa Abihaila thlah an ni. Huria pa chu Jaroa a ni, chu mi pa chu Gileada a ni a, a pa chu Mikaela a ni. Mikaela pa chu, Jesisaia a ni, chu mi pa chu Jahdoa a ni, a pu chu Buza a ni.

¹⁵Hêng chite zînga hruaitu ber chu Abdiela fapa Ahia a ni, chu mi pa chu Gunia a ni.

¹⁶Gilead leh Basan rama khuaahte an awm a, Saron ram phûlah te an awm darh bawk.

¹⁷Juda lal Jothama leh Israel lal Jeroboama te hun laiin hêng inthlahchhâwng chanchin hi an chhui chhuak a ni.

¹⁸Reuben-ho te, Gad-ho te leh khawchhak lama awm Manase hnam zâtve te chuan phaw te, khandaih te leh thal hman dân thiam sipai sîngli leh sângli leh zasarih leh sawmruk an nei a.

¹⁹Hagar hnam Jetur te, Nafis te, Nodab te nên an indo va.

²⁰Pathian an ring a, ṭanpui an dîl a, Pathianin an ṭawngṭaina chu a chhâng a, Hagar-ho chu, an thurualpuite nên an hneh a.

²¹An hmêlmate sanghâwngsei sîngnga, berâm nuaihnih leh sîngnga, sabengtung sanghnih leh mi nuaikhat an man a.

²²Pathian hminga indo an ni a, mi tam tak an that a ni. Sala an tân hma chu chûngho ramah chuan an awm ta a.

²³Khawchhak lama Manasea thlah awmte chu Basan ramah leh a hmâr lam ramah Baal-hermon-ah te, Senir-ah te, Hermon tlâng thlengin an awm a, mi an pung chak hle.

²⁴An zînga chi hrang hrang hruaitute chu Efera te, Isia te, Eliela te, Azriela te, Jeremia te, Hodavia te, Jadiela te an ni. Sipai huai tak tak an ni a, an chite zînga hotu challang tak vek an ni.

²⁵Mite chuan an pate Pathian chu an hawisan a; chûng rama lo awm, Pathianin a hnawh chhuahte pathian chu an be ta a.

²⁶Chuvângin, Pathianin Asuria lal Pula, Tilgatpilnesera an tih bawk chu, an ram a rawn rûntîr a, Reuben thlah te, Gad thlah te leh khawchhak lama awm Manase thlah te chu a kawi chhuak a, Hala-ah te, Habor-ah te, Hore-ah te leh Gozan lui kamah te chuan a awm hlentîr ta a.