Read Mizo Lushai BU HNIHNA CHRONICLES 1 Bible Online

BU HNIHNA CHRONICLES 1 - Mizo Lushai bible

BU HNIHNA CHRONICLES 1

¹Lal Davida fapa Solomona chuan Israel ram chu a chang nghet ta hle a. LALPA, a Pathian chuan mal a sâwm a, a lo chak ta êm êm a.

²Mi sâng hotu te, za hotu te, sawrkâr hnathawk te, hnam tin hruaitu te, Israel chhûng tin lu leh Israel-ho te chu

³Gibeon khuaa kal vek tûrin a hrilh a; chutah chuan LALPA nêna Inbiakna Bûk, LALPA chhiahhlawh Mosian thlalêra a siam kha a la awm ta reng a ni.

⁴Thuthlung Bâwm erawh chu Davida khân Kiriat-jearim aṭangin a la a, Jerusalem khuaa puan in a kaihsakah khân a dah a nih kha.

⁵Uria fapa, Bezalela, Hura tupa siam dâr maichâm pawh kha Gibeon-ah hian Biakbûk kawtah a la awm a ni. Bûk kawtah chuan Solomona leh mipuite chuan LALPA chibai an bûk a.

⁶Lal chuan LALPA hnênah hâlral thilhlanah ran sângkhat a hlân a, bûk kawta dâr maichâmah a hâl ral a.

⁷Chumi zân chuan Solomona hnênah Pathian a inlâr a, “Eng nge pe che ila i duh?” a rawn ti a.

⁸Solomona chuan a chhâng a, “Ka pa Davida chu i ngaina êm êm ṭhîn a; tûnah, a ai awhah min dah ta a.

⁹Aw LALPA Pathian, ka pa hnêna i thutiam kha tihlawhtling teh. Leia vaivut zât ngawta tam chungah lalah min siam a;

¹⁰chuvângin, an chunga ro ka rêl thiamna tûrin finna leh hmangchâng hriatna min pe ang che. Chutilo chu, engtin nge i mi heti zozai hi ro ka rêlsak theih ang?” a ti a.

¹¹Pathian chuan Solomona chu a chhâng a, “Hausakna te, neihnunna te, hmingthanna te, i hmêlma tihhlumsak te, dam reina te dîl lovin an chunga lala ka siamna che ka mite chunga ro i rêlsak thiam nân finna leh hmangchâng hriatna dîl nachâng i hria a.

¹²Finna leh hmangchâng hriatna chu ka pe ngei ang che; i hmaa lo lal tawhte pawhin an neih phâk loh hausakna te, neihnunna te leh hmingthanna te pawh ka pêk belh ang che,” a ti a.

¹³Solomona chuan Gibeon khuaa hmunsâng, LALPA nêna Inbiakna Bûk awmna chu a chhuahsan a, Jerusalem-ah a hâwng a, Israel-te chungah a lal ta a.

¹⁴Sakawr-tawlailîr sângkhat leh zali leh indo sakawr sîngkhat leh sânghnih a nei a, a ṭhen chu Jerusalem-ah a kawl a, khawpui hrang hrangah a dang chu a dah darh a.

¹⁵A lal chhûng hian Jerusalem-ah chuan rangkachak leh tangkarua chu lungte tlukin a tam a, sidar thing pawh khawthlang lam tlâng ṭhuta theipui kûng zât zetin a tam a.

¹⁶Solomona sakawrte chu Aigupta leh Kilikia aṭanga tawlh khâwm a ni.

¹⁷Lal aiawha sumdâwngte chuan sakawr-tawlailîr tangka zaruk zêlin an lei a, sakawr pawh tangka za leh sawmngain an lei khâwm a; Hit mite leh Suria mite hnênah an hralh chhâwng ṭhîn.