Read Mizo Lushai BU HNIHNA CHRONICLES 10 Bible Online

BU HNIHNA CHRONICLES 10 - Mizo Lushai bible

BU HNIHNA CHRONICLES 10

¹Rehoboama chu Sekem khuaah a kal a, chutah chuan lala siam tûrin Israel-ho, hmâr lama awmte chu, an lo pung khâwm a.

²Nebata fapa Jeroboama, Solomona hlauva tlân bo chu, Solomona thih hnu chuan a lo hâwng leh a.

³Hmâr lama Israel-te chuan an va pun a, Rehoboama hnênah chuan an kal ho ta a, a hnênah,

⁴“I pa khân min chhawr nasa a, kan phur a tirit êm êm a; nangin min chhawr nêpin kan phur min tihzânsak deuh la, i khua leh tuiah kan awm ang e,” an ti a.

⁵An hnênah chuan, “Ni thum hnuah lo kal leh ang che u,” a ti a, mite chu an chhuak ta a.

⁶Lal Rehoboama chuan a pa Solomona dam laia a bula awm ṭhîn upate chu a râwn a, “Hêng mite hi engtin nge chhâng ila min tih?” a ti a.

⁷Anni chuan, “Hêng mite chungah hian ngilnei la, ṭha takin bia ang che, I mi an ni kumkhua ang,” tiin an chhâng a.

⁸Upaho thurâwn chu a ngaithla duh lo va, tlangvâl, ama rualpui, a kawm ṭhînte chu a râwn a,

⁹“ ‘I pa khân kan phur a tirit êm êm mai, min tihzânsak rawh,’ rawn titute hi engtin nge ka lo chhân ang?” a ti a.

¹⁰A rualpui tlangvâlte chuan, “Hêngho, ‘i pain kan phur a tirit êm a, min tihzânsak rawh,’ titute hi heti hian chhâng mai rawh, ‘Ka kutzungtê pawh hi ka pa kâwng ai chuan a khauh ang;

¹¹ka pain in phur a tirit hle a nih chuan kei chuan ka belhchhah ang; vuakna hruia a hrem ṭhinnaah che u kei chuan khawmualkaikuang ka ruai ang,’ ti ang che,” an ti a.

¹²Ni thum hnuah chuan Jeroboama leh Israel-te chu Rehoboama hnênah, a sawi ang khân an lo kal a.

¹³Lal chuan upaho thurâwn kha zâwm duh lovin mite chu ram takin a bia a.

¹⁴Tlangvâlho thurâwn ang khân Rehoboama chuan mite hnênah, “Ka pa chuan in phur a tirit hle maw? Kei chuan ka belhchhah ang. Vuakna hruiin a hrem ṭhîn che u a, kei chuan khawmualkaikuangin ka hrem ang che u,” a ti a.

¹⁵Lal chuan mipui thu chu a ngaihthlâksak duh ta lo va, Silo mi zâwlnei Ahija hnêna Nebata fapa Jeroboama chungchâng Pathianin a sawi kha LALPA chuan a tihhlawhtlin theih nân Pathianin a tihtîr a ni.

¹⁶Israel mite chuan lalin an thu a ngaihsak duh lo tih an hriatin lal chu an chhâng a: “Davida ramah chan eng nge kan neih ve le? Jesaia thlahte zîngah chanvo eng nge kan neih? Davida thlahte chu an awm awmin awm rawh se,” an ti a. Israel mi zawng zawng chu in lamah an haw ta a.

¹⁷Judai rama awm Israel mite chungah chauh chuan Rehoboama chu a lal ta a.

¹⁸Lal Rehoboama chuan Hadorama, hnathawka phût luih pâwl hotu chu Israel-ho ko tûrin a tîr a, anni chuan lungin an lo dêng hlum a. Chumi avâng chuan Rehoboama chu a tawlailîrah a chuang sawk sawk a, Jerusalem-ah a tlân ta a.

¹⁹Chuta chin chu Israel mite chu Davida thlahte lakah tûn thlengin an hel ta a ni.