Read Mizo Lushai BU HNIHNA CHRONICLES 11 Bible Online

BU HNIHNA CHRONICLES 11 - Mizo Lushai bible

BU HNIHNA CHRONICLES 11

¹Lal Rehoboaman Jerusalem a thlen chuan Benjamin mi leh Juda sipai ṭha ṭha nuaikhat leh sîngriat a khâwm a, hmâr lama awm Israel-te chu a thuhnuaia dah leh tûrin beih a tum a ni.

²Mahse, Pathian mi, Semaia hnênah LALPA thu a lo thleng a:

³Lal Rehoboama te, Juda leh Benjamin mite hnênah chuan heti hian a hrilhtîr a:

⁴“In unau Israel-te chu bei suh u, haw rawh u. An thil tih chu ka thu-a ti an ni,” tiin. LALPA thupêk chu an awih a, Jeroboama chu an bei ta lo va.

⁵Rehoboama chu Jerusalem-ah a awm a, Judai ram leh Benjamin-ho ram chhûnga hêng khuate hi kulhin a hung a:

⁶Bethlehem te, Etam te, Tekoa te,

⁷Beth-zur te, Soko te, Adulam te,

⁸Gath te, Maresa te, Zif te,

⁹Adoraim te, Lakis te, Azeka te,

¹⁰Zora te, Aijalon te, Hebron te.

¹¹Hêng khaw kulhte hi rinawm takin a siam a, khaw tin tân hotu a ruat a, khaw tinah buh te, oliv hriak te, uain te a chhêk bawk a.

¹²Fei te, phaw te a dah bawk a; chutiang chuan Judai ram leh Benjamin ram mite chu a thuhnuaiah a dah thei a ni.

¹³Israel-ho rama bial tina awm puithiamte leh Levia chite chuan chhim lam an pan a, Judai ramah an lût a.

¹⁴Levia chite chuan an ran tlatna leh an ram chante chu an kalsan a, Judai ramah te, Jerusalem-ah te an lo kal a. Jeroboama leh a aiawhtute khân LALPA puithiamah an hmang duh lo va.

¹⁵Jeroboama khân hnam dang pathian biakna hmunsânga rawngbâwl tûr, bâwngpa lem a siam chawpte leh ramhuai biakna hmuna thawk tûr ama puithiam a ruat a ni.

¹⁶Israel hnam zînga LALPA, Israel-te Pathian be tak tak duhtute chuan Jerusalem-ah Levia chite chu an rawn zui a, an thlahtute Pathian, LALPA hnênah thilhlan an hlan theih nân an lo kal ve a ni.

¹⁷Hemi avâng hian Judai ram chu Solomona fapa Rehoboama lamah chuan an ṭang a, lal Davida leh Solomona lal lai ang mai khân an khawsa a ni.

¹⁸Rehoboama chuan Davida fa, Jeremota fanu Mahalati nupuiah a nei a, a nu chu Eliaba fanu, Jesaia tunu Abihaili a ni.

¹⁹Fapa pathum - Jeusa te, Semaria te, Zahana te an nei a.

²⁰Nakin deuhvah chuan Absaloma fanu Maaki a nei leh a, fapa pali - Abija te, Ataia te, Ziza te, Selomita te an nei a.

²¹Rehoboama hian nupui sâwm leh pariat leh hmei sawmruk a nei a, fapa sawmhnih leh pariat leh fanu sawmruk a nei a. A nupui leh a hmei zawng zawng zîngah Maaki hi a duh ber a.

²²Abija hi a fa zawng zawng zîngah a duat ber a, a aiawha lal atân a thlang a ni.

²³Rehoboaman a fate chhawr dân a thiam hle, Judai leh Benjamin ram chhûng khawpui kulh nei zawng zawngah hotu-ah a dah darh a. An lakah a thilphal hle a, nupuite pawh a neihsak thluah hlawm a.