Read Mizo Lushai BU HNIHNA CHRONICLES 12 Bible Online

BU HNIHNA CHRONICLES 12 - Mizo Lushai bible

BU HNIHNA CHRONICLES 12

¹Rehoboama chuan a lo lal ngheh tâk veleh a mite nên LALPA dân chu an ngaihthah ta a.

²Rehoboama kum nga a lal kum chuan LALPA an thlahthlam avângin hrem an tuar ta a, Aigupta lal Sisaka chuan,

³sakawr-tawlailîr sângkhat leh zahnih, sakawr chungchuang mi sîngruk leh sipai chhiar sên loh, Lub te, Suki te leh Sudan sipai rual te nên Jerusalem chu a rawn bei a.

⁴Judai ram khaw kulh neite chu a la tawh a, Jerusalem pawh a lo thleng a.

⁵Lal Rehoboama leh Judai ram hruaitu, Sisaka hlauva Jerusalem-a lo tlânte hnênah chuan zâwlnei Semaia chu a kal a, an hnênah, “Hei hi LALPA thu chu a ni. Min kalsan a, kei pawhin Sisaka kuta awm tûrin ka kalsan ta che u a ni,” a rawn ti a.

⁶Lal leh hotute chuan, “Thil sual kan ti a ni, LALPA hian a tidik e,” an ti a.

⁷An thiltih chu a hriatin LALPA thu chu Semaia hnênah a lo thleng leh a, a hnênah, “ ‘Thil sual kan ti’ an tih tâk avângin ka tiboral lo vang. Sisakan Jerusalem a rawn beih hunah, ka thinurna chu Sisaka hmangin an chungah ka leihbaw vek lo vang a, a ṭhen chu an dam khawchhuah ka phal dâwn a ni.

⁸Sisaka chuan khua chu a la ang a, lei lal rawngbâwl leh ka rawngbâwl inan lohzia an hria ang,” tiin.

⁹Sisaka chuan Jerusalem chu a rawn bei a, a Tempul leh lal ina thil hlu awmte chu a la vek a. Lal Solomonan rangkachak phaw a siamte nên, engkim a la vek a.

¹⁰Chûng aiah chuan Rehoboama chuan dâr phawte a siam a, lal in kawngkhâr vêngtute kutah a hlân a.

¹¹Lal chu Tempula a kal apiangin vêngtute chuan phawte chu an keng a, an zui a; vênbûkah an dah kîr leh ṭhîn.

¹²LALPA hnêna tlâwm taka a intukluh tâk avângin, LALPA thinur chuan a sawisa hrep ta lo. Judai ram mite pawh an khawsa nuam viau va.

¹³Rehoboama chu Jerusalem-ah a lal a, a intinghet ta hle. Lal a nihin kum sawmli leh pakhat a ni a, Jerusalem-ah kum sâwm leh pasarih ro a rêl a. Israel ram zawng zawngah chu khua chu amah chibai bûkna hmun atân LALPA chuan a thlang a ni. Rehoboama nu chu Amon mi, Naamaii a ni.

¹⁴LALPA duhzâwng a ngaihtuah lo va, thil sual a ti a.

¹⁵A bul aṭanga a tâwp thlengin Rehoboama thiltih leh a chhûngte chanchin chu ‘Zâwlnei Semaia chanchin’ ziakna lehkhabu-ah a chuang. Rehoboama leh Jeroboama chu an indo reng a ni.

¹⁶Rehoboama chu a thi a, Davida khawpuiah an phûm a, a fapa Abija chu a lo lal ta a.