Read Mizo Lushai BU HNIHNA CHRONICLES 13 Bible Online

BU HNIHNA CHRONICLES 13 - Mizo Lushai bible

BU HNIHNA CHRONICLES 13

¹Israel lal Jeroboama kum sâwm leh pariat a lal kumin Abija chu Judai ram lal a ni ṭan a,

²Jerusalem-ah kum thum a lal a, a nu chu Gibea khaw mi Uriela fanu Mikaii a ni. Abija leh Jeroboama chu an indo ta a.

³Abija chu sipai huai thlan ṭhalh nuai li nên a thawk a, Jeroboama chuan sipai huai ṭhalh bawk nuai riat nên a rawn bei a,

⁴Efraim tlângram Zemaraim tlângchhîpah Abija chu a ding a, Jeroboama leh Israel-te chu a au va, “Ka thu hi lo ngaithla teh u,

⁵LALPA, Israel-te Pathian chuan, Davida leh a thlahte hnênah Israel mite chunga lal nihna chu thu thlung meuhvin a pe tawh a ni tih in hre na nge?

⁶Davida fapa, Solomona chhiahhlawh Nebata fapa Jeroboama chu a pu lakah a hel ta mai a, mi lawilo pui puiin an ṭawiawm a.

⁷Solomona fapa Rehoboama chu an pawisa lo va; ani lah a la naupangin chûngho ngam tûrin a rilru a la puitling si lo va.

⁸Davida thlahte hnêna lal thuneihna LALPA pêk dodâlin in sipai ngah leh Jeroboama bâwng lem, in pathian atâna a siam chhuangin in lo thawk a.

⁹LALPA puithiamte leh Levia chite chu in hnawt chhuak a, hnam dang tih dân angin puithiam tûr in ruat chawp a. Bâwngpa rawn kai nazawng leh berâm pasarih emaw rawn khalh apiang chu, ‘kan puithiam’ in tih atân puithiamah in lo serh hrang duh zêl mai bawk si.

¹⁰“Keini zawngin kan Pathian LALPA rawng a ni kan la bâwl, kan la hawisan lo, Arona thlah puithiam ngeiin an tih tûr an ti a, Levia chi ngatin an pui a ni.

¹¹Tûk tin leh tlai tin LALPA tân rimtui an hâl a, hâlral thilhlante pawh an hlân ṭhîn a ni. Chhang serh chu dawhkân thianghlimah an dah ziah a, tlaiah rangkachak khâwnvâr pawh an la hâl ziah a ni. Keini chuan LALPA thupêk kan la zâwm zêl a, nangni erawh chuan ani chu in thlah ta a ni.

¹²Pathian chu min hruaitu a ni a, a puithiamte pawh inbeihna tawtawrâwt hâm tûrin an inpeih reng a ni. Aw Israel-te u, in thlahtute Pathian, LALPA hi do lul suh u, in ngam lo vang,” a ti a.

¹³Chutih chhûng chuan Jeroboama chuan a sipai ṭhenkhat chu Juda sipaite ep tûrin a dah a, a ṭhen chu an hnung lama châng ru tûrin a kaltîr bawk a.

¹⁴Juda-ho chuan an han thlîr vêl a, an hmêlmate chuan an lo hual vek tawh a, LALPA chu an au va, puithiamte chuan tawtawrâwt an hâm a.

¹⁵Juda-te chu an au chiam a, Abija chuan hma a hruai a, an bei a, Pathian chuan Jeroboama leh Israel-te chu a hneh ta a.

¹⁶Israel-te chu Juda-te hmaah chuan an tlânchhia a, Pathian chuan Juda-te chu a tichak ta zâwk a ni.

¹⁷Abija leh a sipaite chuan Israel sipaite chu an titlâwm dêr mai a. Israel sipai ṭha ṭha nuainga zet chu an that a ni.

¹⁸Juda-te chuan an thlahtute Pathian, LALPA chu an rinchhan avângin Israel-te chu an hneh ta a ni.

¹⁹Abija chuan Jeroboama sipaite chu a ûm a, an khawpui ṭhenkhat Bethel te, Jesana te, Efron te chu an chhehvêl khuate nên a chhuhsak a.

²⁰Abija dam chhûngin Jeroboama chu a ding chhuak leh hman lo, LALPA chuan a tihlum ta nge nge a ni.

²¹Abija erawh chu a chak tial tial a, nupui sâwm leh pali a nei a, fapa sawmhnih leh pahnih leh fanu sâwm leh paruk a nei a.

²²Abija chanchin dang, a thu sawi leh a thil tihte chu zâwlnei Idoa chanchin ziakna bu-ah a chuang.