Read Mizo Lushai BU HNIHNA CHRONICLES 15 Bible Online

BU HNIHNA CHRONICLES 15 - Mizo Lushai bible

BU HNIHNA CHRONICLES 15

¹Obeda fapa Azaria chungah Pathian Thlarau a lo thleng a.

²Lal Asa hmu tûrin a kal a, a au va, “Lal Asa, nangni Judai leh Benjamin mite u, ka thu hi ngaithla teh u. A lama in ṭan chhûng chuan LALPA pawh in lamah a ṭang ang; in zawn chuan in hmu ang a, in hawisan chuan a hawisan ang che u.

³Israel-te chu Pathian tak be lovin rei tak an awm a, zirtîrtu tûr puithiam an nei lo va, dân an hre hek lo.

⁴Mahse, manganna an tawhin LALPA, Israel-te Pathian lam chu an hawi a, Amah chu an zawng a, an hmu ṭhîn a nih kha.

⁵Chûng lai chuan ram chu a buai a, a mumal loh êm avângin vâk chhuak ṭha ngam pawh an awm ngai lo.

⁶Hnam khatin hnam dang an tirethei a, khaw khatin khaw dang an tirethei bawk a. Pathian chuan buaina leh manganna an chungah a thlentîr a ni.

⁷Nangni erawh chuan zâm lovin ṭan la rawh u. In thil tih rah chu in hmu ngei ang,” a ti a.

⁸Lal Asa chuan Obeda fapa zâwlnei Azaria thu a han hriat chuan a huai phah sawt a, Judai leh Benjamin rama milem awm zawng zawng chu a tibo vek a, a pain tlângram khua a lâk zawng zawnga mi pawh a tibo vek a. Tempul tuala LALPA maichâm pawh a siam ṭha a.

⁹ LALPA chuan a awmpui tih an hriatin Efraim ram aṭang te, Samaria-ho ram aṭangte chuan a lamṭang mi tam takin Asa chu an rawn bêl a. Asa chuan chûngho chu Judai ram leh Benjamin rama mite nên a ko khâwm a.

¹⁰Asa lal kum sâwm leh panga kum, a thla thumnaah chuan Jerusalem-ah an pung khâwm a.

¹¹Chumi ni chuan an râllâk bâwng zasarih leh berâm sângsarih LALPA hnênah an hlân a.

¹²An thlahtute Pathian, LALPA chu rilru tak leh tihtakzeta be tûrin thu an thlung a.

¹³‘Puitling pawh, naupang pawh, mipa pawh, hmeichhia pawh, Israel-te Pathian, LALPA be duh lo chu tihhlum tûr,’ an ti a.

¹⁴Aw ring taka auvin LALPA hming chhâlin chhia an chham a; an thu thlun chu vawn tlat an tiam a, an au va, tawtawrâwt an hâm bawk a.

¹⁵Tihtakzeta thu an thlun tlân tâk avângin Judai ram mite chu an lâwm êm êm a. LALPA rawngbâwl chu nuam an ti a, ani chuan a lo pawm a, kil tinah rem a lêntîr a.

¹⁶Lal Asa chuan, a pi lalnu Maakin Aseri lim tenawm tak chu a phun avângin lalnu a nihna a hlihsak a. Aseri lim chu a kit a, a ek a, Kidron lui ruamah a hâl vek a.

¹⁷Ram chhûnga hmunsâng, pathian dang an biakna zawng zawng chu Lal Asa chuan tibo vek lo mah se a dam chhûng chuan LALPA chauh a vuan a ni.

¹⁸A pa Abijan Pathian hnêna a thilpêk zawng zawng chu Asa chuan Tempulah a dah a; amah ngeiin rangkachak leh tangkarua a hlante pawh chu a dah tel a.

¹⁹Asa chuan kum sawmthum leh panga ro a rêl chhûng chuan indona a awm leh ta lo.