Read Mizo Lushai BU HNIHNA CHRONICLES 16 Bible Online

BU HNIHNA CHRONICLES 16 - Mizo Lushai bible

BU HNIHNA CHRONICLES 16

¹Judai rama Asa kum sawmthum leh paruk a lal kumin Israel lal Baasa chuan Juda lal Asa ram aṭanga tu mah an lo chhuah loh nân leh tu mah an luh theih loh nân Rama-ah kulh a siam a.

²Asa chuan Tempul sum bâwm ata tangkarua leh rangkachak a la chhuak a, Damaska khuaa awm Suria lal Ben-hadada hnênah a thawn a, a hnênah,

³“Ka pa leh i pa an ṭangrual ang khân keini pawh i ṭangrual teh ang. En teh, tangkarua leh rangkachak ka rawn thawn a che, Israel lal Baasa nên in inṭhianna titâwp la, ka ram ata a sipaite hnuk kîr teh se,” a ti a.

⁴Ben-hadada chuan Asa thu rawt chu ṭha a ti a, sipai hotu a ko va, Israel ram chu an rûn ta a; Ijon te, Dan te, Abel-maim te leh Naftali-ho biala kudâm awmna khua zawng zawng chu a la a.

⁵Chûng thil chu lal Baasan a hriatin Rama khaw kulh a siam chu a chawlhsan ta a.

⁶Rama kulh siamna tûr lung leh thingte chu la lutin Juda ram mi zawng zawng chu Asa chuan a pun a, Geba leh Mizpa kulh siam nân a hmang ta a.

⁷Chutih lai chuan zâwlnei Hanania chu lal Asa hnênah a lo kal a, a hnênah, “LALPA i Pathian rinchhan lovin Suria lal i rinchhan vei a; chuvângin, Israel lal sipaite chu i chhuah ta a ni.

⁸Ethiopia leh Libua mite khân sipai leh sakawr-tawlailîr tam tak leh sakawr chungchuang mi tam tak an nei a ni lâwm ni kha? Mahse, LALPA chu i rinchhan a, a hnehtîr che a nih kha.

⁹LALPA chuan amah ring tlattute chu ṭanpui tûrin khawvêl pum puiah a mit a lên ruai ruai ṭhîn a ni. Tûn aṭang chuan do tûr i nei reng ang. Âtthlâk takin thil i ti a nih hi,” a ti a.

¹⁰Zâwlnei chungah chuan Asa chu a thinur ta hle a, kawl a buntîr a, ripah a khung a, chuta chinah chuan mi dang chungah pawh râwng taka kut thlâk a chîng ta a.

¹¹Asa lal ṭan tirh aṭanga a tâwp thleng chanchin chu ‘Juda leh Israel lalte chanchin’ ziakna bu-ah a chuang.

¹²Asa chu kum sawmthum leh pakua a lal hnuin a ke a pân a, a ke a lo bai ta a. Mahse, LALPA pan lovin daktor a pan zâwk a.

¹³Kum hnih hnu chuan a thi ta a.

¹⁴Davida khawpuiah, a thlân atâna a kerah chuan an phûm ta a. Phûm hmain mosola te, tel rimtuite an hnawih a, amah sûn nân meipui an chhêm hluah hluah a.