Read Mizo Lushai BU HNIHNA CHRONICLES 17 Bible Online

BU HNIHNA CHRONICLES 17 - Mizo Lushai bible

BU HNIHNA CHRONICLES 17

¹Jehosafata chu a pa Asa hnuah a lo lal a, Israel-te do thei tûrin a intichak a.

²Judai ram kulh awmna khuaahte sipai a dah a, Judai ram thingtlâng leh Efraim rama khawpui, a pa Asan a lo hneh tawh khuaahte pawh sipai hmunpui a dah bawk a.

³A pain a lal tirh laia a tih ang khân Jehosafata pawhin a ti a, Baal a be duh lo va. Chuvângin, LALPA chuan mal a sâwm a.

⁴A pate Pathian rawng a bâwl a, Pathian thupêk a zâwm a, Israel lalte angin a khawsa ve hek lo.

⁵Tichuan, LALPA chuan Jehosafata chu Judai ramah a lal nghehtîr ta hle a, mite chuan chhiah an rawn pe zut zut a, a hausa ta viau va, mite pawhin an ngaisâng hle.

⁶LALPA rawngbâwl chu a châkzâwng a ni a, Judai rama an milem pathian biakna hmunsângte, Aseri limte chu a tibo vek a.

⁷Kum thum a lal hnu chuan Ben-haila te, Obadia te, Zekaria te, Nethanela te, Mikaia te chu Judai ram khawpuiah zirtîrtuah a tîr chhuak a.

⁸Levia chi mi pakua leh puithiam pahnih an kal ve a, Levia chite chu Semaia te, Nethania te, Zebadia te, Asahela te, Semiramota te, Jehonathana te, Adonija te, Tobija te, Tobadonija te an ni a, puithiamte chu Elisama leh Jehorama an ni.

⁹LALPA dân lehkhabu chu kengin Judai ram khua chu an fang chhuak a, mite chu an zirtîr a.

¹⁰An vêl ram zawng zawng chu Jehosafata do ngam lo tûrin LALPA chuan a tidawih a.

¹¹Filistia mi ṭhenkhat chuan chhiahah tangkarua leh thilpêk tam tak Jehosafata chu an rawn kensak a. Arab mi ṭhenkhat pawhin berâm sângsarih leh zasarih leh kêl sângsarih leh zasarih an rawn pe bawk a.

¹²Tichuan, Jehosafata chu a lal tulh tulh a, Judai ram dung leh vângah kulhte a siam a, khawpuite a din a.

¹³Chûngah chuan ei tûr a chhêk ṭeuh bawk a. Jerusalem khuaah a sipai hotu lian huaisen tak tak chu a dah a.

¹⁴A chi chiin mahni chi hotu an nei a, Juda thlah sipai hotu ber chu Adna a ni, sipai nuaithum a ho va.

¹⁵A dawttu chu Jehohanana a ni, sipai nuaihnih leh sing riat a ho va.

¹⁶A pathumna chu Zikria fapa Amasia a ni, sipai nuaihnih a ho va (Amasa hi hetianga LALPA rawngbâwl tûra inpe a ni).

¹⁷Benjamin thlah sipai hotu ber chu, sipai chhuanawm tak Eliada a ni, sipai nuaihnih, âwmphaw leh thal keng a ho va.

¹⁸A dawttu chu Jehozabada a ni, indo inpeih reng sipai nuaikhat leh sîngriat a ho va.

¹⁹Judai rama kulh nei khuatea sipai a dah bâkah hêng hi Jerusalem-a a sipai awmte chu an ni.