Read Mizo Lushai BU HNIHNA CHRONICLES 18 Bible Online

BU HNIHNA CHRONICLES 18 - Mizo Lushai bible

BU HNIHNA CHRONICLES 18

¹Juda lal Jehosafata chuan a lo hausaka, a hmingthan tâk hle hnu chuan Israel lal Ahaba nên inkawp zai an rêl a, an fate an inneihtîr a.

²Kum eng emaw zât hnuah Jehosafata chu Samaria khuaah Ahaba tlawh tûrin a chhuk a. Jehosafata leh a ṭhiante lawm nân Ahaba chuan berâm leh bâwng tam tak a talh a, ruai a ṭheh a. Gilead biala Ramot khua bei tûrin a sâwm a.

³“Ramot khua chu bei tûrin i kal ve thei ang em?” a ti a. Jehosafata chuan, “I inpeih hun hunah kei leh ka sipaite chu kal kan inpeih e, kan pui ang che,” a ti a.

⁴“LALPA i râwn hmasa zet ang,” a ti bawk a.

⁵Ahaba chuan zâwlnei zali dâwn lai rual chu, “Ramot khua ka bei ang nge bei lo vang?” tiin a zâwt a. Anni chuan, “Bei rawh, Pathian chuan a awmpui ang che,” an ti a.

⁶Jehosafata chuan, “Zâwlnei dang LALPA min râwnsak thei tûr an awm lâwm ni?” a ti a.

⁷Ahaba chuan, “Mi pakhat, Imla fapa Mikaia chu a la awm a. Mahse, thil ṭha eng mah min hrilh lâwksak ngai lo va, ka haw hle a ni. Thil ṭha lo tak tak hrilh lâwk a chîng a,” a ti a. Jehosafata chuan, “Lal meuhvin chuti êma tih tûr emaw ni le?” a ti a.

⁸Lal chuan hotu pakhat a ko va, Mikaia hruai tûrin a tîr a.

⁹Lal pahnih chu Samaria khawpui kawngka pâwn hruihah, lalṭhutthlêng an chhawpah chuan an ṭhu a; zâwlnei rual chuan an kal hual a, thu an sawi bual bual a.

¹⁰An zînga pakhat, Kenaana fapa Zedekia chuan thîr, seki lem a siam a, Ahaba hnênah, “Suria-ho chu hêng nên hian i bei ang a, i tudawl dêr ang,” a ti a.

¹¹Zâwlnei dangte pawh chuan chutiang bawk chuan an ti a. “Kal la, Ramot khua chu han bei rawh, i la ngei ang. LALPA chuan a hnehtîr ang che,” an ti a.

¹²Mikaia hruaitu tûra an tirh chuan a hnênah, “Zâwlnei dang zawng zawngin a ṭha lamin lal hnênah thu an sawi a, nang pawhin chutiang chuan sawi ve mai ta che,” a ti a.

¹³Mikaia chuan, “LALPA, mi nung hming chhâlin ka sawi e, ka Pathianin sawi tûra min hrilh chu ka sawi ang” tiin a chhâng a.

¹⁴Lal Ahaba hma a va thlen chuan lal chuan, “Mikai, lal Jehosafata nên Ramot khua kan han bei ang nge bei lo vang?” a ti a.

¹⁵Mikaia chuan, “Han bei teh rêng u, in hneh mawlh ang, LALPA chuan hnehtîr che u ang hmiang,” a ti a. Ahaba chuan, “LALPA hminga ka hnêna thu i sawiin thu dik chauh mi hrilh tûrin vawi eng zât nge ka hrilh dâwn che?” a ti a.

¹⁶Mikaia chuan, “Vêngtu nei lo berâm rual angin tlânga Israel-ho an darh ka hmu a ni. ‘Hêngho hian hruaitu an nei lo; mahni in lamah dam têin haw dial mai rawh se,’ LALPA chuan a ti e,” a ti a.

¹⁷Ahaba chuan Jehosafata hnênah, “Kha maw, ka tâna thil ṭha tûr eng mah a sawi ngai lo ka tih rêng kha. Thil ṭha lo lam hlîr a ni a sawi ṭhin,” a ti a.

¹⁸Mikaia chuan, “LALPA thu hi lo ngaithla teh. LALPA chu vâna a lalṭhuthlêngah a ṭhu ka hmu a, vântirhkohte chuan an din hual a.

¹⁹‘Tu nge Ahaba chu Ramot beia thi tûrin zu bum ang?’ LALPA chuan a ti a. Vântirhkoh ṭhenkhat chuan thu khat an sawi a, a dang chuan thu dang an sawi a.

²⁰Thlarau pakhat hi a lo kal a, LALPA hmaah a va ding a, ‘Ka zu bum ang e’ a ti a. LALPA chuan, ‘Engtin nge i bum ang?’ a ti a.

²¹Thlarau chuan, ‘Ahaba zâwlneite chu dâwt ka zu sawitîr ang,’ a ti a. LALPA chuan, ‘Kal la, chutiang chuan zu ti rawh, i bum ngei ang,’ a ti a.

²²Chutiang chuan a ni LALPA chuan hêng zâwlneiho hi i hnêna dâwt a sawitîr ni. LALPA ngeiin i chhiatna tûr a ruat tawh a ni e,” a ti a.

²³Zâwlnei Zedekia chuan Mikaia chu a va pan a, a bêng a, “Engtik lai khân nge LALPA thlarauvin min kalsana i hnêna a awm tâk le?” a ti a.

²⁴Mikaia chuan a chhâng a, “Pindan chhûngrila i bihrûk hunah i hre mai ang,” a ti a.

²⁵Ahaba chuan hotu pakhat hnênah, “Mikaia kha man la, khaw awptu Amona hnênah hruai la, lal fapa Joasa pawh hmuhtîr ang che.

²⁶Dam taka ka lo kîr leh hma chu ripah khung sela, chhang leh tui chauh pe rawh se,” a ti a.

²⁷Mikaia chuan, “Dam taka i lo kîr leh hrim chuan LALPA hian min be lo a ni ang; ka sawi hi mi tinin hre rawh se,” a ti a.

²⁸Lal Ahaba leh lal Jehosafata chu Gilead biala Ramot khua bei tûr chuan an kal ta a.

²⁹Ahaba chuan Jehosafata hnênah, “Kan inbeih hunah ka inchei danglam ang a, nang chu lal incheiin inchei zêl ang che,” a ti a. Lal Ahaba chu a inchei danglam a, an inbeihnaah chuan a tel ve ta a.

³⁰Suria lal chuan tawlailîr khalhtu hotu chu, “Israel lal chauh lo chu tu mah bei suh ang che,” a ti a.

³¹Chûngho chuan Jehosafata an hmuh chuan Israel lal emaw an ti a, an rawn bei ta a. Jehosafata chu a au chiam a, LALPA Pathian chuan a rawn chhâng a, a rawn beitute chu a tihkîrsak a.

³²Tawlailîr khalh hotute chuan Israel lal a ni lo tih an hriat chuan an ûm duh ta lo va.

³³Suria sipai thal kâp mai mai hian lal Ahaba chu a râlthuam inkârah a kâp fuh palh a. A tawlailîr khalhtu hnênah chuan, “Hliam ka tuar e, lêt la, inbeihna hmun ata tlân chhuak rawh,” a ti a.

³⁴An inbeih mup mup chhûng chuan Ahaba chu a tawlailîrah chuan Suria mite lam hawiin a ṭhu a, ni a tlâk chuan a thi ta a.