Read Mizo Lushai BU HNIHNA CHRONICLES 19 Bible Online

BU HNIHNA CHRONICLES 19 - Mizo Lushai bible

BU HNIHNA CHRONICLES 19

¹Jerusalem-a a inah Jehosafata chu dam takin a haw a.

²Zâwlnei pakhat, Hanana fapa, Jehua chuan lal chu a hmu a, a hnênah, “Mi sual ṭanpuia LALPA hawtute lama ṭan hi dik i ti em ni? I thiltih hian LALPA thin a tiur hle a ni.

³Chuti chung pawhin ṭhat vena zawng i nei e; miin an biak Aseri lim zawng zawng i ti bo va, Pathian duhzâwng zawn i tum hi,” a ti a.

⁴Jehosafata chu Jerusalem-ah a awm a, a taima hle a; chhim tâwp Beer-seba aṭanga hmâr lam Efraim tlâng tâwp thlengin a khuate chu an thlahtute LALPA Pathian lama hawi kîrtîr tumin a tlawh ṭhîn.

⁵Judai rama kulh nei khuaah tawh phawt chuan rorêltute a dah a, hetiang hian a hrilh zêl a:

⁶“Thu pawtchat mai mai suh ang che u, in hna hi mihring thu-a thawk in ni lo va, LALPA thu-a rêl in ni a, in thu rêl chu LALPA rêl a ni tih hria ang che u.

⁷LALPA chu ṭih ula, fîmkhur takin engkim ti ang che u, LALPA, kan Pathian chuan hlêprûk te, hleih neih te, thamna lâk te a hua a ni,” a ti ṭhîn a.

⁸Jerusalem khuaah chuan Levia chite, Puithiamte leh khaw hotu deuh ṭhenkhat chu rorêltu atân a ruat a; LALPA dân bawhchhiat thu te, vântlâng zînga thubuai ngaihtuahtu tûr an ni.

⁹Heti hian a ti a, “LALPA ṭih chungin in hna hi in thawk tûr a ni; in tih apiang rinawm takin ti zêl ang che u.

¹⁰Khawii khua aṭang pawhin in chipuiten mihring thah thu emaw, dân leh thupêk bawhchhiat thu emaw an rawn thlen chuan, an thu ngaihtuah chhûnga an awm dân tûr ngun takin hrilh ṭhîn ang che u; tichuan, LALPA lakah thil sual in ti dâwn lo nia.

¹¹Sakhaw lam thilah chuan puithiam lalber Amaria thu a lalber ang a, khawtlâng thilah chuan Judai ram awptu thu a lal ber a ni. Levia chite hian hêng rorêltute thu hi an kengkawh tûr a ni. Huai takin hêng hi zâwm sela, LALPA chu mi dik lamah a ṭang ṭhîn a ni,” tiin.